1 Yo, *JerichoDjariku wäŋa djingaryurruna yukurrana, yurru ḻoḻu marrtjina ḻiw'maraŋalanydja ŋorrana ḏälnha mirithirrina ga garrwarnha dhiŋgina, ga dhurrwaranydja ŋurikiy wäŋawuy dhaḻ'‐dhaḻnha yukurrana dhärrana, liŋgu walala ŋunhi yolŋu'‐yulŋunydja mirithinana barrarina †IsraelYitjuralpuyŋuwana. 2 Bala yana Garraynydja ‡JoshuaDjatjuwawala waŋanana bitjarrana, “Dhuwalanydja gay' wäŋa ŋarra nhokalana dhayuŋara; ŋurruŋu buŋgawa ŋunhi ga yolŋu walala nhanbala mala, warrpam'nha yurru nhokalaynha goŋŋuranydja. 3-4 Goḏarrny'tja nhepi ga nhuŋu miriŋu walala boŋguŋu marrtji yukirri ḻiw'maraŋu dhuwalayi wäŋa buṉbu‐mäypamirri Djarikuwuy. Yo, ḏalkarra'mirrinydja walala 7 boŋguŋu marrtji yukirri ŋurruŋu, ŋurru‐warryurru nhumalanha, ga waŋga'‐waŋganydhu yana walala boŋguŋu yukirri gäŋu'‐waŋunydja yiḏakiyinyara goŋdhunydja, ga malthurrunydja boŋguŋu ŋapa‐munguyurrunydja ḏalkarra'mirrinha walalanha marrtji, walala boŋguŋu marrtji gäŋu Dhawu'‐nherraṉminyarawuy Bathinydja. Ga dhuḏikurrunydja wal'ŋu malthurrunydja marrtji walalambala bala ŋunhi goŋ‐garamirrina yolŋu'‐yulŋu bukmaknha. Marrtjinydja boŋguŋu nhuma yukirri ḻiw'maraŋu waŋganymirri, bala yana roŋiyi wäŋalilina, ga biyaku liŋgu nhuma boŋguŋu yukirri yulŋunydja 6 walunydja ŋupurru. Ga wiripuŋuyunydja waluyu ŋuriŋiyinydja, bala yana nhuma boŋguŋu yukirri marrtji ḻiw'yunmaraŋuna ŋunhiyi wäŋa bala'‐mäypamirri bukunydja 7‐mirri, yurru walala ŋurruŋunydja boŋguŋu ḏalkarra'mirri walala ḻoḻthurru marrtji yiḏakiyu. 5 Ga ŋunhi nhuma boŋguŋu dhawar'‐yurrunydja, bala boŋguŋu walalanydja ḏalkarra'mirrinydja bopthurru weyin‐marraŋuna, bo‐o‐op biyaku waŋganymirri, bala dhunupana bukmaktja yolŋu'‐yulŋu wirrkina yatjunmi boŋguŋu, bala yana ŋayi boŋguŋu ŋunha ḻoḻunydja buku‐yapthurruna, ḏaw'‐ḏawyurruna boŋguŋu buku‐yä‐ä‐äp biyakuna. Bala nhuma boŋguŋu yolŋu'‐yulŋunydja gulŋiyina‐wala yana dhunupana, bala buŋuna marrtji boŋguŋu ŋunhiyi wäŋa warrpam'thurruna.” Ga bitjarra yukurrana Garrayyu ḻakaraŋalanydja nhanŋu Djatjuwawu.

6-9 Bala yana ŋayi Djatjuwanydja marrtjinana, bala ḻakaraŋala ŋuripana yolŋu'‐yulŋuwana, bala walalanydja yolŋu'‐yulŋunydja ŋunhi girri'‐ŋamathinana marrtjina, bala walala yana marrtjinana yukurrana ḻiw'‐maraŋalana ŋuliyi wäŋakurruna. Yo, marrtjinanydja walala yukurrana‐a‐a, ḻiw'maraŋalana yanana‐a‐a, ḻoḻthurruna marrtjina ŋuriŋiyi yiḏakiyu ḏalkarra'mirrinydja ŋunhinydja. 10 Yurru yakana walala ŋula dhäruktja waŋana, liŋgu Djatjuwayu waŋana walalanha bitjarra, “Yakana waŋiyanydja waŋgany dhäruk ŋula yurru ŋi', rirrakaymiriw yana mukthurra marrtjiya, yana liŋgu‐u‐u ga ŋarrapi nhumalanha yurru waŋa yatjunarawunydja, bala yatjurra wirrkina.” 11 Yo, marrtjinana‐wala walala ŋunhi yolŋu'‐yulŋunydja, marrtjinana‐a‐a ḻiw'maraŋala ŋuliyi wäŋakurru waŋganymirri yana, bala roŋiyinana wäŋalilina, ga ŋunhilinydja ṉapuŋgany'tja Dhawu'‐nherraṉminyarawuy Bathi marrtjina gäŋala ŋuriŋiyi ḏalkarra'mirriyu walalay.

12-14 Ga bitjarra liŋgu yana wiripuŋuyunydja waluyu walala marrtjina yukurrana ḻiw'maraŋala‐a‐a, ḻoḻthurruna marrtjina ŋuriŋi yiḏakiyu, ga balayi roŋiyina wäŋalili. Bitjarrayinydja walala yukurrana 6 walunydja ŋupara, 15 ga ŋuriŋinydja waluyu wiripuŋuyunydja walala gaŋga'‐gaŋgathina djaḏaw'yunarayuna be walumiriwyu yana, bala marrtjina yukurrana ḻiw'maraŋala buku‐7‐mirri ŋunhiyi wäŋanhanydja, ḻiw'maraŋala marrtjina yukurrana‐a‐a, yana liŋgu‐u‐u ga dhawar'yurruna.

16 Bala ŋayi Djatjuwayu waŋana bitjarrana, “Ma' yatjunmiyana walala, dhä‐rur'thurrana yiŋgathiyanydja bukmak, liŋgu Garrayyu liŋguna wekaŋalana dhuwalayi wäŋanydja ŋilimurruŋgalana. 17 Dhuwalanydja gay' wäŋa ga nhä malanha dhiyalami ŋorra marrtji nhanŋuway Garraywu yana bukmak, yaka ŋula nhumalaŋgunydja. Nhuma yurru yana gurthayuna dhuŋgur'yurranydja bukmak nhä malanha, bala baymatthurrana dhawar'maraŋana bukmaknhana yolŋunhanydja, bili walala dhuwalayinydja yätjmirrina dhikana gal'ŋu yana. Yurru walŋakuŋanydja nhuma yurru waŋganynha ŋunha dhäykanha §RahabRayapnha yäkunha ga ŋunhinha walalanha ŋunhi walala nhina yukurra nhanukala wäŋaŋura waŋganyŋura. Ŋayi muka ŋunhi, ŋuriŋiyi miyalkthu walŋakuŋala ŋilimurruŋgu mel'ŋunhanydja maṉḏanha, bala nhumanydja yurru walŋakuŋa ŋanyana. 18 Yaka walala djaw'yurranydja ŋula nhä nhuŋuwaynydja nhe, ŋula nhä mel‐ŋamathiya. Gonha'yurra nhäŋa, liŋgu bukmak ŋunhiyi nhänydja malanha nhuma yurru dhuŋgur'yun nhanŋuwaynha Garraywuna. Ŋuli nhe yurru djaw'yun ŋula nhä nhuŋuwayliliyamanydja, ŋayinydja yurru Godthunydja marina‐wekama ŋutu'na ŋilimurruŋgu Yitjuralpuyŋuwunydja miṯtjiwu. 19 Nhuma yurru yana märraŋanydja bulayi' malanha ga garwarrwarr'mirri girri' malanha, bala gäŋana lili Godkalaŋuwuna Buṉbuwu. Ga wiripunydja malanha yana gonha'yurrana, liŋgu bukmak nhä malanha ŋunhiyi nhanŋuway yana Godku ŋunhi yulŋunydja.” Bitjarrayina yukurrana ŋayi Djatjuwayu ḻakaraŋalanydja walalaŋgu ŋäthili muka yana.

20-21 Yo, wäŋgaŋalana walala yukurrana ḻiw'maraŋalana ŋunhiyi wäŋanha buku‐7‐mirri, bala yana walala ḏalkarra'mirrinydja walala bo'yurrunana yiḏakiyuna bena wirrkina, bo‐o‐op bitjarra, bala bukmaktja yolŋu'‐yulŋu yatjunminana, yiŋgathinana bena dhikana wal'ŋu. Bala ŋayinydja marrtjina dhunupa ḻoḻunydja ŋunhiyi buku‐yapthurrunana gay', ḏaw'‐ḏawyurrunana bukmaknha, ga yolŋu'‐yulŋunydja bukmaknha ŋunhi gärrinana‐wala dhunupana yanana. Bumarana marrtjina walala wäŋanydja ŋunhinydja ḏaw'‐ḏawyurrunana, ga ŋuriŋiyi walalaŋgala mandjawakthunydja walala bumarana marrtjina yolŋu'‐yulŋunha ga wäyinnha walalanha, yana liŋgu ga dhawar'maraŋala, baḏuwaḏuyurruna warrpam'.

22 Yurru ŋayi Djatjuwanydja waŋana ŋurikala märrma'wala mel'ŋuwala maṉḏakala bitjarra, “Gatjuy marrtjiya maṉḏa ŋurukala wäŋalili dhäykawala, ŋunhi ŋayi nhumalanha yawungu walŋakuma. Märraŋanydja ŋanyapinyay ga nhanŋu gurruṯu'mirrinha, bala gäŋana lili walalanha walŋamirrinha yana, biyaka yana liŋgu bitjarra nhuma ŋunhi ŋäthili dhawu'‐nherrara ŋanya.” 23 Yuwalkthi maṉḏanydja marrtjinana‐wala yana ŋunhiyi ḏarramunydja maṉḏa, ga garr'yurruna ŋanya ga nhanŋu gurruṯu'mirrinha walalanha, bala yana gäŋalana lili Yitjuralpuyŋuwalana wäŋalili ŋunhimalana.

24 Ga ŋuliŋurunydja dhurrwaraŋuru walala dhuŋgur'yurrunana ŋunhiyi wäŋanydja bukmaknha, yurru yakana walala bathara ŋunhiyi bulayiny'tja ga garwarrwarr'mirri girri', yana walala marrtjina djoṉguŋalana ŋunhiyinydja malanha warrpam'thurrunana, bala gäŋalana lili, bala yana gurrunharana ŋunhimalayina Godkalana Buṉbulili. 25 Yo, ḏul'yurrunanydja walala ŋunhiyi marrtjina bukmakkuŋalana, yurru ŋunhiyinha miyalknha Rayapnhana walala walŋakuŋalanydja, liŋgu ŋayi djuḻuḻ'maraŋala maṉḏanha ŋunhi mel'ŋunha maṉḏanha, walŋakuŋala maṉḏanha. Ga ŋuliŋurunydja dhurrwaraŋuru ŋayipi ŋunhiyi dhäyka ga gurruṯu'mirri walala nhanŋu nhinanana yukurrana ŋunhiliyina malaŋura Yitjuralpuyŋuwalana.

26 Ga ŋuliŋurunydja dhäŋuru Djatjuwayu waŋana bitjarra, “Dhipuŋurunydja dhurrwaraŋuru gay' yakana yurru ŋula yolthu dhuḻ'yun biyapulnydja wäŋa dhuwalayi. Ga ŋuli yurru ŋayi ŋula yolthu dhuḻ'yundja dhuwalayi wäŋa, nhanŋunydja yurru walkur maḻamarrnydja rakunydhirrina, ga bitjandhi liŋgu yurru malpuranydja nhanŋu yothu dhuḏiŋunydja rakunydhirriyi yana.”

27 Yo, galki yana Godtja Djatjuwawala, guŋga'yurruna marrtjina ŋanya, gäŋala yukurrana ŋanya bitjarra liŋgu, ga bukmakthunydja yolŋu'‐yulŋuyu ŋunhiliyi ḻiw'maraŋala ŋuliwitjarrayi wäŋakurru ŋäkulana nhanukalaŋuwuy, bala yana wirrkina walala beyaṉiyinanydja nhanŋu Djatjuwawunydja.