1 ሄሳፈ ጉየ፥ ዳዊቲ፥ “ጎዳ ፆሳ ኬꬃይነ እስራኤለ አሳይ ፁሳ ያርሾ በሳይ ሀይሳን ግዳና” ያግስ።

2 ዳዊቲ እስራኤለ ቢታን ደእያ በተ አሳታ ሺሻና መላ ኪትስ። ፆሳ ኬꬃ ኬፃናዉ ሹቹ ማሰይሳት ማስድ ሎይꬃና መላ ኤንታ ግዶፈ ዶርስ። 3 ዳዊቲ፥ ድርሳ ፐንግያ ጊግሳናዉ ምስማረነ ማፃፈ ቆፃናዉ ዳሮ ብራታነ ዛው ባይና ናሰ ብራታ ጊግስስ። 4 ስዶናነ ፅሮሳ አሳት ዳዊታስ ዝጋ ኤህያ ግሾ ዳዊቲ፥ ታይቦይ ባይና ዝጋ ጊግስስ። 5 ዳዊቲ፥ “ታ ናአይ ሶሎሞነይ ዮጋነ ኤራተꬃን ሎህቤና። ጎዳስ ኬፀትያ ኬꬃይ ቢታ ኡባን ኤረትዳነ ቦንቸትዳ ሎኦ ኬ ግዳናዉ በሴስ። ሄሳ ግሾ፥ እያዉ ኮሽያባ ታኒ ጊግሳና” ያግስ። ዳዊቲ ሀይቃናፐ ስን ዳሮባ ጊግስድ ዎꬅስ።

6 ሄሳፈ ጉየ፥ ዳዊቲ ባ ናኣ ሶሎሞነ ፄግድ፥ ጎዳስ እስራኤለ ፆሳስ ኬ ኬፃና መላ ኪትስ። 7 ዳዊቲ ሶሎሞነኮ፥ “ታ ናአዉ፥ ታኒ ጎዳ ታ ፆሳ ሱንꬃስ ኬꬅ ኬፃናዉ ታ ዎዛናን ቆፓስ። 8 ግዶሽን፥ ጎዳ ቃላይ፥ ‘ኔኒ ዳሮ ሱꬅ ጉሳዳሳ፤ ዳሮ ኦላ ኦለታዳሳ። ኔኒ ሀ ሳኣ ቦላ ታ ስንꬃን ዳሮ ሱꬅ ጉስዳ ግሾ ታ ሱንꬃስ ኬ ኬፃካ። 9 ግዶሽን፥ ሳሮነ ሸምፖ ግድዳ ናእ የለታና፤ እያ ዩሹዋን ደእያ ሞርከታፐ ታኒ እያ ሸምፕሳና። እያ ሱንꬃይ ሶሎሞነ፤ ታኒ እያ ካዎተꬃ ላይꬃን እስራኤለ አሳስ ሳሮተꬅነ ዎፓ እማና። 10 እ ታ ሱንꬃስ ኬ ኬፃና። እ ታ ናአ ግዳና፤ ታኒ እያዉ አዋ ግዳና። እያ አራታ እስራኤለን መርናዉ ምንꬃዳ ኤሳና’ ” ያግስ።

11 “ህዛ ታ ናአዉ፥ ጎዳይ ኔራ ግዶ። ጎዳ ነ ፆሳ ኬꬃ ኬፃና መላ ጎዳይ ካሰ ኦድዳይሳዳ ነና ፖልሶ። 12 ጎዳይ ነና እስራኤለ አሳ ቦላ ካዎ ኦꬅያ ዎደ፥ ጎዳ ነ ፆሳ ህግያ ናጋና መላ ጎዳይ ነዉ ጭንጫተꬅነ አኬካ እሞ። 13 ጎዳይ ሙሰ ባጋራ እስራኤለስ እምዳ ዎጋነ ኪታ ኔኒ ናግኮ ኡባይ ነዉ ሀናና። ምና፤ ያዮፋ፤ ዳጋሞፋ፥ ኡፋይስ ቃንፆፋ! 14 ታኒ ታዉ ዳንዳኤትዳ መላ ጎዳ ኬꬃ ኬፃናዉ 3,400 ክሎ ግራመ ዎርቃ፥ 34,000 ክሎ ግራመ ብራ፥ ዛው ባይና ናሰነ ብራታ ሺሻስ፤ ሄሳዳካ ምꬅነ ሹቹ ጊግሳስ። ነካ ነ ባጋራ ሄሳ ቦላ ሀራ ጉጃናዉ ኮሼስ። 15 ነ ማታን ዳሮ ኦሳንቾት ሹቹ ቆኤይሳትነ ማሰይሳት፥ አናፀትነ ኡባ ኦሶ ኦꬃናዉ ዳንዳእያ ሂላንቾት ደኦሶና። 16 ዎርቃ፥ ብራ፥ ናሰነ ብራታ ኦꬅያ አሳስ ዛው ባዋ። ህዛ ኔኒ ኦሱዋ ዶማ፤ ጎዳይ ኔራ ግዶ” ያግስ።

17 እስራኤለ ካለይሳት ኡባይ ባ ናኣ ሶሎሞነ ማዳና መላ ዳዊቲ ሀይሳዳ ያግድ ኪትስ፤ 18 “ጎዳይ፥ ህንተ ፆሳይ ሀእ ጋካናዉ ህንተራ ደኤነዬ? እ ህንተና ኡባ ባጋራ ሸምፕስበነዬ? ሀ ቢታን ደእያ አሳ እ ታ ኩሸን አꬅድ እምዳ ግሾ ሀ ቢታይ ጎዳስነ እያ አሳስ ሃረትስ። 19 ህዛ ጎዳ ህንተ ፆሳ ኮያናዉ ህንተ ዎዛናነ ህንተ ሸምፑዋ እምተ። ጎዳ ሱንꬃስ ኬፀትዳ ኬꬃ ግዶን ጎዳ ጫቆ ታቦትያነ ፆሳ ጌሻ ሚሸታ ኤህድ ዎꬃና መላ ደንድድ ጎዳ ፆሳ ኬꬃ ኬፅተ” ያግስ።