1 ሄሳፈ ጉየ፥ ካዎይ ዳዊቲ ሺቅዳ አሳ ኡባ ሀይሳዳ ያግስ፤ “ፆሳይ ዶርዳ ታ ናኣ ሶሎሞነይ ዮጋነ ኤራተꬃን ሎህቤና። ሀ ኬፀታና ኬꬃይ አሳ ኬꬅ ግዶናሽን ጎዳ ፆሳ ኬꬅ ግድያ ግሾ ኦሶይ ግታ። 2 ታኒ ታዉ ደእያ ዎልቃ መላ ታ ፆሳ ኬꬃስ ዎርቃን ኦሰትያባስ ዎርቃ፥ ብራን ኦሰትያባስ ብራ፥ ናሰ ብራታን ኦሰትያባስ፥ ናሰ ብራታ፥ ብራታን ኦሰትያባ ብራታነ ምꬃን ኦሰትያባስ ምꬅ ጊግሳ ዎꬃስ። ቃስ ማርግደ፥ እብነባራደ፥ ዱማ ዱማ ማል ደእያ አሌቆ ሹቻታ፥ አልኦ ሹቻታነ ሀራ ሹቻታ ጊግሳዳ ዎꬃስ። 3 ፆሳ ኬꬃ ታኒ ዳሮ ዶስያ ግሾ፥ ታኒ ታ ፆሳ ኬꬃስ ጊግስዳይሳፈ ሀራ ታ ቡዞ ሻሉዋፐ ዎርቃነ ብራ እማስ። 4 ኬꬃ ጎዳ ላንፃናዉ 100,000 ክሎ ግራመ ኦፍራ ዎርቃነ 240,000 ክሎ ግራመ ዋላህ ባይና ብራ እማስ። 5 ኩሸ ሂላንቾት ኦꬃና ኦሶ ኡባስ ዎርቃን ኦሰትያባስ ዎርቃ፥ ብራን ኦሰትያባስ ብራ እማስ። ያትን፥ ሀች ህንተፈ ባ ሸነን ባና ጎዳስ ዱማየይ ኦኔ?” ያግስ።

6 እስራኤለ ኮቻታ ሶ አሳ ሀላቃት፥ ኮቻታ ሀላቃት፥ ሻላቃት፥ ማቶ ሀላቃትነ ካዎ ሞርናት ባንታ ሸነን ባንታዉ ደእያባ ዶሳን እምዶሶና። 7 ኤንቲ ፆሳ ኬꬃ ኦሱዋስ 170,000 ክሎ ግራመ ዎርቃ፥ 340,000 ክሎ ግራመ ብራ፥ 620,000 ክሎ ግራመ ናሰ ብራታነ 3,000,000 ክሎ ግራመ ብራታ እምዶሶና። 8 አልኦ ሹች ደእያ አሳ ኡባይ ቡቁራ አይስያ ገድሶና ያራ ግድዳ ይኤላ ባጋራ ጎዳ ፆሳ ኬꬃ ቡቁራ ምንጅያ ኬꬃስ እሚስ። 9 አሳይ ባ ሸነን ባ ኩመꬃ ዎዛናን ጎዳስ እምዳ ግሾ ኡፋይትስ፤ ካዎይ ዳዊቲካ ዳሮ ኡፋይትስ።

10 ሄሳ ግሾ፥ ዳዊቲ ደርያ ኡባ ስንꬃን ሀይሳዳ ያግድ ጎዳ ጋላትስ፤ “አቤት ጎዳዉ፥ ኑ አዋ እስራኤለ ፆሳዉ ኔኒ መርናፐ መርናዉ ጋላተታ። 11 አቤት ጎዳዉ፥ ሳሎንነ ሳአን ደእያ ኡባይ ነባ! ግታተꬅ፥ ዎልቅ፥ ቦንቾይ፥ ፆኖይነ አንግ ነባ! አቤት ጎዳዉ፥ ማት ነባ፤ ኔኒ ኡባፈ ቦላነ ሁጰ። 12 ዱረተꬅነ ቦንቾይ ኔፐ ዬስ፤ ኔኒ ኡባባ ሃራሳ። ዎልቅነ ምኖተꬅ ነ ኩሸና፤ ኔኒ አሳ ኡባ ግታነ ምኖ ኦꬃናዉ ዳንዳኣሳ። 13 ሀእካ ኑ ፆሳዉ፥ ኑኒ ነና ጋላቶስ፤ ነ ቦንቾ ሱንꬃ ሳቦስ።

14 “ኑኒ ሀይሳ መላ እማናዉ ታነ ታ አሳይ ኦኔ? ኡባይ ኔፐ ዬስ፤ ኑኒ ነ ኩሸፐ ኤክዳባ ነዉ ዛሪድ እምዳ። 15 ካሰ ኑ አዋታዳ ኑካ ነ ስንꬃን በተ አስነ እማ። ሀ ሳአን ኑ ደኦ ላይꬃይ ኡፋይስ ባይና ኩያ መላ። 16 አቤት ጎዳዉ፥ ኑ ፆሳዉ፥ ነ ጌሻ ሱንꬃስ ኑኒ ኬ ኬፃናዉ ሺሽዳ ኡባይ ነ ኩሸፐ ይዳባ፤ ኡባይ ነባ።

17 “ታ ፆሳዉ ኔኒ ዎዛና ፓጨይሳነ ሱረተꬅ ዶሰይሳ ታኒ ኤራይስ። ታኒ ታ ዎዛና ሱረተꬃን ታ ሸነን ሄሳ ኡባ እማስ። ሀ በሳን ደእያ ነ አሳይ ነዉ ባ ሸነን ኡፋይሳን እምዳይሳ ታኒ በአስ። 18 አቤት ጎዳዉ፥ ኑ ማይዛታ አብራሃመ፥ ይሳቃነ እስራኤለ ፆሳዉ፥ ነ አሳ ዎዛናን ሀ ግታ ሲቁዋ መርናዉ ናጋ፤ ኤንታ ዎዛና ኔኮ ዛራ። 19 ነ ዎጋ፥ ነ ኪታነ ነ ህግያ ናጋና መላነ ታኒ ቆፓዳ ጊግሳዳባን ፆሳ ኬꬃ ኬፃና መላ ታ ናኣ ሶሎሞነስ ኩመꬃ ዎዛና እማ” ያግድ ዎስስ።

20 ሄሳፈ ጉየ፥ ዳዊቲ ደርያኮ፥ “ጎዳ ህንተ ፆሳ ጋላትተ” ያግስ። ደረ ኡባይ ጎዳ ባንታ አዋታ ፆሳ ጋላትዶሶና። ሳአን ጉፋንድ ጎዳ ጎይንዶሶና፤ ካዋስካ ቦንቾ እምዶሶና።

21 ዎንተꬃ ጋላስ አሳይ ያርሾነ ፁሳ ያርሾ ጎዳስ ያርሽዶሶና። ሄስካ እስ ሙኩሉ ኮርማ፥ እስ ሙኩሉ ማራዘ፥ እስ ሙኩሉ ዶርሳ ኡርገ፥ ኡሻ ያርሾነ ሀራ ዳሮ ያርሾ ያርሽዶሶና። 22 አሳይ ሄ ጋላስ ጎዳ ስንꬃን ዳሮ ኡፋይትድ ምስነ ኡይስ። ያትድ አሳይ ካዋ ዳዊታ ናኣ ሶሎሞነ ናምአንꬆ ዛይተ ትይድ እያ ካዎተꬃን ምንꬅስ። ሳዶቃ ካህነ ግዳና መላ ጎዳ ስንꬃን ትይዶሶና።

23 ሄሳፈ ጉየ፥ ሶሎሞነይ ባ አዋ ዳዊታ በሳን ጎዳ ካዎተꬃ አራታን ኡትስ። እያዉ ኡባባይ እንጀትስ፤ እስራኤለ ኡባይ እያዉ ኪተትዶሶና። 24 ሀላቃት፥ ምኖ አሳትነ ካዋ ዳዊታ ናይት ካዋ ሶሎሞነስ ኪተታናዉ ቃላ ገልዶሶና። 25 ጎዳይ ሶሎሞነ እስራኤለ አሳ ኡባ ስንꬃን ꬎቁ ꬎቁ ኦꬅስ፤ ካሰ እስራኤለ ካዎታስ እመትቦና ቦንቾ ሶሎሞነስ እሚስ።

26 እሰየ ናአይ ዳዊቲ እስራኤለ ኡባ ቦላ ካዎትስ። 27 ዳዊቲ እስራኤለ ቦላ ኦይታሙ ላይꬅ ካዎትስ፤ ከብሮናን ላፑን ላይꬅ፥ የሩሳላመን ሀስታማነ ሄꬑ ላይꬅ ካዎትስ። 28 ዳዊቲ ዳሮ ላይꬅ ደእድ፥ ዱረትድ፥ ቦንቸትድ፥ ሎኦ ጭምድ ሀይቅስ። እያ በሳን እያ ናአይ ሶሎሞነይ ካዎትስ። 29 ዳዊቲ ኮይሮፐ ዶምድ ዉርሰꬅ ጋካናዉ ኦꬅዳባይ፥ ቆንጨꬅ በእያ ሳሜላ፥ ናብያ ናታናነ ቆንጨꬅ በእያ ጋደ ታርከ ማፃፋን ፃፈትስ። 30 እ ዋት ሃርዳኮ፥ ዋንዳ ዎልቃማ አሴኮ፥ እ ኦꬅዳባይ፥ እስራኤለ አሳይነ ሄራን ደእያ ካዎተꬃት ኡባይ ሀንዳባይ ሄ ማፃፋታን ፃፈትስ።