1 ዳዊቲ ሻላቃታራነ ማቶ ሀላቃታራ ዞረትስ። 2 እስራኤለ አሳ ኡባ፥ “ህንተዉ ሎኦ ዳንያባ ግድኮነ ጎዳ ኑ ፆሳ ሸነ ግድኮ፥ እስራኤለ ቢታ ጋፃን ደእያ ኑ ዳቦት፥ ሄሳዳካ ባንታ ካታማታንነ ሄንꬃ በሳታን ደእያ ካህነትነ ሌወት ኑኮ ሺቃና መላ አሰ ኪቶስ። 3 ሳኦላ ካዎተꬃ ዎደ ቀል ጌተትዳ ኑ ፆሳ ታቦትያ አነ ዛሪድ ኤሆስ” ያግስ። 4 ዳዊታ ኦዳይ ሎኦ ግድዳ ግሾ አሳ ኡባይ ማእስ።

5 ሄሳ ግሾ፥ ዳዊቲ ፆሳ ታቦትያ ቅርያት-ይኣርመፐ ኤሀና መላ ግብፀ ዛዋፐ ዶምድ ሀማታ ፕኖ ጋካናዉ ደእያ እስራኤለ አሳ ኡባ ሺሽስ። 6 ዳዊቲነ እስራኤለ አሳ ኡባይ ክሩበታፐ ግዶን ባ አራታ ቦላ ኡትዳ ጎዳ ሱንꬃይ ፄገትዳ ፆሳ ታቦትያ ኤሀናዉ ይሁዳ ቢታን ደእያ ባላ ጌተትያ ቅርያት-ይኣርማ ብዶሶና። 7 ፆሳ ታቦትያ ኦራꬃ ፓራ ጋረን ዎꬅድ፥ አምናዳበ ሶፐ ኤህዶሶና፤ ኦዝነ አህዮይ ጋርያ ላጎሶና። 8 ዳዊቲነ እስራኤለ አሳ ኡባይ ዲꬅነ ማስንቆ ካእሸ፥ ካራቦ ባቅሸ፥ ዳላ ጊርስሸ፥ ዛየ ፑንሸ ባንታ ኩመꬃ ዎልቃን ፆሳ ስንꬃን ኡፋይትድ፥ የፅሸ ፆሳ ቦንችዶሶና።

9 ኤንቲ ክዶና ዉዱማ ጋክያ ዎደ ቦራት ꬉበትዳ ግሾ ኦዝ ታቦትያ ኦይካናዉ ባ ኩሽያ የድስ። 10 ኦዛ ኩሸይ ታቦትያ ቦችዳ ግሾ፥ ጎዳ ሀንቆይ ኦዛ ቦላ ኤፅስ። ሄሳ ግሾ፥ ጎዳይ እያ ፃድክን፥ እ ሄ በሳን ፆሳ ስንꬃን ሀይቅስ።

11 ጎዳይ ሀንቀትድ ኦዛ ዎꬍዳ ግሾ፥ ዳዊቲ ይሎትስ። ሀች ጋካናዉ ሄ በሳይ ኦዝ ꬉከትዳ በሳ ጌተቴስ። 12 ሄ ጋላስ ዳዊቲ ፆሳ ያይዳ ግሾ፥ “ፆሳ ታቦትያ ታኮ ዋታ ኤሀናዉ ዳንዳእያና?” ያግስ። 13 ዳዊቲ ታቦትያ የሩሳላመ ኤፋናፐ ግድ ጋተ አድያ አብዳራ ሶ ኤፍስ። 14 ፆሳ ታቦተይ አብዳራ ሶን እያ ሶ አሳራ ሄꬑ አጌና ጋምእስ። ጎዳይ እያ ሶ አሳነ እያዉ ደእያ ኡባ አንጅስ።