1 ሄሳፈ ጉየ፥ ዳዊቲ ፍልስፄመታ ፆንድ ሃርስ፤ ጌተ ካታማነ እያ ጉታታ ፍልስፄመታ ኩሸፐ ኤክስ። 2 ዳዊቲ ሞአበ አሳ ፆንን፥ ኤንቲ እያዉ ሃረትድ ጊርዶሶና።

3 ሀማታ ካታማ ማታን ደእያ ሱባ ካዎይ አድራዛር፥ ባ ካዎተꬃ ኤፍራፂሳ ሻፋ ጋካናዉ አሳናዉ ብሽን ዳዊቲ እያ ኦልስ። 4 ዳዊቲ አድራዛራፐ እስ ሙኩሉ ፓራ ጋረታ፥ ላፑን ሙኩሉ ፓራ አሳታነ ላታሙ ሙኩሉ ቶሆ አሳታ ድእስ። ዳዊቲ ፄቱ ጋረታስ ግድያ ፓራታ አሽድ ሀራ ፓራታ ኡባስ ገዳ ፃጱዋ ቃንፅስ።

5 ዳማስቆ ካታማን ደእያ ሶረት ሱባ ካዋ አድራዛራ ማዳናዉ ይዳ ዎደ ዳዊቲ ኤንታፈ 22,000 አሳ ዎꬍስ። 6 ሄሳፈ ጉየ፥ ሶረ ቢታን ዳማስቆ ካታማን ኦላ ሚፃ መꬍስ። ሶረ አሳት ዳዊታስ ሃረትድ ጊርዶሶና። ዳዊቲ ብዳ በሳ ኡባን ጎዳይ እያዉ ፆኖ እሚስ።

7 ዳዊቲ አድራዛራ ኦሳንቾት ቶክዳ ዎርቃ ጎንዳለታ ኤክድ የሩሳላመ ኤፍስ። 8 ቃስ ዳዊቲ አድራዛር ሃርያ ፀባሀነ ኩና ካታማታፐ ዳሮ ናሰ ብራታ ኤክስ። ሄሳፈ ጉየ፥ ሶሎሞነይ ሄ ናሰ ብራታፐ ኦሰትዳ ከረታ፥ ቱሳታነ ዱማ ዱማ ሚሸታ ኦꬅስ።

9 ዳዊቲ ሱባ ካዋ አድራዛራ ኦላንቾታ ኡባ ፆንዳይሳ ሀማታ ካዎይ ቶይ ስእስ። 10 ቶይ አድራዛራራ ኦለትሸ ጋምእዳ ግሾ ዳዊቲ አድራዛራ ኦልድ ፆንዳ ግሾ እያ ሀሹ ጋናዉነ ሳሮꬃናዉ ባ ናኣ ሀዶራማ ካዋ ዳዊታኮ ኪትስ። ሀዶራም ዎርቃፈ፥ ብራፐነ ናሰ ብራታፐ ኦሰትዳ ሚሸታ እሞታ ኤክድ ብስ። 11 ካዎይ ዳዊቲ ኤዶመፐ፥ ሞአበፐ፥ አሞነፐ፥ ፍልስፄመታፐነ አማለቃታፐ ድእድ ኤክዳ ብራነ ዎርቃ ሀ ሚሸታራ ጋꬅድ ጎዳስ ዱማይድ ዎꬅስ።

12 ፃሩያ ናአይ አብስ ኤዶመ አሳፐ 18,000 አሳ፥ ማፅነ ዛንጋራን ዎꬍስ። 13 ዳዊቲ ኤዶመን ኦላ ሚፃ መꬍስ፤ ያትን፥ ሄ ቢታ አሳ ኡባይ ዳዊታስ ሃረትስ። ዳዊቲ ብዳ በሳ ኡባን ጎዳይ እያዉ ፆኖ እሚስ።

14 ሄሳዳ ኦꬅድ፥ ዳዊቲ እስራኤለ ኡባ ቦላ ካዎትድ ባ አሳ ኡባ ፅሎተꬃንነ ሱረ ፕርዳን አይስስ። 15 ፃሩያ ናአይ እዮኣብ ቶራ ሞጮና፤ አህሉዳ ናአይ እዮሳፈፅ ታርከ ፃፈ። 16 አህፁባ ናአይ ሳዶቅነ አብያታራ ናአይ አብመለከይ ካህነ፤ ሳራይ ዋና ፃፈ። 17 ዮዳሄ ናአይ ባናይ ዳዊቲ ናግያ አሳ ሀላቃ፤ ዳዊታ አደ ናይት እያ ካዎተꬃን ꬎቃ በሳ ኦይክዳ ሀላቃታ።