1 እስራኤለ ሀላቃት ኡባይ የሩሳላመን ሺቃና መላ ካዎይ ዳዊቲ ኪትስ። ሄሳ ግሾ፥ እስ እስ ኮቻ ሀላቃት፥ ካዎ ሞርናት፥ ሻላቃት፥ ማቶ ሀላቃት፥ ካዋስነ ካዋ ናይታስ ደእያ ሻሉዋነ መህያ አይሰይሳት፥ ካዎ ጋꬎን ኦይሳት፥ ኤረትዳነ ምኖ አሳት ኡባይ የሩሳላመን ሺቅዶሶና።

2 ካዎይ ዳዊቲ ደንድ ኤቅድ ሀይሳዳ ያግስ፤ “ታ እሻቶ፥ ታ አሳዉ፥ ስእተ! ጎዳ ጫቆ ታቦትያ ዎꬅያነ ኑ ፆሳ ቶሆይ ሸምፕያ ኬꬃ ኬፃናዉ ታ ዎዛናን ቆፓስ፤ ኮሽያባ ኡባ ጊግሳስ። 3 ሽን ፆሳይ፥ ‘ኔኒ ኦላንቾነ ሱꬅ ጉስዳ አስ ግድያ ግሾ ታ ሱንꬃስ ኬ ኬፃካ’ ያግስ። 4 ታኒ እስራኤለ ቦላ መርናዉ ካዎታናዳ፥ ጎዳይ እስራኤለ ፆሳይ ታ አዋ ሶፐ ታና ዶርስ። ካለꬃናዳ ኮይሮ ይሁዳ ኮቻ ዶርስ፤ ይሁዳ ኮቻፈ ታ አዋ ሶ አሳ ዶርስ፤ ታ አዋ ናይታ ግዶፈ ታና ዶርድ እስራኤለ ኡባ ቦላ ካዎያናዉ ዶስስ። 5 ጎዳይ ታዉ ዳሮ ናይታ እሚስ፤ ታ ናይታ ኡባፈ ጎዳ ካዎተꬃ አራታን ኡትድ እስራኤለ ቦላ ካዎታናዳ ታ ናኣ ሶሎሞነ ዶርስ።

6 “ጎዳይ፥ ‘ታ ኬꬃነ ታ ዳባባ ኬፃናይ ነ ናኣ ሶሎሞነ። እ ታዉ ናአ ግዳና መላ ታኒ እያ ዶራስ፤ ታኒ እያዉ አዋ ግዳና። 7 እ ሀእ ኦይሳዳ ታ ኪታነ ታ ህግያ ምንድ ናግኮ ታኒ እያ ካዎተꬃ መርናዉ ምንꬃና’ ያግስ። 8 ህዛ ጎዳ ሺቆ ግድዳ እስራኤለ አሳ ኡባይ በእሽን፥ ኑ ፆሳይ ስእሽን፥ ጎዳ ህንተ ፆሳ ኪታ ኡባ ህንተ ምንꬅድ ናጋና መላ ታኒ ህንተዉ ኦዳይስ። ያትኮ፥ ህንተ ሀ ሎኦ ቢታ ላታና፤ ህንተ ናይታካ መርናዉ ላትሳና።

9 “ሶሎሞነ፥ ታ ናአዉ፥ ፆሳይ አሳ ዎዛናነ ቆፋ ኡባ ኤርያ ግሾ ነ አዋ ፆሳ ኤራ፤ ኩመꬃ ዎዛናንነ ሸነን እያዉ ኦꬃ። ኔኒ እያ ኮይኮ እ ነዉ በንታና፤ ሽን ኔኒ እያ አግኮ እ ነና መርናዉ አጋና። 10 ፆሳ ኬꬃ ኬፃና መላ ጎዳይ ነና ዶርዳይሳ ዶጎፓ፤ ኦሶ ኡባ ምናዳ ኦꬃ” ያግስ።

11 ሄሳፈ ጉየ፥ ዳዊቲ ባ ናኣ ሶሎሞነስ ፆሳ ኬꬃ፥ ባራንዳ፥ ቡቁራ ምንጅያ ኬꬃ፥ ፖቅያነ ግዶ ክፍለታ፥ ሄሳዳካ ናጋራ አቶተꬃ ካማ ዎꬅያ ክፍልያ ሀልቹዋነ ቆፋ እሚስ። 12 ዳዊቲ ጎዳ ኬꬃ ዳባባ ኬፃናዉ ባ ዎዛናን ደእያ ቆፋ፥ እያ ዩሹዋን ደእያ ኡባ ክፍለታ ሀልቹዋነ ፆሳ ኬꬃ ቡቁራ ዎꬅያ ክፍልያነ ጎዳስ ዱማትዳ እሞታታ ዎꬅያ ክፍለታ ኦሱዋ ቆፋ እሚስ።

13 ሄሳዳካ ዳዊቲ ካህነታነ ሌወታ ኦሶ ማራ፥ ፆሳ ኬꬃ ኦሶ ማራነ ፆሳ ኬꬃ ሚሸታ ናግያ ማራ ኦድያ ቆፋ እያዉ እሚስ።

14 ዱማ ዱማ ኦሶስ ጎኤትያ ሚሸታ ኦꬃናዉ ማድያ ዎርቃነ ብራ ምዛነን ልክስድ ሶሎሞነስ እሚስ። 15 ሄስካ ፆምፐ ዎꬅያ ዎርቃ ኮጫታነ እያ ፆምፐታ፥ ፆምፐ ዎꬅያ ብራ ኮጫታነ እያ ፆምፐታ፥ 16 ጎዳ ስንꬃን ኡይꬁ ዎꬅያ ዎርቃ ፃርጴዛታ፥ ብራ ፃርጴዛታ፥ 17 ዎርቃ ቃጰታ፥ ዎርቃ ከረታ፥ ዎርቃ ዋንጫታ፥ ዎርቃ ፃሮታ፥ ብራ ፃሮታ 18 እፃነ ጩይስያ ጌሻ ዎርቃ ሳፅነ፥ ጎዳ ጫቆ ታቦትያ ቦላ ባንታ ቀፍያ ምጭድ ካምያ ክሩበታ ዎꬅያ ዎርቃ ጋርያ ጊግስያ ሀልቹዋ እያዉ እሚስ። 19 ዳዊቲ፥ “ጎዳይ ባ ኩሽያ ታ ቦላ ዎꬅድ ሀ ፃፈትዳ ቆፋ ኡባ ታና ኤርስስ” ያግስ።

20 ዳዊቲ ባ ናኣ ሶሎሞነኮ፥ “ህዛ ምና! ኦሱዋ ኦꬃ! ጎዳይ ታ ፆሳይ ኔራ ደእያ ግሾ ያዮፋ፤ ዳጋሞፋ! ፆሳ ኬꬃ ኦሶይ ፖለታና ጋካናዉ ፆሳይ ነና የገናነ አገና። 21 ፆሳ ኬꬃን ደእያ ኦሶ ኡባስ ካህነትነ ሌወት ሹመትዶሶና። ኩሸ ሂል ደእያ አሳ ኡባይ ነና ኦሶ ኡባን ማዳና። ሀላቃትነ አሳ ኡባይ ነዉ ኪተታና” ያግስ።