Yo, Djotjayanydja ŋunhi yutjuwaḻaŋ'ka yana gaḏakuŋga, 8 muka dhuŋgarra nhanŋu djaka'wunydja, bala walalanydja ŋanya giŋguŋalana, yurru Djotjayanydja ŋunhi ḻatju'na ŋanya dhika walaŋnha giŋ; ŋayi yukurranha ŋuli djämanydja bitjana yana liŋgu ŋamathanhana, galŋa‐ŋamathinyamaranha ŋuli Garraynhana. Wirrki ŋayi yukurrana yana gurrum'thurruna bala djäma marrtjinanydja, malthurruna bukmakku ŋuriki romgu Godkalaŋuwunydja malanyŋuwu, bitjarra yana liŋgu ŋayi yukurrana djäma bitjarra nhanukala märi'muyu *22:1–2 DavidDaypitthu.

3-7 Ga ŋunhi ŋayi Djotjaya wakindhinana liŋguna, märr ya' yawirriny'thinana, bala ŋayi waŋana ŋurikala ḏalkarra'mirriwala walalaŋgala bitjarrana, “Rrupiya walala märraŋa yukirriya yolŋu'‐yulŋuwala, märr yurru ŋilimurru biyapul dhuḻ'yun yuṯakumayi Godku Buṉbu. Ŋilimurru yurru buku‐ŋal'yun nhanŋu ŋamathama wal'ŋu yana.”

8-10 Ga yuwalkthi walala bitjarrayinydja, bala walala marrtjina rewal'yurrunana ŋunhi Buṉbu Godkunydja ŋamathaŋalayi, bala yana walala maḻŋ'maraŋala djorra'na, makarrmirrina dhärukmirrina ŋunhi Godku rom yukurrana waŋana ŋunhiliŋumi. Yo, märraŋalanydja walala, ga gäŋala bala ŋurikala giŋgalana, ga walalanydja waŋana bitjarra, “Maḻŋ'maraŋalanydja ŋanapurru dhuwala djorra',” bitjarra. Bala walala waŋanana marrtjina ŋunhi makarrnha dhäruknha malanha ŋurikala giŋgalana.

11-13 Ga ŋayi giŋdja wirrkina galŋa‐yätjthina ŋunhi ŋayi ŋäkulanydja ŋunhi dhäruk malanha, liŋgu yolŋuyunydja walalay baman' yana ŋäthili meṉguŋala; yakana walala yukurrana ŋayathaŋala ŋunhiyi rom malanha Godku.

Ga ŋayi giŋdja waŋana bitjarrana, “Nhaltjanna yurru ŋilimurru yulŋunydja? . . . märr Godtja yurru yaka muka ŋilimurruŋgu ŋaramurryirri? Godthunydja ŋilimurrunha yurru dhä‐ḏir'yunna, liŋgu ŋilimurru yaka malthurruna yukurrana nhanŋuway waŋganygu.”

14-20 Bala ŋayi Garrayyunydja wekaŋalana dhäwuny'tja Giŋ‐Djotjayawuna ŋurikala dhäwu'mirriwala miyalkkala, waŋana bitjarrana, “Ŋarranydja dhuwala wirrkina ŋaramurryina ŋuriki yolŋu'‐yulŋuwu †22:14–20 JudahDjudapuyŋuwunydja, liŋgu walala ŋarraku ŋapa‐nherraṉminana bilyurrunana, bala yana buku‐ŋal'yurruna be nhäkuna wiripuŋuwuna waŋarrwu. Märr‐yuwalk yana ŋarra yurru dhä‐ḏir'yundja walalanha. Yurru yaka ŋarra yurru baḏuwaḏuyun walalanha dhiyaŋunydja‐wala ŋunhi nhe yukurra Djotjaya nhina walŋa mukthun ŋurruŋu giŋ walalaŋgu, liŋgu nhe mäkiri'‐witjun ŋuli yukurra ŋarraku dhärukku bitjan liŋgu, ga ŋapa‐nherraṉmirri nhokalay ŋunhi yätjku malaŋuwu. Yuwalk yana märr yuwalk ŋarra ŋäkulanydja nhuna bukumirriyanharanydja, ga dhuwala wäŋa yurru yukurra djingaryun ḻatju ŋanya wurrkurrum' ga mäwaya, ga yana liŋgu ga rakunydhirri nhe yurru, ga dhäŋuru ŋuliŋurunydja bala yurru bathalana wal'ŋu marinydja buna.” Bitjarrayina ŋayi Godthu ḻakaraŋala giŋgunydja.