1 ፃለሄይ እስራኤለ ቦላ መቶ ኤሀናዉ ኮይድ፥ ዳዊቲ እስራኤለ አሳ ታይባና መላ ደንꬅስ። 2 ዳዊቲ እዮኣባኮነ ቶራ ሞጮናታኮ፥ “ዳነፐ በርሳበ ጋካናዉ ብድ፥ እስራኤለ አሳ ታይብተ። ያትድ፥ አሳ ታይቦይ አፑነኮ ታና ኤርስተ” ያግስ።

3 ሽን እዮኣብ፥ “ጎዳይ፥ ሀ ደእያ ባ አሳ ቦላ ፄቱ ኩሸ ጉጆ! ታ ጎዳዉ፥ ካዋዉ፥ ኤንቲ ኡባይ ታ ጎዳ አይለታ ግዶኮናዬ? ታ ጎዳይ ሄሳ መላባ ኦꬃናዉ አይስ ኮዪ? እስራኤለ ቦላ አይስ ባላ ኦꬃይ?” ያግስ። 4 ሽን ካዋ ቃላይ እዮኣባ ፆንን፥ እዮኣብ ከይድ እስራኤለ ቢታ ኡባ ዩይድ የሩሳላመ ስምስ። 5 እዮኣብ ታይብዳ አሳ ታይቡዋ ዳዊታስ እሚስ። እስራኤለ ቢታ ኡባን ማሻን ኦለታናዉ ዳንዳእያ እስ 1,100,000 አሳት ደኦሶና። ቃስ ይሁዳ ቢታን ማሻን ኦለታናዉ ዳንዳእያ 470,000 አሳት ደኦሶና። 6 እዮኣብ ካዋ ኪታ ዶስቦና ግሾ ሌወታነ ብንያመ ኮቻታ ታይቤና።

7 ፆሳይ ሄሳን ኡፋይትቦና ግሾ እስራኤለ ሴርስ። 8 ዳዊቲ ፆሳኮ፥ “ታኒ ሀይሳን ግታ ናጋራ ኦꬃስ። ሽን ሀእ ነና ዎሳይስ፤ ነ አይልያ ናጋራ አቶ ጋ፤ ታኒ ዳሮ ኤያባ ሀናስ” ያግስ።

9 ጎዳይ ዳዊታ ቆንጨꬅ በእያ ጋደኮ ሀይሳዳ ያግስ፤ 10 “ባዳ ዳዊታኮ፥ ጎዳይ፥ ‘ታኒ ነና ሄꬑ ዶሮ በሳይስ፤ ታኒ ነ ቦላ ኦꬃና መላ ኤንታፈ ታዉ እሱዋ ዶራ’ ያጌስ” ያጋ።

11 ጋድ ዳዊታኮ ብድ፥ “ጎዳይ ሀይሳታፐ እሱዋ ዶራ ያጌስ፤ 12 ሄꬑ ላይꬃ ኮሻ ዎይኮ ሄꬑ አጌና ነ ሞርከታ ኩሸን አꬋዳ እመታናይሳ ዎይኮ ሄꬑ ጋላስ ጎዳ ማሻይ ነ ቢታ ሾጫናይሳነ ጋዶ እስራኤለ ቦላ ኤህያ ሀይቆ ኪታንቾ ኪተይሳፈ አዉሳ ዶራይ? ታና ኪትዳይሳስ ኦዳናባ ታዉ ኦዳ” ያግስ።

13 ዳዊቲ ጋደኮ፥ “ታኒ ዳሮ ኡንኤታስ። ጎዳ ማሮታይ ግታ ግድያ ግሾ ታኒ እያ ኩሸን ኩንዳና፤ አሳ ኩሸን ኩንድከ” ያግስ።

14 ሄሳ ግሾ፥ ጎዳይ እስራኤለ ቦላ ጋዶ የድን፥ 70,000 እስራኤለ አሳት ሀይቅዶሶና። 15 ፆሳይ የሩሳላመ ꬋይሳናዉ ኪታንቾ ኪትስ። ሽን ኪታንቾይ የሩሳላመ ꬋይሳናዉ ዶምዳ ዎደ ጎዳይ አዛንስ። ꬋይስያ ኪታንቹዋኮ፥ “አጋ! ህዛ ግዳና!” ያግስ። ሄ ዎደ ጎዳ ኪታንቾይ ያቡሰ አድያ ኦርና ዉዱማ ማታን ኤቅስ።

16 ኪታንቾይ ባ ማሻ ባ ኩሸን ኦይክድ የሩሳላመ ꬋይሳናዉ ሳአፐነ ሳሎፐ ግዶን ኤቅዳይሳ ዳዊቲ በእስ። ሄ ዎደ ዳዊቲነ ጭማት ካዮ ማኦ ማእድ፥ ሳአን ጉፋንዶሶና። 17 ዳዊቲ፥ “አሳይ ታይበታና መላ ኦꬅዳይ ታና ግድክና? ናቅዳይነ ኢታባ ኦꬅዳይ ታና። ሽን ሀ ዶርሳት አይ ኦꬅዶና? አቤት ጎዳዉ፥ ታ ፆሳዉ፥ ሀያና ነ ኩሸይ ታናነ ታ ሶ አሳ ሴሮ። ነ ኩሸይ ነ አሳ ሴሮፖ!” ያግስ።

18 ጎዳ ኪታንቾይ ጋደኮ ሀይሳዳ ያግስ፤ “ዳዊቲ ያቡሰ አድያ ኦርና ዉዱማ ብድ ጎዳስ ያርሾ በሲ ግምባና መላ ኦዳ” ያግስ። 19 ጎዳ ሱንꬃን ጋድ ኦድዳይሳ ስእድ ዳዊቲ ብስ።

20 ሄ ዎደ ኦርንነ እያ ኦይዱ አደ ናይት ዉዱማን ግስተ ቆፆሶና። እ ጉየ ስሚድ ኪታንቾ በእስ፤ እያራ ደእያ ኦይዱ ናይት በእድ ቆሰትዶሶና። 21 ዳዊቲ ኦርናኮ ይዳ ዎደ ኦርን እያ በእድ፥ ዉዱማፈ ጋፃ ከይድ ዝግድ ሳሮꬅስ።

22 ዳዊቲ፥ “ጋዶይ አሳ ቦላፈ ክቻና መላ ታኒ ጎዳስ ያርሾ በሲ ኬፃና መላ ነ ዉዱማ ታዉ ባይዛ። ታኒ ነዉ ኩመꬃ ጋትያ ቃንፃና” ያግስ።

23 ኦርን፥ “ኤካ፤ ታ ጎዳይ ካዎይ ባና ኡፋይስያባ ኦꬆ። ሄኮ፥ ቦራት ፁሳ ያርሾስ፥ ካꬃ ቡክያ ሚሽያ ኤꬃናዉ፥ ግስተ ካꬃ ያርሾስ እማና። ታኒ ሀ ኡባ ነዉ እማና” ያግስ።

24 ሽን ካዎይ ዳዊቲ፥ “አካይ፥ ታኒ ኩመꬃ ጋተ ቃንፃዳ ሻማና። ታኒ ነባነ ታ ሚሸን ሻሞናባ ኤካዳ ፁሳ ያርሾ ኦꬃዳ ጎዳስ ያርሽከ” ያግስ።

25 ዳዊቲ ዉዱማ ኡሱፑን ፄቱ ዎርቃ ሳንትመን ሻምስ። 26 ዳዊቲ ያን ጎዳስ ያርሾ በሲ ኬፅስ። ያትድ ፁሳ ያርሾነ እስፈተꬃ ያርሾ ያርሽስ። ጎዳ ዎስን፥ ጎዳይ ፁሳ ያርሹዋ ቦላ ሳሎፐ ታማ የድድ እያዉ ዛርስ።

27 ጎዳይ ኪታንቹዋ ኪትን፥ ኪታንቾይ ባ ማሻ ሾሁዋን ዛርስ። 28 ዳዊቲ፥ ጎዳይ እያ ዎሳ ዛርዳይሳ በእድ፥ ያቡሰ አድያ ኦርና ዉዱማን ዛሪድ ያርሽስ። 29 ሙሰይ መላ ቢታን ጊግስዳ፥ ጎዳ ዱንካነይነ ፁሳ ያርሾ በሳይ ሄ ዎደ ጋባኦናን ጎይንያ ꬎቃ በሳን ደኤስ። 30 ሽን ዳዊቲ ጎዳ ኪታንቹዋ ማሻ ያይዳ ግሾ ፆሳ ኦይቻናዉ ሄ በሳ ባናዉ ዳንዳእቤና።