1 ታኒ አሳ ቃላነ ኪታንቾ ቃላ ኦደታናዉ ዳንዳእኮካ፥ ታዉ ሲቆይ ꬋይኮ፥ ጮ ጊርያ ዳላ መላ። 2 ትንብተ ኦድያ እሞት ታዉ ደእኮካ፥ ፁራ ኡባ ኤርኮካ፥ ኤራተꬅ ኡባይ ደእኮካ፥ ቃስ ደርያ ደንꬅድ ሀራሶ ኤፍያ አማኖይ ታዉ ደእኮካ፥ ሲቆይ ꬋይኮ፥ ታ አይኮካ ግድከ። ማቶ 17:20፤ 21:21፤ ማር 11:23. 3 ታዉ ደእያባ ኡባ ማንቆታስ እምኮካ፥ ሀር አቶሽን፥ ታና ታማስ አꬃ እምኮካ፥ ሲቆይ ꬋይኮ ታና አይኮካ ማደና።

4 ሲቆይ ዳንዳአንቾ። ሲቆይ ኬሀ። ሲቆይ ቃናተና። ሲቆይ ጬቀተና። ሲቆይ ኦቶረና። 5 ሲቆይ በሶናባ ኦና። ሲቆይ ኡዘተና። ሲቆይ ይሎተና። ሲቆይ ባ ቆሆ ፓይደና። 6 ሲቆይ ቱማን ኡፋይተስፐ አትሽን፥ ዎርዶን ኡፋይተና። 7 ሲቆይ ኡባ ዳንዳኤስ፤ ኡባ አማኔስ፤ ሎኦባይ ሀናና ግድ፥ ኡፋይሳን ናጌስ፤ ኡባ ገንጬስ።

8 ሲቆይ ዉርሰꬅ ጋካናዉ ꬋየና። ሽን ትንብተይ አታና፤ ዱማ ዱማ ዶናን ኦደተይስ አታና፤ ኤራተꬅካ አꬋና። 9 ኑ ኤራተꬃፈ ጉꬅ ኤሮስ፤ ትንብተፐ ባጋ ኦዶስ። 10 ሽን ፖሎ ግድዳይስ ያ ዎደ ፖሎ ግዶናይስ አታና።

11 ታኒ ናአ ደእያ ዎደ ናአዳ ሃሳይስ፤ ናአዳ ቆፓይስ፤ ናአዳ አኬካይስ። ታ ካሃምዳ ዎደ ናአተꬃ ሀኑዋ አጋስ። 12 ሀእ ፖኦይ ባይና ሶን ማስቶተን በኤይሳዳ በኦስ፥ ሽን ሄ ዎደ ኑ ቆንጨን በአና። ሀእ ኑ ኤራተꬃፈ ጉꬃ ኤሮስ፥ ሽን ሄ ዎደ ፆሳይ ኑና ኤረይሳዳ ፖሎ ኤራና።

13 ህዛ፥ አማኖይ፥ ኡፋይስነ ሲቆይ፥ ሀ ሄꬓት ኤቅድ ዳና። ሽን ሀይሳታፐ አይ ሲቆ።