1 ጎዳይ እያ ፆሳይ እያራ ደእያ ግሾነ እያ ዳሮ ግታይዳ ግሾ ዳዊታ ናአይ ካዎይ ሶሎሞነይ ባ ካዎተꬃ ምንꬅስ።

2 ሶሎሞነይ እስራኤለ ኡባ፥ ሻላቃታ፥ ማቶ ሀላቃታ፥ ዳናታ፥ እስራኤለ አሳ ካለꬅያ ኡባነ ሶ አሳ ሀላቃታ ፄግድ ሺሽስ። 3 ሄሳፈ ጉየ፥ ሶሎሞነይነ ሺቅዳ አሳ ኡባይ ጋባኦናን ደእያ ꬎቃ ጎይኖ በሳ ብዶሶና። ጎዳ አይለይ ሙሰይ መላ ቢታን ኦꬅዳ ዱንካነይ ያን ደኤስ። 4 ካሰ ዳዊቲ ታቦትያስ የሩሳላመን ዱንካነ ቶክድ፥ ቅርያት-ይኣርመፐ እ ጊግስድ ዎꬅዳ በሳ ኤህስ። 5 ሁራ ናኣ ኡረ ናአይ ባፃልኤል ናሰ ብራታፐ ኦꬅዳ ያርሾ በሳይ፥ ጋባኦናን ጎዳ ዱንካንያ ስንꬃን ደኤስ። ሶሎሞነይነ ሺቅዳ አሳይ ጎዳስ ያን ጎይንዶሶና። 6 ሶሎሞነይ ዱንካንያ ስንꬃን ደእያ ናሰ ብራታፐ ኦሰትዳ ያርሾ በሳኮ፥ ጎዳ ስን ብድ፥ እስ ሙኩሉ ፁሳ ያርሾ ያርሽስ።

7 ሄ ጋላስ ቃማ ፆሳይ ሶሎሞነስ ቆንጭድ፥ “ታ ነዉ አይ እማና መላ ኮያይ?” ያግስ።

8 ሶሎሞነይ፥ “ነ ታ አዋ ዳዊታ ግታ ሲቆን ዶሳዳሳ፤ ታና እያ በሳን ካዎꬃዳሳ። 9 አቤት ጎዳዉ፥ ፆሳዉ፥ ነ ታ አዋ ዳዊታስ ካሰ ግዳ ቃላይ ፖለቶ። ነ ታና ሳአን ደእያ ባናዳ ዳርዳ አሳ ቦላ ካዎꬅዳ ግሾ፥ 10 ታ ሀ አሳ ካለꬃና መላ ታዉ ጭንጫተꬅነ አኬካ እማ። ሄስ ሀኖና እፅኮ፥ ሀ ግታ አሳ ኦን አይሳናዉ ዳንዳኢ?” ያግስ።

11 ፆሳይ ሶሎሞነኮ፥ “ነ ዱረተꬅ ዎይኮ ሻሎ ደማናዉ ዎይኮ ቦንቸታናዉ ዎይኮ ነ ሞርከት ሀይቃና መላ ዎይኮ ነ ላይꬃይ አዱቃና መላ ኦይቾናሽን ታ ነና ካዎꬅዳ ታ አሳ አይሳናዉ ጭንጫተꬅነ አኬካ ኦይችዳ ግሾ፥ 12 ነዉ ጭንጫተꬅነ አኬካ እማና። ቃስ ኔፐ ካሰ ደእዳ ካዎታስ ዎይኮ ኔፐ ጉየ ደንዳና ካዎታስ ባይና ዱረተꬅ፥ ሻሎነ ቦንቾ ነዉ እማና” ያግስ።

13 ሶሎሞነይ ዱንካነይ ጋባኦናን ደእያ፥ ꬎቃ ጎይኖ በሳፈ ስሚድ፥ የሩሳላመ ብድ እስራኤለ ቦላ ካዎትስ።

14 ሶሎሞነይ ፓራ ጋረታነ ፓራታ ሺሽስ። እያዉ እስ ሙኩሉነ ኦይዱ ፄቱ ፓራ ጋረትነ ታማነ ናምኡ ሙኩሉ ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎꬅስ። 15 ካዎይ ዎርቃይነ ብራይ የሩሳላመን ሹቻዳ ዶረታናዳ፥ ጋꬋን ቦቢ ድጭያ መላ ዝጋ ምꬅ ዳራና መላ ኦꬅስ። 16 ሶሎሞነ ፓራት ግብፀፈነ ቃወ ቢታፈ ይዶሶና። ካዋ ዛልአንቾት ኤንታ ቃወፐ ሚሸን ሻምድ ኤሆሶና። 17 ኤንቲ እስ እስ ፓራ ጋርያ ኡሱፑን ፄቱ ብራ ሳንትመን፥ እስ እስ ፓራ እስ ፄታነ እሻታሙ ብራ ሳንትመን ግብፀፈ ሻምድ፥ ህተታ ካዎታ ኡባስነ ሶረ ካዎታስ ባይዞሶና።