Bala giŋdhunydja ŋuriŋi Djotjayayunydja ḻuŋ'maraŋalana ŋurru'‐ŋurruŋunha Djudapuyŋunhanydja yolŋu'‐yulŋunha ga ḏalkarra'mirrinha walalanha ga dhäwu'‐gänharamirrinha walalanha, ga bukmaknhana ŋunhi yolŋunha walalanha, ḻukunydjanha ga ŋurruwuyknha; bukmaknha marrtjina yurrum'thurrunana ŋunhimalana waŋganylilina Godkalana Buṉbulili, bala yana ŋayi ŋuriŋi giŋdhunydja ŋayipinydja märraŋalana djorra'na ŋunhi, bala marrtjina waŋana makarr dhäruknha, bukmak ŋunhi Godku nhanŋuway rom malanha. Yo, ŋunhiyi ŋayi marrtjina waŋananydja djorra'ŋuru, ŋunhi walala maḻŋ'maraŋala ŋunhala Godkala Buṉbuŋura, ŋunhi ŋayi winya'yurruna, djuḻuḻ'yurruna yukurrana baman'ŋumirri.

3-20 Ga ŋayi giŋdhu buŋgawayu ŋuriŋi ga bukmakthu yolŋu'‐yulŋuyu dhäwu'‐nherraṉminana Godkalana, waŋana bitjarrana, “Ŋanapurru yurru malthunna, minawaŋnha bukmakku Godkalaŋuwunydja romgu, ga malthunna marrtji bala yurru nhanŋuwaynha yanana waŋganyguna.” Dhäŋuru ŋuliŋurunydja ŋunhi walala warrpam' be rewal'yurruna yäkthurrunana, warrpam'thurrunana ḏarrtjalkkuŋalana Godku Buṉbunydja, djalkthurrunana warrpam'thurrunana yanana bena‐wala ŋunhinydja malanha girri' ŋunhi ŋuriŋiyi girri'yu walala yukurranha ŋuli ŋäthili buku‐ŋal'yuna wiripuŋuwu waŋarrwu malaŋuwu ŋunhala Godkala Buṉbuŋura. Walala märraŋalanydja warrpam'thurruna yana, bukmak ŋunhi nhä malanha, maḏayin' malanha, ga gäŋalanydja, bala warraŋullilina dhawaṯmaraŋala, ga ḏaw'‐ḏawyurrunanydja, bala dhuŋgur'yurrunana gurthayuna; ga bitjarrayi liŋgu walala ḏaw'‐ḏawyurrunayi goŋbuynhanydja djämawuynha waŋarrnha walalanha, bala djalkthurruna ḏakaṉguŋalana. Ga bitjarrayi liŋgu walala djalkthurruna yarrkmaraŋala ŋunhi ḏalkarra'mirrinhanydja walalanha ŋuriki bothinyarayŋuwunydja waŋarrwu; yakana yana walala yurru biyapul gulŋiyirri Godkalanydja ŋunhanydja wal'ŋu Buṉbulili. Yo, ḻiw'maraŋalana ŋuliwitjarra wäŋakurrunydja, ḻiw'yunmaraŋalana yanana, warrpam'nha walala bukmaknha marrtjina yukurrana rewal'yurrunanydja; yakana yukurrana waŋgany dhärrana ŋunhiliŋumi, ŋunhi walala ŋuli yukurranha ŋunhili buku‐ŋal'yuna wiripuŋuwu waŋarrwu. Yo, dhawar'yunmaraŋalana yana walala yulŋunydja warrpam'thurrunana, liŋgu walala djälthina nhanŋuway yana waŋganygu Garraywuna, walala yukurra yurru buku‐ŋal'yun nhanŋuwaynha bukmakthu walalaŋgalay ŋayaŋuyu.

21-23 Ga ŋuliŋurunydja dhäŋuru, bala ŋayi giŋ Djotjayanydja waŋana bitjarrana, “Ŋilimurrunydja yurru dhuwala ḻuŋ'maranhamirri ŋunhamalana buŋgulwuna, ŋilimurru yurru guyaŋirri yukurra ŋurikina Ḻäy‐yuḻkthunmaranharawuna.” Bala walala bukmaknha yurrum'thurrunanydja, ga ŋunhilina waŋganyŋurana walala yukurrana nhinana, guyaŋina roŋiyinana, wokthurrunana Garraywu, märr‐yiŋgathinana ŋurikina ḻäy‐yuḻkmaranharamirriwuna.

24 Yo, ŋayi Djotjayayu ŋuriŋi giŋdhu djalkthurrunayi ŋunhi marrŋgitjnhanydja walalanha yolŋu'‐yulŋunha, bukmakkuŋalana yanana walalanha ŋayi yarrkmaraŋala beŋuru Djudaŋurunydja, liŋgu ŋayi ḏukṯukthina ŋunhi ŋayi yurru malthun romgu bukmakku yana wal'ŋu Godkalaŋuwu, bukmakku yana ŋunhi ŋayi maŋutji‐ḻaw'maraŋalanydja yukurrana Godku djorrany'tja. Yakana ŋula waŋgany marrŋgitj yolŋu yukurrana walŋa nhinana ŋunhili Djudanydja, warrpam'nha djalkthurrunana.

25-26 Yo, Djotjayayunydja yuwalk yukurrana märr‐yuwalkthina Garraynha bukmakthu nhanukiyingala ŋayaŋuyu ga ganydjarryu ga ḻiyayu; ŋayi minawaŋ yukurrana yana nhanŋuway yulŋunydja bukmakku ŋuriki romgu malaŋuwu ŋunhi Godthu lili goŋdhu‐wekaŋala *23:25–26 MosesMawtjitjkala. Yurru Godthunydja yukurrana mukthurruna guyaŋina Djudapuyŋunhanydja, yakana ŋayi ḻiya‐dhumukthina yätj ŋunhi walala yukurrana djäma yätjkuŋala ŋäthili, liŋgu Djotjayawala bäpa'mirriŋuyu Manatjayu yätjnha mirithirrina yukurrana djäma ŋunhili ŋäthilinydja.

27 Yo, Garraynydja waŋana bitjarra, “Ŋarranydja yurru dhä‐ḏir'yunna Djudapuyŋunhanydja, wekama walalanha yurru miriŋuwana, bitjarra ŋarra ŋunhala †23:27 IsraelYitjuralpuyŋunha dhä‐ḏir'yurruna ŋäthili. Liŋgu dhuwalanydja Djurutjalambuynydja ŋarrakuwaynha yanana wäŋa; dhiyalanydja nhuma yurru buku‐ŋal'yun ŋarrakuwaynha yanana waŋganyguna.”

28-30 Yo, ŋunhi ŋayi Djotjaya liŋguna rakunydhina, bala nhanŋu gäthu'mirriŋuna ‡23:28–30 JoahazDjawawatjnha wapthurruna dharapullili nhanukalanydja giŋdhina.

31-34 Yurru §23:31–34 JoahazDjawawatjtja ŋunhi yaka ŋamakurru' giŋ, ŋayi djäma yukurrana yätjkuŋala yana, bitjarra nhanukala märi'muyu ŋäthili ŋunhala. Bala miriŋuna marrtjina lili, ga märraŋalana ŋanyapinyaynydja, bala djaw'yurruna *23:31–34 EgyptYetjiplilina, ga ŋunhalana ŋayi rakunydhinanydja. Ga nhanukala gutha'mirriŋuyuna †23:31–34 JehoiakimDjuwakimdhuna dharapulnydja märraŋala nhanŋu, ga ŋayina giŋ yukurrana nhinana.

35-37 Bitjanana liŋguna ŋunhi ‡23:35–37 JudahDjudapuyŋuyunydja yolŋu'‐yulŋuyu ŋuli yukurranha wekanha buku‐ruŋinyamaranha yindina bathalana rrupiyanydja ŋuriki Yetjippuyŋuwunydja buŋgawawu giŋgu, yurru mukthurruna yana yukurrana ŋunhi Djuwakimdhunydja yätj yana yukurrana djäma‐a‐a, ŋayaŋu‐yätjkuŋala yukurrana Garraynha.