28
ዬሱሳ ሃይቆፔ ዴንዱዋ
(ማር 16፡1-10፤ ሉቃ 24፡1-12፤ ዮሃ 20፡1-10)
1 ሳምባቲ ኣꬊን ዎጋ ዎዴ ዎንታ ጉራ፥ ማግዴላ ማይራማኔ ሃንኮ ማይራማ ዬሱሲ ሞጌቲዳ ጎንጎሉዋ ቤዓናው ቢዶሶና። 2 ቆፖና ዎልቃማ ቢታ ቃፆይ ሃኒስ። ጎዳ ኪታንቾይ ሳሎፔ ዎꬊዲ ዱፉዋ ዶናን ዴዒያ ሹቻ ጎንዶርሲዲ ኢያ ቦላ ኡቲስ። 3 ኢያ ማላይ ዎልዓንꬂ ዳኔስ። ኢያ ማዖይካ ሻቻዳ ቦꬂ። 4 ናጌይሳቲ ኪታንቹዋ ቤዒዲ፥ ያሻን ኮኮሪዲ፥ ሃይቂዳ ኣሳዳ ሃኒዶሶና።
5 ኪታንቾይ ማጫሳታኮ፥ «ሂንቴ ማስቃሊያ ቦላ ካቄቲዳ ዬሱሳ ኮዬይሳ ታኒ ኤሪያ ጊሾ ያዮፊቴ። 6 ኢ ካሴ ኦዲዳይሳ ሜላ ሃይቆፔ ዴንዲስ፤ ሃይሳን ዴና። ሃ ዪዲ ኢያ ዚንዒሲዳ ቤሳ ቤዒቴ። 7 ሂንቴ ሃዒ ኤሌሲ ቢዲ፥ ኢያ ታማሬታስ፥ ‹ዬሱሲ ሃይቆፔ ዴንዲስ። ቃሲ ኢ ሂንቴፌ ሲንꬃቲዲ ጋሊላ ባና፤ ሂንቴ ኢያ ያን ቤዓና› ያጊዲ ኦዲቴ። ታኒ ሂንቴው ሃይሳ ኦዳናው ያስ» ያጊስ።
8 ኤንቲ ያዪሼኔ ዳሮ ኡፋይቲሼ፥ ዱፉዋ ማታፔ ኤሌሲዲ ቢዲ፥ ኢያ ታማሬታስ ኦዳናው ዎፂዶሶና።
9 ቆፖና ዬሱሲ ኤንታራ ጋሄቲዲ ኤንታኮ፥ «ሳሮይ ሂንቴው ጊዶ» ያጊስ። ኤንቲ ኢያኮ ሺቂዲ፥ ኢያ ቶሁዋ ኦይኪዲ ኢያው ጎይኒዶሶና። 10 ሄ ዎዴ ዬሱሲ ኤንታኮ፥ «ያዮፊቴ፤ ቢዲ ታ ታማሬቲ ጋሊላ ባና ሜላ ኤንታው ኦዲቴ። ኤንቲ ያን ታና ቤዓና» ያጊስ።
11 ሄ ማጫሳቲ ቢሺን፥ ዱፉዋ ናጊያ ዎታዳሬታፔ ባጋቲ ካታማ ቢዲ፥ ሃኒዳባ ኡባ ካሂኔ ሃላቃታስ ኦዲዶሶና። 12 ካሂኔ ሃላቃቲኔ ጪማቲ ሺቂዲ ዞሬቲዲ፥ ዎታዳሬታስ ዳሮ ሚሼ ኢሚዲ፥ 13 « ‹ኑኒ ꬊስኪዳሺን ኢያ ታማሬቲ ቃማ ዪዲ፥ ኢያ ኣሃ ካይሲዶሶና› ያጊቴ። 14 ሃ ኦዳ ዴሪያ ሃሬይሲ ሲዒኮ፥ ሄሲ ሂንቴ ባላ ጊዶናይሳ ኑኒ ኢያ ኦዲ ኣማንꬃና። ሂንቴና ኣይቢካ ሂርጊሶፖ» ያጊዶሶና።
15 ዎታዳሬቲ ሚሺያ ኤኪዲ፥ ኪቴቲዳይሳዳ ኦꬂዶሶና። ሃ ኦዳይ ኣይሁዴ ማታን ሃቺ ጋካናው ኦዴቲሼ ዴዔስ።
ዬሱሲ ባ ታማሬታስ ቆንጪስ
(ማር 16፡14-18፤ ሉቃ 24፡36-49፤ ዮሃ 20፡19-23፤ ሃ.ኦ 1፡6-8፤ 1ቆሮ 15፡3-8)
16 ታማኔ ኢሲ ኢያ ታማሬቲ ዬሱሲ ባንታና ቢቴ ጊዳ ጋሊላ ዴሪያ ቦላ ቢዶሶና። ማቶ 26፡32፤ ማር 14፡28 17 ያን ኤንቲ ኢያ ቤዒዳ ዎዴ ኢያው ጎይኒዶሶና፥ ሺን ኤንታፌ ኢሶቲ ኢሶቲ ሲꬊዶሶና።
18 ዬሱሲ ኤንታኮ ሺቂዲ፥ «ሳሎኒኔ ሳዓን ማቲ ኡባይ ታው ኢሜቲስ። 19 ሂዛ፥ ሂንቴ ኡባ ቤሲ ቢዲ፥ ኣዋ፥ ናዓ፥ ጌሻ ኣያና ሱንꬃን ኣሴ ኡባ ፃማቂዲ ታና ካሌይሳታ ኦꬂቴ። ሃ.ኦ 1፡8 20 ታኒ ሂንቴና ኪቲዳባ ኡባ ኤንቲ ናጋና ሜላ ኤንታ ታማርሲቴ። ታኒ ዎዲያ ዉርሴꬃ ጋካናው ኡባ ዎዴ ሂንቴራ ዴዓይስ» ያጊስ።