1 ሄሳፈ ጉየ፥ እስራኤለ አሳ ኡባይ እስፈ ከብሮናን ደእያ ዳዊታኮ ብድ፥ “ኑኒ ነ ሱꬁነ ነ አሾ። 2 ካሰ ሳኦል ካዎ ግድድ ደእያ ዎደካ፥ እስራኤለ አሳ ኦላስ ካለꬅዳይ ነና። ጎዳይ ነ ፆሳይ፥ ‘ታ አሳ እስራኤለ ኔኒ ሄማና፤ ኤንታ ቦላ ኔኒ ካዎታና’ ” ያግስ። 3 እስራኤለ ጭማት ኡባይ ካዋ ዳዊታኮ ይዳ ዎደ እ ኤንታራ ከብሮናን ጎዳ ስንꬃን ጫቅስ። ጎዳይ ሳሜላ ባጋራ ኦድዳ ቃላዳ ዳዊቲ እስራኤለ ቦላ ካዎታናዳ ኤንቲ እያ ትይዶሶና።

4 ዳዊቲነ እስራኤለ አሳ ኡባይ የሩሳላመ ካታማ ብዶሶና። ሄ ዎደ ያቡሰ አሳይ ሄ በሳን ደእያ ግሾ ሄ ካታማይ ያቡሰ ጌተቴስ። 5 ያቡሰት ዳዊታኮ፥ “ኔኒ ሀ ካታማ ገላናዉ ዳንዳአካ” ያግዶሶና። ግዶሽን፥ ዳዊቲ ፅዮነን ደእያ ኤንታ ሚፃ ኦይክን፥ ፅዮነይ ዳዊቲ ካታማ ጌተትስ። 6 ዳዊቲ ባ ኦላንቾታ፥ “ያቡሰታ ኮይሮትድ ኦልያ ኦንካ ቶራ ሞጮና ግዳና” ያግስ። ፃሩያ ናአይ እዮኣብ ኮይሮትድ ኦልድ ሀላቃ ግድስ። 7 ዳዊቲ ሄ ሚፃን ደእዳ ግሾ ሄ ካታማይ ዳዊታ ካታማ ጌተትስ።

8 ዳዊቲ ሚሎፐ ዶምድ ሄ ካታማ ዛሪድ ኬፅስ፤ አትዳ ባጋ እዮኣብ ዛሪድ ኬፅስ። 9 ኡባፈ ዎልቃማ ጎዳይ እያራ ደእያ ግሾ ዳዊቲ ምን ምን ብስ።

10 ምኖ ግድዳ ዳዊታ አሳት ሀይሳፈ ካልድ ፃፈትዶሶና። ጎዳይ እስራኤለስ ግዳ ቃላዳ ዳዊቲ ካዎታና መላ ሀ አሳት እስራኤለ አሳራ ዳሮ ማድዶሶና። ቃስ እያ ካዎተꬃ ምንꬅዶሶና።

11 ምኖ ግድዳ ዳዊተ አሳት ሀይሳፈ ካልድ ደኤይሳታ። ኤንታፈ ሄꬓት ዳሮ ኤረትዳይሳታ። ሄꬓታፐ ኮይሮይ ሀክሞና አድያ ያሾብኣማ፤ እ እስ ቶሆ ኦላን ሄꬑ ፄቱ አሳ ባ ቶራን ዎꬍስ። 12 እያ ካለይ፥ ሄꬑ ምኖ አሳታፐ እሶይ አሆሀ አድያ ዶዳ ናአ አላዛራ። 13 ፍልስፄመ አሳይ ኦለታናዉ ፓስዳምማ ጌተትያ በሳ ሺቅዳ ዎደ አላዛር ዳዊታራ ደኤስ። እስራኤለ ኦላንቾት ፍልስፄመ አሳታ ስንꬃፈ ባቃትያ ዎደ አላዛር ባንጋ ጋደን ደኤስ። 14 እነ እያ አሳት ጋድያ ግዶን ፍልስፄመ አሳራ ኦለትን፥ ጎዳይ ግታ ፆኖ እምድ ኤንታ አሽስ።

15 ፍልስፄመ ኦላንቾት ራፋይመ ዛንጋራን ዱንካንዳ ዎደ ሀስታሙ ሀላቃታፐ ሄꬓት ዳዊቲ ደእያ አዱላማ ጎንጎሉዋን ደእያ ዛላኮ ብዶሶና። 16 ሄ ዎደ ዳዊቲ ሚፃን ደኤስ፤ ፍልስፄመ ኦላንቾታፐ እስ ጩጋይ ቤተለመ ኦልድ ኦይክስ። 17 ዳዊቲ ሃ ኡያናዉ አሞትድ፥ “ቤተለመ ፐንግያ ማታን ደእያ ፑልቶ ሃꬃፈ ታና ኡሻናይ ኦነ!” ያግስ። 18 ሄꬑ ምኖ አሳት ፍልስፄመት ዱንካንዳ በሳ ካንꬅ ብድ ቤተለመ ፐንግያ ማታን ደእያ ፑልቶ ሃꬃፈ ዱቅድ ዳዊታስ ኤህዶሶና። ሽን ዳዊቲ ኡዮና እፅድ ሃꬃ ጎዳ ስንꬃን ትግስ። 19 “ሀ ሃꬃ ኡሽ ታፐ ሃኮ! ባንታ ሸምፑዋ ባይዝድ ኤህዳ ሀ አሳታ ሱꬃ ታኒ ኡዮ? ኤንቲ ባንታ ሸምፑዋ አꬅድ እምድ ኤህዶሶና” ያግስ። ሄሳ ግሾ፥ ዳዊቲ ሃꬃ ኡይቤና። ሄꬑ ምኖ አሳት ሄሳ ኦꬅዶሶና።

20 እዮኣባ እሻይ አብስ ሀስታሙ ኦላንቾታስ ሀላቃ። እ ባ ቶራን ሄꬑ ፄቱ አሳ ዎꬍድ፥ እካ ሀ ሄꬓታዳ ኤረትዳ አስ ግድስ። 21 አብስ ሄꬓታራ ታይበቶና እፅኮካ፥ እ ሄꬓታፐ አꬍድ ቦንቸትዳ አስ፤ እ ኤንታዉ ሀላቃ ግድስ።

22 ቃብፄላ አደይ ዮዳሄ ናአይ ባናይ ምኖ አስ፤ እ ምኖ ኦሶ ኦꬅስ። እ ናምኡ ኤረትዳ ሞአበ አሳታ ዎꬍስ። ቃስ ሻች ዎꬍዳ እስ ጋላስ ኦላ ግዶ ገልድ ጋሞ ዎꬍስ። 23 ባናይ እቻሹ ዋꬋ ግድያ ግብፀ አድያ ዎꬍስ። ግብፀ አድያ ኩሸን ዋንዳራሸ መላ ቶር ደኤስ፤ ሽን ባናይ ፃምአ ኦይክድ አድያኮ ብድ እያ ኩሽያን ደእያ ቶራ ዳፍ ኤክድ እያ ቶራን እያ ዎꬍስ። 24 ዮዳሄ ናአይ ባናይ ሀይሳ ኦꬅስ። እያ ሱንꬃይ ሄ ሄꬓታይሳዳ ኤረትስ። 25 እ ሀስታማታ ግዶን ዳሮ ቦንቸትስ፤ ሽን እ ሄꬓታ ታይቡዋን ዴና። ዳዊቲ እያ ባና ናገይሳታ ሀላቃ ኦꬅስ።

26 ምኖ አሳት እዮኣባ እሻ አሳሄላ፥ ቤተለመ አድያ ዶዳ ናኣ ኤልያና፥ 27 ሀሮዳ አድያ ሳሞታ፥ ፕሎና አድያ ሰለሳ፥ 28 ተቁሄ አድያ ኤስካ ናኣ እራ፥ አናቶታ አድያ አብኤዘራ፥ 29 ኩሳታ አድያ ሳባካ፥ አሆሀ አድያ ኤላያ፥ 30 ናፆፋ አድያ ኖኤራነ ባናሀ ናኣ ሄለዳ፥ 31 ብንያመን ደእያ ግብአ አድያ ራባያ ናአ ኤታያ፥ ፕርአቶና አድያ ባናያሳ፥ 32 ጋኣሳ ዛንጋራ ማታፐ ይዳ ኡራያ፥ አራባ አድያ አብኤላ፥ 33 ባርሁማ አድያ አዝሞታ፥ ሳአልቦና አድያ አብኤላ፥ 34 ግዞና አድያ ሀሰማ፥ ሀራራ አድያ ሻገ ናአ ዮናታና፥ 35 ሀራራ አድያ ሳካራ ናአ አህኣማ፥ ኡረ ናኣ ኤልፋላ፥ 36 ማኬራ አድያ ሄፌራ፥ ፕሎና አድያ አክያ፥ 37 ቃርመሎሳ አድያ ሄፅራ፥ ኤዝባያ ናኣ ናእራያ፥ 38 ናታና እሻ እዩኤላ፥ ሀግራ ናኣ ምብሃራ፥ 39 አሞነ አድያ ፀለቃ፥ ፃሩያ ናኣ እዮኣባ ኦላ ሚሽያ ቶክያ ባኤሮታ አድያ ናህራያ፥ 40 ያትራ አድያ እራነ ጋሬባ፥ 41 ህተ አድያ ኦርዮና፥ አህላያ ናኣ ዛባዳ፥ 42 ሮቤላ ኮቸ ግድዳ ሺዛ ናኣ አድና። እ ሮቤላ ኮቻታ ሀላቃ፤ ሀስታማት እያራ እስፈ ደኦሶና። 43 ሀራ ምኖ አሳት ማእካ ናኣ ሀናና፥ ምታነ አድያ እዮሳፈፃ፥ 44 አስታሮታ አድያ ኦዝያና፥ አሮኤራ አድያ ሆታማ ናይታ ሻማአነ ይኤላ፥ 45 ሽምራ ናኣ ይድኤላነ እያ እሻ ቲፃ አድያ ዮሀ፥ 46 ማሃዋ አድያ ኤልኤላ፥ ኤልናማ ናይታ ይርባያነ ዮሻዋ፥ ሞአበ አድያ ይትማ፥ 47 ፆባ አድያ ኤልኤላ፥ ኦቤዳነ ያእስኤላ።