1 ሄሳፈ ጉየ፥ አሞነ ካዎይ ናኦስ ሀይቅን እያ ናአይ እያ በሳን ካዎትስ። 2 ዳዊቲ፥ “እያ አዋይ ናኦስ ታዉ ኬህዳ ግሾ ታኒ እያ ናኣ ሀኑናስ ኬሀና” ያግስ። ሀኑና አዋይ ሀይቅዳ ግሾ ዳዊቲ እያ ምንꬃናዉ አሰ ኪትስ።

ዳዊቲ ኪትዳ አሳት ሀኑና ምንꬃናዉ አሞነ ጋክዳ ዎደ፥ 3 አሞነ ሞርናት ሀኑናኮ፥ “ዳዊቲ ነ አዋ ቦንችድ ነና ምንꬃናዉ ሀ አሳታ ኪትስ ጋዳ ኔ ቆፓይ? እ ሀ አሳ ኪትዳይ ሀ ካታማ ዎችድ፥ ኦላናሳ” ያግዶሶና።

4 ሀኑኒ ዳዊቲ ኪትዳ አሳታ ኦይክድ፥ ኤንታ ቡቻ ሜድስ፤ ኤንታ ማኡዋ ጋርሳፈ ዱለ ጋካናዉ ቃንፅድ ኤንታ የድስ። 5 ሄሳ ግሾ፥ አሳት ዳሮ ዬላትዶሶና። ዳዊቲ ሄሳ ስእድ፥ ኤንታኮራ አስ ኪትድ፥ “ህንተ ቡቻይ ድጫና ጋካናዉ እያርኮ ካታማን ደእተ፤ ሄሳፈ ጉየ ሃ ዪተ” ያግስ።

6 አሞነት ባንታ ኩሸን ዳዊቲ ኤንታ ሞርካና መላ ኦꬅዳይሳ ኤርዳ ዎደ ማሰጰፆመንነ ሶረን ደእያ ማእካነ ሱባ ካታማታፐ ፓራ ጋረታነ ፓራታ ጋርፃናዉ 34,000 ክሎ ግራመ ብራ ሳንትመ የድዶሶና። 7 32,000 ፓራ ጋረታ፥ ፓራታ፥ ማእካ ካዋነ እያ ኦላንቾታ ሚሸን ጋርፅን ይድ መዳባን ዱንካንዶሶና። ቃስ አሞነት ባንታ ካታማፐ ከይድ ኦላስ ጊገትዶሶና።

8 ዳዊቲ ሄሳ ስእዳ ዎደ እዮኣባነ ኦላንቾታ የድስ። 9 አሞነት ከይድ ካታማ ፐንገን ኦላስ ሳልፕዶሶና። ኤንታ ማዳናዉ ይዳ ካዎት ባንታ በሳ ኦይክድ ደንባን ሺቅዶሶና።

10 እዮኣብ ኦል ስንꬃራነ ጉየራ ተቅዳይሳ በእዳ ዎደ እስራኤለታ ግዶፈ ምኖ ኦላንቾታ ዶርድ፥ ሶረ ኦላንቾታ ስንꬃን ሳልፕስስ። 11 አትዳ አሳ ባ እሻ አብሳ አዋተꬃ ጋርሳን ዎꬅስ፤ ኤንቲ አሞነታ ስንꬃን ሳልፕዶሶና። 12 እዮኣብ ባ እሻ አብሳኮ፥ “ሶረ አሳት ታ ቦላ ዎልቃምኮ፥ ኔኒ ያዳ ታና ማዳ። አሞነ አሳት ነ ቦላ ዎልቃምኮ፥ ታኒ ያዳ ነና ማዳና። 13 ህዛ ምና! ኑ አሳ ግሾነ ኑ ፆሳ ካታማታ ግሾ አነ ምንድ ኦለቶስ። ጎዳይ ባና ሎእያባ ኦꬆ” ያግስ።

14 ሄሳፈ ጉየ፥ እዮኣብነ እያራ ደእያ አሳይ ሶረ ኦላንቾታራ ኦለታናዉ ከይዶሶና። ያትን፥ ሶረ አሳይ እያ ስንꬃፈ ባቃትዶሶና። 15 ሶረ አሳይ ባቃትዳይሳ አሞነ አሳይ በእዳ ዎደ ኤንትካ እያ እሻ አብሳያ ስንꬃፈ ባቃትድ ካታማ ገልዶሶና። ሄሳፈ ጉየ፥ እዮኣብ የሩሳላመ ስምስ።

16 ሶረ አሳይ እስራኤለ አሳይ ኤንታ ፆንዳይሳ ኤርዳ ዎደ አሰ ኪትድ ኤፍራፂሳ ሻፋፐ ሄፍንꬃራ ደእያ ሶረ አሳ ኤህዶሶና። ቶራ ሞጮናይ አድራዛር፥ ሾፋክ ኤንታ ካለꬄስ።

17 ዳዊቲ ሄሳ ስእዳ ዎደ እስራኤለ ኦላንቾታ ሺሽድ፥ ዮርዳኖሰ ሻፋ ፕንድ ሶረ አሳራ ኦለታናዉ ኤንታ ስንꬃን ሳልፕዶሶና። ዳዊቲ ኤንታራ ኦለታናዉ ሳልፕን ኤንትካ እያራ ኦለትዶሶና። 18 ሶረ አሳይ እስራኤለታ ስንꬃፈ ባቃትዶሶና፤ ዳዊቲ ሶረ አሳፐ ፓራ ጋረ ላግያ 7,000 አሳነ 40,000 ቶሆ አሳነ ኤንታ ቶራ ሞጮና ሾፋካ ዎꬍስ። 19 አድራዛራ ኦላንቾት እስራኤለታን ፆነትዳይሳ ኤርዳ ዎደ ዳዊታራ ስገትድ፥ እያዉ ሃረትዶሶና። ሄሳፈ ጉየ፥ ሶረ አሳይ አሞነ አሳ ማዳናዉ ዶስቦኮና።