14
ዳዊታ ሶ አሳ
(2 ሳሜ 5:11-16)
1 ፅሮሳ ካዎይ ክራም ዳዊታስ ጋꬎ ኬፃና መላ ኪተትያ አሳታ፥ ሹቹ ማሰይሳታነ አናፀታ ዝጋ ምꬃራ የድስ። 2 ጎዳይ እስራኤለ ቦላ እያ ካዎ ኦꬅድ ምንꬅዳይሳነ ባ አሳ እስራኤለ ግሾ እያ ካዎተꬃ ቦንችዳይሳ ዳዊቲ ኤርስ።
3 ሄሳፈ ጉየ፥ ዳዊቲ የሩሳላመን ሀራ ማቾ ኤክድ አደ ናይታነ ማጫ ናይታ የልስ። 4 ዳዊቲ የሩሳላመን የልዳ አደ ናይት ሳሙሳ፥ ሶባባ፥ ናታና፥ ሶሎሞነ፥ 5 ይብሃራ፥ ኤልሱአ፥ ኤልፋላፃ፥ 6 ኖጋ፥ ናፈጋ፥ ያፋያ፥ 7 ኤልሳማ፥ ኤልዳና፥ ኤልፋላፃ።
ዳዊቲ ፍልስፄመታ ፆንስ
(2 ሳሜ 5:17-25)
8 ዳዊቲ እስራኤለ ኡባ ቦላ ካዎ ግድድ ትየትዳይሳ ፍልስፄመት ስእዳ ዎደ ኡባይ ዳዊታ ኦልድ ኦይካናዉ ከይዶሶና። ዳዊቲ ሄሳ ስእድ ኤንታራ ኦለታናዉ ከይስ። 9 ፍልስፄመት ራፋይመ ዛንጋራ ይድ ኦይክዶሶና። 10 ዳዊቲ፥ “ታኒ ፍልስፄመታ ኦሎ? ኔኒ ኤንታ ታዉ አꬃ እማኔ?” ያግድ ፆሳ ኦይችስ።
ጎዳይ፥ “ባዳ ኦላ፤ ታኒ ኤንታ ነዉ አꬃ እማና” ያግስ።
11 ዳዊቲነ እያ አሳይ ባአል-ፓራስመ ጌተትያ በሳ ብድ ያን ኤንታ ፆንዶሶና። ዳዊቲ፥ “ሃꬅ ꬉስድ ከየይሳዳ ፆሳይ ታ ሞርከታ ግዶራ ታና ካንꬅስስ” ያግስ። ሄ በሳ ሱንꬃይ ባአል-ፓራስመ ጌተትስ። 12 ፍልስፄመት ባንታ ኤቃታ ሄ በሳን የግድ ብን፥ ዳዊቲ ኪትድ ኤንታ ኤቃታ ፁግስስ።
13 ፍልስፄመት ዛር ሄ ዛንጋራ ይድ ኦልዶሶና። 14 ዳዊቲ ፆሳ ዛሪድ ኦይችስ። ፆሳይ፥ “ኤንታ ጉየራ ዩያ አꬋዳ ዎላ ማታን ኤቃዳ ኦላፐ አትሽን፥ ስንꬃ ባጋራ ከዮፓ። 15 ዎላ ሁጰን ሳልፐ ግርስ ኔኒ ስእያ ዎደ ኦላናዉ ከያ። ሄስ ፍልስፄመ ኦላንቾታ ሾጫናዉ ፆሳይ ኔፐ ስን አꬍዳይሳስ ማላ” ያግስ። 16 ፆሳይ ኪትዳይሳዳ ዳዊቲ ኦꬅስ። ጋባኦናፐ ገዘራ ጋካናዉ እስራኤለ አሳይ ፍልስፄመ ኦላንቾታ ዎꬍዶሶና። 17 ዳዊታ ሱንꬃይ ቢታ ኡባ ጋክስ። ካዎተꬃ ኡባይ ዳዊታስ ያያና መላ ጎዳይ ኦꬅስ።