1 ታኒ ኔና ፆሳ ሲንꬃኒኔ፥ ካዎ ጊዲዲ ሃራናው ቆንጪያ ዎዴ ፓፃታኔ ሃይቂዳይሳታ ፒርዳናው ዴዒያ ኪሪስቶስ ዬሱሳ ሲንꬃን ዞራይስ። 2 ቃላ ኦዳ፤ ዎዴይ ኢንጄቲን ኢንጄቶና ኢፂን ሚናዳ ኦዳ። ዳሮ ዳንዳዓኒኔ ታማርሶን ኣሳ ዞራ፥ ሴራኔ ዴንꬄꬃ። 3 ኣሳይ ቱማ ቲሚርቲያ ሲዖና ኢፂያ ዎዴይ ያና። ኤንቲ ባንታ ኣሙዋ ካሊዲ፥ ባንታው ሲዓናው ኡፋይሲያባ ኦዲያ ኣስታማሬታ ሺሾሶና። 4 ኤንቲ ቱማ ቲሚርቲያ ኣጊዲ፥ ቱማ ጊዶና ኦዳ ሲዓናው ባንታ ሃይꬃ ዛሮሶና። 5 ሺን ኔኒ ኡባባን ኔና ሃራ። ሜቱዋ ዳንዳዓ። ዎንጌላ ማርካቴꬃ ኦሱዋ ኦꬃ። ኔው ኢሜቲዳ ፆሳ ኦሶ ኡባ ፖላ።

6 ታኒ ያርሼቲያ ዎዴይ ጋኪስ፤ ሃ ኣላሚያ ኣጋዳ ቢያ ዎዴይ ማቲስ። 7 ታኒ ሎዖ ኦላ ኦሌታስ፤ ታ ጋዲያ ዎፃዳ ዉርሳስ፤ ኣማኑዋ ናጋስ። 8 ሲንꬃፌ ፂሎቴꬃ ካላቻይ *ፂሎቴꬃ ካላቻይ፡ ፂሎቴꬃ ዴዖ ጊሾ ታ ኤካና ካላቻ። ፂሎቴꬃ ታው ካላቻ ኦꬂዲ ኢሜስ ጉሱ። ታና ናጌስ። ሄሳ ፂሎ ፒርዳ ፒርዲያ ጎዳይ ሄ ጋላስ ታው ኢማና። ሄሳ ታ ፃላላስ ጊዶናሺን ኢያ ቆንጬꬃ ኣሞቲያ ኡባስ ኢማና።

9 ኤሌሳ ያዳ ታና ቤዓ። 10 ዴማሲ ሃ ኣላሚያን ዴዒያባታ ዶሲዲ፥ ታና ኣጊዲ፥ ቴሴሎንቄ ካታማ ቢስ። ቄርቂሲ ጋላቲያ ቢታ፥ ቃሲ ቲቶይ ዲልማፂያ ቢታ ቢስ። ቆላ 4፡14፤ ፊልሞ 24፤ 2ቆሮ 8፡23፤ ጋላ 2፡3፤ ቲቶ 1፡4 11 ሉቃሳ ፃላሊ ታራ ዴዔስ። ማርቆሲ ፆሳ ኦሶን ታና ማዳናው ዳንዳዒያ ጊሾ ኔራ ኤካዳ ያ። ቆላ 4፡14፤ ፊልሞ 24፤ ሃ.ኦ 12፡12፣ 25፤ 13፡13፤ 15፡37-39፤ ቆላ 4፡10 12 ታኒ ቲኪቆሳ ኤፌሶና ካታማ ኪታስ። ሃ.ኦ 20፡4፤ ኤፌ 6፡21-22፤ ቆላ 4፡7-8 13 ኔኒ ያሼ፥ ፂሮዓዳ ካታማን ካርፖሳ ማታን ኣጋዳ ዪዳ ታ ኮቲያኔ ማፃፋታ ታው ኤካዳ ያ። ኡባካ ጋልባን ፃፌቲዳ ማፃፋታ ኤኮና ዮፓ።

14 ቢራታ ቆፂያ ኢስኪንዲሬይ ታና ዳሮ ቆሂስ፤ ጎዳይ ኢያ ኦሱዋዳ ኢያው ዛራና። 1ፂሞ 1፡20፤ ማዝ 62፡12፤ ሮሜ 2፡6 15 ኢ ኑ ቲሚርቲያ ዳሮ ኢፂያ ጊሾ ኢያፔ ኔና ናጋ።

16 ኮይሮ ታ ሞቴቲያ ዎዴ ኡባይ ኣጊዲ ቢዶሶናፔ ኣቲን ኦኒካ ታና ማዲቤና። ፆሳይ ሄ ባላ ኤንታው ታይቦፖ። 17 ሺን ታኒ ኩሜꬃ ኪታ ኣይሁዴ ጊዶና ኣሳ ኡባስ ማርካቲን፥ ኤንቲ ሲዓና ሜላ ጎዳይ ታ ማታን ኤቂዲ ታው ዎልቃ ኢሚስ። ቃሲ ኮሻቲዳ ጋሞዳ ዶና ዶዪዳ ሃይቁዋፔ ታና ኣሺስ። 18 ጎዳይ ታና ኢታ ኡባፌ ኣሺዲ ባ ሳሎ ካዎቴꬃ ሳሮን ኤፋና። ኢያው ሜሪናፔ ሜሪና ጋካናው ቦንቾይ ጊዶ። ኣሚንዒ።

19 ጲሪስቂላስ፥ ኣቂላሲኔ ኣኔስፎራ ሶ ኣሳስ ታ ሳሮꬁዋ ኦዳ። ሃ.ኦ 18፡2፤ 2ፂሞ 1፡16-17 20 ኤራስፆሲ ቆሮንቶሳ ካታማን ኣቲስ። ፂሮፊሞሲ ሃርጌቲዳ ጊሾ ሚሊፄ ካታማን ኣጋስ። ሃ.ኦ 19፡22፤ ሮሜ 16፡23፤ ሃ.ኦ 20፡4፤ 21፡29 21 ባልጎይ ጌላናፔ ሲንꬄ ኤሌሳዳ ያ።

ኤዉቡሉሲ፥ ጱዴሲ፥ ሊኑሲ፥ ቂላዴይኔ ሃራ ኣማኒያ ኣሳቲ ኡባይ ኔና ሳሮ ሳሮ ጎሶና።

22 ጎዳይ ዬሱስ ኪሪስቶሲ ኔ ኣያናራ ጊዶ።

ፆሳ ማሮቴꬃይ ሂንቴ ኡባራ ጊዶ።