1 ፍልስፄመት እስራኤለ አሳራ ኦለትዶሶና። እስራኤለት ፍልስፄመታ ስንꬃፈ ባቃትዶሶና። ሄ ዎደ ዳሮ እስራኤለ አሳይ ግልቦአ ደርያ ቦላ ሀይቅዶሶና። 2 ፍልስፄመት ሳኦላነ እያ አደ ናይታ ጎድ ኤፍድ ሳኦላ ናይታ ዮናታና፥ አብናዳባነ ማልክሳ ዎꬍዶሶና። 3 ኦላይ ሳኦላ ተቅድ ኡንኤꬅስ፤ ዶንገን ዱከይሳት ሳኦላ ደምድ ማዱንፅስዶሶና።

4 ሳኦል ባ ኦላ ሚሽያ ቶከይሳኮ፥ “ሀ ቃፃረትቦና ፍልስፄመት ታና ካኦና መላ ነ ማሻን ታና ዎꬋ” ያግስ።

ሽን እያ ኦላ ሚሽያ ቶከይስ ዳሮ ያይዳ ግሾ እፅስ፤ ሄሳ ግሾ፥ ሳኦል ባ ማሻ ሳአን ኤስድ እያ ቦላ ኩንድድ ሀይቅስ። 5 እያ ኦላ ሚሽያ ቶከይስ ሳኦል ሀይቅዳይሳ በእድ፥ እካ ባ ማሻ ሳአን ኤስድ እያ ቦላ ኩንድድ ሀይቅስ። 6 ሄሳዳ ሀንድ ሳኦል፥ እያ ሄꬑ ናይትነ እያ ሶ አሳ ኡባይ ሄ ጋላስ ሀይቅዶሶና። 7 ዛንጋራን ደእያ እስራኤለት ኡባይ ባንታ ኦላንቾት ባቃትዳይሳ፥ ሳኦልነ እያ ናይት ሀይቅዳይሳ በእዳ ዎደ ባንታ ካታማታ አግድ ባቃትዶሶና። ፍልስፄመት ይድ ሄ ካታማታን ደእዶሶና።

8 ዎንተꬃ ጋላስ ፍልስፄመት አሀታ ቦላፈ ኦላ ሚሸታ ቃር ኤካናዉ ይድ፥ ሳኦልነ እያ ናይት ግልቦአ ደርያን ሀይቅድ፥ ዝንእዳይሳታ ደምዶሶና። 9 ኤንቲ ሳኦላ ቆꬍያ ቃንፅድ እያ ኦላ ሚሽያ ቃር ኤክዶሶና። ያትድ ባንታ ኤቃታ ኬꬃንነ ባንታ አሳ ግዶን ፆኑዋ አዋጃና መላ ፍልስፄመ ቢታ ኡባስ አሰ ኪትዶሶና። 10 ኤንቲ ሳኦላ ኦላ ሚሽያ ባንታ ፆሳታ ኬꬃታፐ እሱዋን ዎꬅዶሶና፤ እያ ሁጵያ ባንታ ፆሳ ዳጎና ኤቃ ኬꬃን ካቅዶሶና።

11 ፍልስፄመት ሳኦላ ቦላ ኦꬅዳባ ኡባ ጋላዳን ደእያ ያበሳ ካታማ አሳይ ስእዳ ዎደ፥ 12 ምኖ አሳት ኡባይ ብድ፥ ሳኦላ አሃነ እያ ናይታ አሀ ኤክድ ያበሳ ካታማ ኤህዶሶና። ያበሳን ደእያ ዎላ ጋርሳን ኤንታ ሞግዶሶና፤ ያትድ ላፑን ጋላስ ፆምዶሶና።

13 ሳኦል ጎዳስ አማነትቦና ግሾ ሀይቅስ። ጎዳ ቃላ እ ናግቤና፤ ጎዳ ዞረ ኦይቸይሳ አግድ፥ 14 ሞይትለ ፄግያ አስ ዞረ ኦይችስ። ሄሳ ግሾ፥ ጎዳይ እያ ዎꬍድ እያ ካዎተꬃ እሰየ ናኣ ዳዊታስ አꬅድ እሚስ።