1 ሶሎሞነይ ጎዳ ሱንꬃስ ኬነ ባዉ ጋꬎ ኬፃናዉ ሀልችስ። 2 ሶሎሞነይ ቶሆስ ላፑን ታሙ ሙኩሉ አሳነ ገዘ ቢታን ሹቹ ቆአናዉ ሆስፑን ታሙ ሙኩሉ አሳ ዶርስ። ቃስ ኤንታ ዎችያ ሄꬑ ሙኩሉነ ኡሱፑን ፄቱ አሳታ ኤንታ ቦላ ሹምስ።

3 ሶሎሞነይ ፅሮሳ ካዋ ክራማስ ኪታ ኪትድ፥ “ታ አዋይ ዳዊቲ ባ ጋꬎ ኬፃና መላ ኔኒ ዝጋ የድዳይሳዳ ታዉካ የዳ። 4 ሄኮ፥ ሀእ ታ ጎዳ፥ ታ ፆሳ ሱንꬃስ ኬ ኬፃናዉ ሀናይስ። ታ ያን ሳዎ ቶንኩ ግያ እፃነ ጩይሳናዉ፥ ኡባ ዎደ ጎዳ ስንꬃን ኡይꬃ ዎꬃናዉነ ዎንታነ ኦማርስ፥ ሳምባታ ጋላሳን፥ አጌን ፄርያ ዎደነ ጎዳ ኑ ፆሳ ባኣለ ጋላሳታን ፁሳ ያርሾ ያርሻናዉ፥ ፆሳ ኬꬃ ዱማያና። እስራኤለ አሳይ መርናዉ ኦꬃና መላ ኪተትዳ ኦሶት ሀይሳታ።

5 “ኑ ፆሳይ ሀራ ፆሳታ ኡባፈ ግታ ግድያ ግሾ፥ ታ ኬፃናዉ ሀንያ ፆሳ ኬꬃይ ግታ። 6 ሽን እያዉ ኬ ኬፃናዉ ዳንዳኤይ ኦኔ? ሳሎፐ ꬎቃ ሳሎይ እያዉ ግደና! ያትን፥ ታ እያ ስንꬃን እፃነ ጩይሳናዉነ ታ እያዉ ኬ ኬፃናዉ ኦኔ?

7 “ህዛ አሌቆ ኦሶ፥ ዎርቃ፥ ብራ፥ ናሰነ ብራታ ሴርስያ ኦሱዋነ ዞኦ ማኡዋ፥ ኦቻ ቴራ ዳንያ ማኡዋነ ካሎሰ ማኡዋ ጊግስያ ኤራተꬅ ደእያ አሰ ታዉ የዳ። ታ አዋይ ዳዊቲ ይሁዳንነ የሩሳላመን ደእያ ኩሸ ሂላንቾታ ዶር ዎꬅስ፤ እ ኤንታራ እስፈ ኦꬃና። 8 ልባኖሰን ደእያ ነ አሳት ምꬃ ዋት ቃንፅያኮ ኤረይሳ ታ ኤራይስ። ሄሳ ግሾ፥ ኔኒ ታዉ ልባኖሰፐ ዝጋ፥ ፂዳነ ፃይꬃ ምꬅ የዳ። ታ አሳት ነ አሳታራ ግድድ፥ 9 ዳሮ ምꬃ ጊግሳና። ታኒ ኬፅያ ፆሳ ኬꬃይ ግታነ ማላልስያባ። 10 ምꬅ ቃንፅያ ነ አይለታ ታኒ ላታሙ ሙኩሉ ኩንታለ ግስተነ ላታሙ ሙኩሉ ኩንታለ ባንጋ፥ ኦይዱ ፄቱ ሙኩሉ ልትሮ ዎይነነ ኦይዱ ፄቱ ሙኩሉ ልትሮ ሻማሆ ዛይተ እማና” ያግስ።

11 ፅሮሳ ካዎይ ክራም ሶሎሞነኮ ዳብዳበ የድሸ፥

12 ክራም ጉጅድ፥ “ፆሳ ኬꬃነ ባዉ ጋꬎ ኬፃና መላ ጭንጫ፥ አኬካነ ሂላ ናኣ ካዋ ዳዊታስ እምዳ፥ ሳሎ ሳኣ መꬍዳ ጎዳይ፥ እስራኤለ ፆሳይ ጋላተቶ።

13 “ታኒ ክራም-አብ ጌተትያ ሂላንቾነ አኬካ አድያ ነዉ የዳስ። 14 እያ አይያ ዳነ ኮቸ፤ እያ አዋይ ፅሮሳ ቢታ አሳ። እ ዎርቃ፥ ብራ፥ ናሰ ብራታ፥ ብራታ፥ ሹቹነ ምꬅ ኦꬅያ አስ፤ ኦቻ ቴራ ዳንያ ማኦ፥ ካሎሰ ማኦ፥ ዞኦ ማኦነ ሊኖ ማኦ ጊግስያ ኦሶ ኤሬስ። እ ዱማ ዱማ አሌቆታ ከስድ፥ ኦደይሳዳ ኡባ ኦꬃናዉ ዳንዳኤስ። እ ኩሸ ሂላን ሎህዳ ነ አሳራነ ካሰ ነ አዋ፥ ዳዊታስ ኦꬅዳ አሳራ እያ ኦስሳ። 15 ህዛ ነ ታ ጎዳይ እማና ግዳ ግስትያነ ባንጋ፥ ዛይትያነ ዎይንያ የዳ። 16 ኔኒ ልባኖሰፐ ኮይዳ ምꬅ ኑ ቃንፅድ ቃችድ፥ አባ ቦላራ ቶከትድ፥ ኔኮ ዮጰ ባናዳ ኦꬃና። ያፐ ኔኒ የሩሳላመ ጋካናዉ ኤፍሳና” ያግስ።

17 እያ አዋይ ዳዊቲ ካሰ ታይብዳይሳዳ፥ ሶሎሞነይ እስራኤለ ቢታን ደእያ ካረ ቢታ አሳ ኡባ ታይብስ። ኤንቲ ፄታነ እሻታማነ ሄꬑ ሙኩሉነ ኡሱፑን ፄታ ግድዶሶና። 18 ሶሎሞነይ ሄ አሳፐ ላፑን ታሙ ሙኩሉ አሳ ቶሆስ፥ ሆስፑን ታሙ ሙኩሉ አሳ ገዘ ቢታን ሹቻ ቆአናዉ ዶርስ፤ ኤንታ ዎቻናው ሄꬑ ሙኩሉነ ኡሱፑን ፄቱ አሳ ሹምስ።