1 ታ እሻቶ፥ ጌሻ አያና እሞታታባ ህንተ ኤራና መላ ታ ኮያስ። 2 ህንተ ፆሳ አማኖና ዎደ ዶን ባይና ኤቃታን ጎሸትድ፥ ህንተ ኤሮና ሶ ብዳይሳ ኤሬታ። 3 ፆሳ አያናይ ካለꬅያ አስ ኦንካ፥ “የሱሲ ባደቶ” ያገና። ቃስ ጌሻ አያናይ ካለꬆና ደእሽን፥ ኦንካ፥ “የሱሲ ጎዳ” ጋናዉ ዳንዳኦናይሳ ህንተ ኤራና መላ ኮያይስ።

4 ዱማ ዱማ አያና እሞታት ደኦሶና፥ ሽን እሞታታ እምያ አያናይ እሱዋ። ሮመ 12:6-8. 5 ኑ ጎዳስ ኦꬅያ ዱማ ዱማ ኦሶት ደኦሶና፥ ሽን ጎዳይ እሱዋ። 6 ኑ ጎዳስ ኦꬅያ ዱማ ዱማ ኦገት ደኦሶና፥ ሽን ሄ ኦገታን ኦꬅያ አሳ ኡባን ኦꬅያ ፆሳይ እሱዋ። 7 ሽን እሱዋስ እሱዋስ እመትዳ እሞታታን ሀራታ ማዳና መላ ጌሻ አያናይ ቆንጬስ።

8 ጌሻ አያናይ እሱዋስ ጭንጫተꬅ ኩምዳ ቃላ እሜስ፤ ቃስ እሱዋስ ኤራተꬅ ኩምዳ ቃላ እሜስ። 9 ሄ ጌሻ አያናይ እሱዋስ አማኖ፥ ሀንኩዋስ ቃስ ፓꬅያ ዎልቃ እሜስ። 10 ጌሻ አያናይ እሱዋስ ማላታ ኦꬅያ ዎልቃ፥ እሱዋስ ትንብተ ኦድያ ዎልቃ እሜስ። እሱዋስ አያናፐ አያና ሻክ ኤርያ ዎልቃ፥ እሱዋስ ዱማ ዱማ ዶናን ኦድያ ዎልቃ፥ ቃስ እሱዋስ ዱማ ዱማ ዶናን ኦደትዳይሳ ብርሽያ ዎልቃ እሜስ። 11 ሽን ሀ ኡባ ኦይ ሄ እስ ጌሻ አያና። እ ኮይያ መላ እስ እስ አሳስ ዱማ ዱማ እሞታ እሜስ።

12 እስ አሳተꬃን ዳሮ ብልተት ደኦሶና፥ ሽን ሄ ዱማ ዱማ ብልተት እስ አሳተꬅ ግዶሶና። ሄሳዳካ፥ ክርስቶስ ዱማ ዱማ ብልተት ደእያ አሳተꬃ መላ። ሮመ 12:4-5. 13 ኑኒ አይሁደ ግድን ግርከ ግድን አይለ ግድን ዎማኖ ግድን፥ ኡባይ እስ አሳተꬅ ግዳናዉ ጌሻ አያናን ፃማቀትዳ። ቃስ ኑ ኡባይ እስ ጌሻ አያና ኤክዳ።

14 ኑ አሳተꬃን ዱማ ዱማ ብልተት ደኦሶናፐ አትሽን፥ እስ ብልተ ግደና። 15 ቶሆይ፥ “ታኒ ኩሸ ግዶና ግሾ ብልተ ግድከ” ጊኮ፥ እ ሄሳ ግዳ ግሾ ብልተተꬃይ አትዬ? 16 ሀይꬅ፥ “ታኒ አይፈ ግዶና ግሾ ብልተ ግድከ” ጊኮ፥ እ ሄሳ ግዳ ግሾ አሳተꬃፈ እስ ብልተ ግደይስ አትዬ? 17 አሳተꬃ ኡባይ አይፈ ፃላላ ግድዳኮ፥ ኑ አይብን ስአኔ? ቃስ አሳተꬅ ኡባይ ሀይꬃ ፃላላ ግድዳኮ ኑ አይብን ስንጋኔ?

18 ሽን ፆሳይ ባ ኮይዳይሳዳ፥ አሳተꬃ ግዶን ዱማ ዱማ ብልተታ ዎꬅስ። 19 ኡባይ እስ ብልተ ግድዳኮ አሳተꬅ ዋንድ ዳኔ? 20 ሽን ብልተት ዳሮ ግድኮካ፥ አሳተꬃይ እሱዋ።

21 አይፈይ ኩሸኮ፥ “ነ ታዉ ኮሻካ” ጋናዉ ዳንዳኤና። ዎይኮ ሁጰይ ቶሆኮ፥ “ነ ታዉ ኮሻካ” ጋናዉ ዳንዳኤና። 22 ሽን ዳቡራ ዳንያ አሳተꬃ ብልተት ኑስ አꬍድ ኮሾሶና። 23 ቦንቾ ኮሸና ግድ ኑ ቆፕያ ኑ ብልተታፐ ባጋታ ዳሮ ቦንቾስ። ቃስ ኑ ቦርሰትያ ኑ አሳተꬃ ብልተታ አꬅድ ቦንችድ ናጎስ። 24 ኑ በእን ቦርሶና አሳተꬃ ብልተታስ ቦንቾ ኮሸና። ሽን ፆሳይ ኑ አሳተꬃ ብልተታ ዎልራ ጋሰꬅድ ቦርስያ ብልተታስ አꬍያ ቦንቾ እሚስ። 25 አሳተꬃ ብልተት እሶይ እሱዋራ ሻኮ መꬎና ዎልስ ቆፓና መላ ኦꬅድ መꬍስ። 26 አሳተꬃ ብልተታፐ እሶይ ሳከትኮ ብልተት ኡባይ እያራ ሳከቶሶና። አሳተꬃ ብልተታፐ እሶይ ቦንቸትኮ ብልተት ኡባይ እያራ ኡፋይቶሶና።

27 ህንተ ኡባይ ክርስቶሳ አሳተꬅ፤ ቃስ ህንተ እሶይ እሶይ እያ ብልተታ። 28 ዎሳ ኬꬃን ፆሳይ፥ ኮይሮ ሀዋረታ፥ ናምአንꬆ ናበታ፥ ሄꬓንꬆ አስታማረታ፥ ካልድ ማላታ ኦይሳታ፥ ፓይሳታ፥ ሀራታ ማደይሳታ፥ ዎሳ ኬꬃ አይሰይሳታነ፥ ዱማ ዱማ ዶናን ኦደተይሳታ ዎꬅስ።ኤፈ 4:11.

ቃስ ኡባፈ አꬍያ ኦግያ ታ ህንተና በሳና።