1 ዳዊቲ ቂሳ ናኣ ሳኦላፐ ባቃትድ ፅቅላጋን ኡትዳ ዎደ እያኮ ይዳ አሳት ሀይሳፈ ካልድ ፃፈትዳይሳታ። ኤንታ ካሰ ዳዊታ ኦላን ማድዳ ምኖ አሳታ ግዶን ደኦሶና። 2 ኤንቲ ዶንገን ዱከይሳታ፤ ቃስ ኡሻቻ ኩሸንነ ሀድርሳ ኩሸን ያምባራናዉነ ዶንገ ዱካናዉ ዳንዳኦሶና። ኤንቲ ብንያመ ኮቸ ግድዳ ሳኦላ ኮቻታ። 3 ኤንታ ሀላቃይ አህኤዘራ፤ እያፐ ካልድ እዮኣሳ፤ ኤንቲ ግብአ አድያ ሻማአ ናአ።

ሀራት ቃስ አዝማወ ናይታ ግድዳ ይዝኤላነ ፓላፃ፥ ባራካ፥ አናቶተ አድያ እዩ፥ 4 ሀስታማታ ግዶን ዎልቃማ ግድድ፥ ኤንታ ካለꬅያ ጋባኦና አድያ ይሽማእያ፥ ኤርምያሳ፥ ያሀዝኤላ፥ ዮሃና፥ ገዳራ አድያ ዮዛባታ፥ 5 ኤሉዛያ፥ ያርሞታ፥ ባላያ፥ ሳማራ፥ ሀርፋ አድያ ሳፋፃ፥ 6 ቆረ ኮቸ ግድዳ ኤልቃና፥ ይሽያ፥ አዛርኤላ፥ ዮኤዘራነ ያሾብኣማ፥ 7 ጋዶራ አድያ ይሮሃማ ናይታ ዮኤላነ ዛባዳ።

8 ዳዊቲ ባዞን ደእያ ሚፃን ደእሽን፥ ጋደ ኮቻፈ ጉꬃ አሳት እያኮ ይዶሶና። ኤንቲ ምኖነ ኦላስ ጊግዳይሳታ፤ ጎንዳለነ ቶራ ኦይካናዉ ዳንዳኤይሳታ። ኤንታ ሶምኦይ ጋሞ ሶምኦ መላ፤ ኤንቲ ደረ ሁጰራ ጉፕያ ገንኤ መላ ኤሶቶሶና። 9 ኤንታ ሀላቃይ ኤፀራ፤ ናምአንꬆይ አብድዩ፤ ሄꬓንꬆይ ኤልኣባ፤ 10 ኦይዳንꬆይ ምስማና፤ እቻሻንꬆይ ኤርምያሳ፤ 11 ኡሱፑንꬆይ አታያ፤ ላፑንꬆይ ኤልኤላ፤ 12 ሆስፑንꬆይ ዮሃና፤ ኡዱፉንꬆይ ኤልዛባዳ፤ 13 ታማንꬆይ ኤርምያሳ፤ ታማነ እሳንꬆይ ማክባናያ። 14 ሀይሳቲ ጋደ ኮቻ ኦላንቾታስ ሀላቃታ። ኤንታፈ ዝቃይ ማቶ ሀላቃ፤ ꬎቃይ ቃስ ሻላቃ ግድስ። 15 ዮርዳኖሰ ሻፋይ፥ ጋፃፐ ጋፃ ጋክድ ክፅዳ ኮይሮ አጌናን ፕንዳይሳት ሀይሳታ። ኤንቲ ዛንጋራን ዶሎሀነ ዉሎሀ ባጋን ደእያ አሳ ኡባ የደꬅዶሶና።

16 ብንያመ ኮቻፈነ ይሁዳ ኮቻፈ ጉꬃ አሳት ዳዊቲ ደእያ ሚፃ ብዶሶና። 17 ዳዊቲ ኤንታራ ጋሄታናዉ ከይድ፥ “ህንተ ታና ማዳናዉ ሳሮ ታኮ ይዳባ ግድኮ ታ ዎዛናይ ህንተራ ግዳና። ሽን ህንተ ታና ታ ሞርከታስ አꬅድ እማናዉ ይዳባ ግድኮ፥ ህንተና ኤርተ! ታኒ ኦꬅዳ ኢታባይ ባይና ግሾ ኑ አዋታ ፆሳይ ሄሳ በኦ፤ እ ህንተና ፕርዶ!” ያግስ።

18 ሄሳፈ ጉየ፥ ሀስታማታ ሀላቃ አማሳያ ቦላ ፆሳ አያናይ ዎꬍን፥

19 ዳዊቲ ፍልስፄመታራ ግድድ ሳኦላ ኦላናዉ ብዳ ዎደ፥ ምናሰ ኮቻፈ ጉꬃ አሳት ዳዊታራ ጋሄትዶሶና። ሽን ፍልስፄመታ ሀላቃት ዳዊቲነ ዳዊታ አሳይ ባንታራ ቦናዳ ድግዶሶና። ዳዊቲነ ዳዊታ አሳይ፥ ኤንታ ካዋ ሳኦላስ አꬅድ እማነኮ ግድ ያይዳ ግሾ ፍልስፄመት ዞረትዳፐ ጉየ ኤንታ ጉየ ዛርዶሶና። 20 ዳዊቲ ፅቅላጋ ስምዳ ዎደ ምናሰ ኮቻፈ ዳዊታ ማዳናዉ ከይዳ አሳት አድና፥ ዮዛባታ፥ ይድኤላ፥ ምካኤላ፥ ዮዛባታ፥ ኤልሀነ ፅልታያ። ሀይሳቲ ካሰ ምናሰ ቢታን ሻላቃ። 21 ኤንቲ ኡባይ ምኖነ ዎልቃማ አስ ግድያ ግሾ ዳዊቲ ዙግድ ኦልያ አሳ ኦልድ እያ ማድዶሶና። 22 ዳዊቲ ኦላንቾት፥ ፆሳ ኦላንቾዳ ዳራና ጋካናዉ እያ ማድያ አሳይ ጋላስ ጋላስ ጉዠቴስ።

23 ጎዳይ እያዉ ግዳይሳዳ ሳኦላ ካዎተꬃ ዳዊታኮ ዛራናዉ ዳንጨትድ ዳዊታኮ ከብሮና ብዳ ኦላንቾታ ታይቦይ ሀይሳፈ ካልድ ፃፈትዳይሳታ። 24 ጎንዳለነ ቶራ ኦይክድ ኦላስ ጊግዳ ይሁዳ ኮቻይ 6,800. 25 ስሞና ኮቻፈ ኦላስ ጊግዳ ምኖነ ዎልቃማ ኦላንቾት 7,100. 26 ሌወ ኮቻፈ 4,600. 27 አሮና ኮቻ ሀላቃይ ዮዳሄ፤ ዮዳሄራ እስፈ 3,700 አሳት ደኦሶና። 28 ሳዶቅ ናአተꬅ፥ ምኖነ ዎልቃማ አስ፤ ሳዶቃ ሶ አሳፐ ላታማነ ናምኡ ሀላቃት እያራ ደኦሶና። 29 ብንያመ ኮቸ ግድዳ ሳኦላ ዳቦት 3,000. ሽን ብንያመ ኮቻፈ ዳርያ ባጋይ ሳኦላ ሶ አሳስ ሄ ዎደ ጋካናዉ አማነትዶሶና። 30 ኤፍሬማ ኮቻፈ ባንታ ሶ አሳን ኤረትዳ ምኖነ ዎልቃማ አሳት 20,800. 31 ዳዊታ ካዎያናዉ ባናዉ ዶረትዳ ምናሰ ኮቻፈ ባጋት 18,000. 32 እስራኤለ አሳይ አይ ኦꬃናዉ በሲያኮ ዎድያባ ሻክድ ኤርያ አኬካንቾ አሳት፥ ይሳኮራ ኮቻ ሀላቃት፥ ናምኡ ፄታ፤ ኤንታ ዳቦት ኡባይ ኤንታዉ ኪተቶሶና። 33 ኦላ ሚሸ ኡባ ኦይክድ ባንታ ኩመꬃ ዎዛናን ዳዊታ ማዳናዉ ጊግዳ ኦላንቾታን ዛብሎና ኮቻይ 50,000. 34 ንፍታለመ ኮቻፈ 1,000 ሀላቃትነ ጎንዳለነ ቶራ ኦይክያ 37,000 አሳት ኤንታራ ደኦሶና። 35 ዳነ ኮቻፈ ኦላስ ጊግዳ አሳት 28,600. 36 ኦላስ ከያናዉ አሴራ ኮቻፈ ጊግዳ አሳት 40,000. 37 ዮርዳኖሰ ሻፋፐ ሄፍንꬃ ዶሎሀ ባጋን ደእያ ሮቤላ ኮቻፈ ጋደ ኮቻፈነ ምናሰ ኮቸ ባጋፈ ኦላ ሚሸ ኡባ ኦይክድ ይዳ አሳት 120,000.

38 ሀ ኡባ ኦላንቾት ዳዊታ እስራኤለ ቦላ ካዎꬃናዉ ባንታ ቆፋ ቃችድ፥ ከብሮና ካታማ ይዶሶና። ቃስ እስራኤለፐ አትዳይሳት ዳዊታ ካዎꬃናዉ እስ ዎዛናን ግድዶሶና። 39 ኤንታ ዳቦት ኤንታዉ ኮሽያባ ጊግስዳ ግሾ ምሸነ ኡይሸ ዳዊታራ ሄꬑ ጋላስ ኡትዶሶና። 40 እስራኤለ አሳስ ኡፋይስ ግድያ ግሾ፥ ፑደሀ ባጋን ደእያ ይሳኮራፐ፥ ዛብሎናፐነ ንፍታለመፐ ዳሮ አሳይ ꬊለ፥ ባላሰ ኑካ፥ ዎይነ ቴራ፥ ዎይነ ኡሹነ ዛይተ ሀረን፥ ባቁሎን፥ ግማለንነ ቦራን ጫንድ ኤህዶሶና፤ ቃስ ኤንቲ መሄነ ዶርሰ ሹክድ ማናዉ ኤህዶሶና።