11
1 ታኒ ክርስቶሳ ሌምሱዋ ካለይሳዳ፥ ህንተካ ታና ካልተ። 2 ቆሮ 4:16፤ ፍልጵ 3:17.
ጎይኖ ማራ
2 ህንተ ኡባባን ታና ቆፕያ ግሾነ ታኒ ታማርስዳ ትምርትያ ምንꬅድ ናግዳ ግሾ ታኒ ህንተና ጋላታይስ። 3 ሽን ክርስቶስ አደ ኡባስ ሁጰ፥ አደይ ማጫሳስ ሁጰ፥ ቃስ ፆሲ ክርስቶሳስ ሁጰ ግደይሳ ህንተ ኤራና መላ ኮያይስ። 4 ባ ሁጵያ ጉሉንትድ ፆሰ ዎስያ ዎይኮ ትንብተ ኦድያ አደይ ኡባይ ሁጰ ግድዳ ክርስቶሳ ቶቼስ። 5 ባ ሁጵያ ቃጮና ፆሰ ዎስያ ዎይኮ ትንብተ ኦድያ ማጫስያ ሁጰ ግድዳ ባ አዝና ቶቻዉሱ። ባ ሁጵያ ቃጮና ማጫስያ ባ ሁጵያ ሜደትዳ ማጫሳ መላ።
6 ማጫስ ባ ሁጰ ካሞና እፅኮ፥ ባ ሁጵያ ቃንፀቶ። ሽን እዉ ሁጰ ቃንፆይ ዎይኮ ሜዶይ ቦርሶ ግድኮ፥ ባ ሁጵያ ቃጮ። 7 አደይ ፆሳ ሌምሶነ ፆሳ ቦንቾ ግድያ ግሾ፥ ባ ሁጵያ ካማናዉ በሰና፥ ሽን ማጫስ አደስ ቦንቾ። መ 1:26-27. 8 ማጫስ አደፈ መታሱፐ አትሽን፥ አደይ ማጫሳፐ መትቤና።መ 2:18-23. 9 ማጫስ አደስ መትስፐ አትሽን፥ አደይ ማጫሳስ መትቤና። 10 ሀይሳ ግሾነ ኪታንቾታ ግሾ ማጫስ ባዉ ማት ደኤይሳ በሲያ ማላ ባ ሁጰን ቃጫናዉ በሴስ።
11 ሽን ጎዳ ቆፋን ማጫስ አደይ ባይና ዴና፤ አደይካ ማጫስ ባይና ዴና። 12 ማጫስ አደፈ መትዳይሳዳ አደይካ ማጫሳፐ የለትስ። ሽን ኡባይካ ፆሳፈ መትስ።
13 አነ ህንተ ፕርድተ፤ ማጫስ ባ ሁጰ ካሞና ፆሳ ዎሳናዉ በሲ? 14 አደይ ባ ሁጵያ ድችኮ እያዉ ቦርሶ ግደይሳ ሀር አቶሽን መተꬅ ህንተና ታማርሰኔ? 15 ሽን ማጫስ ባ ሁጰ ድችኮ እዉ ቦንቾ ግደኔ? ማጫሳስ ሁጰይ እመትዳይ እያ ባና ካማና መላሳ። 16 ሽን ሀይሳ ቦላ ፓላማናዉ ኮያ አስ ደእኮ፥ ኑስ ግድን ዎይኮ ፆሳ ዎሳ ኬꬃታስ ግድን ሀይሳፈ ሀራ ዎግ ባዋ።
ጎዳ ካሆ ኤኮ ማራ
(ማቶ 26:26-29፤ ማር 14:22-25፤ ሉቃ 22:14-20)
17 ህንተ እስፈ ሺቀይ ጎአስ ግዶናሽን ቆሆስ ግድያ ግሾ፥ ሀእ ታኒ እምያ ኪታን ህንተና ናሽከ። 18 ታኒ ኮይሮ ስእዳይ፥ ዎሳ ኬꬃን ሺቅያ ዎደ ህንተ ግዶን ሻከተꬅ ደኤይሳ። ሀ ታ ስእዳይስ ቱማ ግደይሳ አማናይስ። 19 ህንተ ግዶፈ ቱም ደኤይሳት ኦናንተኮ ኤረታና መላ ህንተ ግዶን ሻሆይ ዳናይስ አተና። 20 ህንተ እስፈ ሺቅያ ዎደ ህንተ ሺቀይ ጎዳ ካሁዋ ማናሳ ግደና። 21 ህንተ ካꬅ ምያ ዎደ እሶይ እሱዋ ናጎና ባይሳ ባይሳ ምያ ግሾ፥ እሶይ ኮሻቴስ ሀንኮይ ቃስ ማꬆቴስ። 22 ቱማ ህንተ ማናዉነ ኡያናዉ ህንተዉ ኬꬅ ባዌ? ዎይኮ ፆሳ ዎሳ ኬꬅ ካꬌቲ? አይኮይ ባይና ማንቆታ ዬላየቲ? ታ ህንተና ዎይጎ? ሀይሳስ ታ ህንተና ናሾዬ? ናሽከ።
23 ታኒ ህንተዉ እምዳ ትምርትያ ጎዳፐ ኤካስ። ጎዳይ የሱሲ አꬍድ እመትያ ቃማ ኡይꬁ ኤክድ፥ 24 ፆሳ ጋላትስ። ኡይꬃ ባꬅድ “ሄእተ፤ ሚተ። ሀይስ ህንተዉ እመትያ ታ አሹዋ። ሀይሳ ምሸ ታና ሀሳይተ” ያግስ። 25 ሄሳዳካ፥ ካሁዋ ምድ ስምን፥ ፁኣ ኤክድ፥ “ሀይስ ፁአይ ታ ሱꬃን ኤቅያ ኦራꬃ ጫቁዋ። ህንተ እያፐ ኡያ ዎደ ኡባን ታና ሀሳይተ” ያግስ። ከሳ 24:6-8፤ ኤርም 31:31-34. 26 ህንተ ሀ ኡይꬃ ምያ ዎደነ ሀ ፁአ ኡያ ዎደ ኡባን ጎዳይ ያና ጋካናዉ እያ ሀይቁዋ ኦዴታ።
27 ሄሳ ግሾ፥ በሶና ኦገን ጎዳ ኡይꬃ ምያ ዎይኮ ጎዳ ፁአ ኡያ ኦንካ እያ አሹዋነ ሱꬃ ቶችዳ ግሾ ባ ናጋራን ኦይሸቴስ። 28 ሽን አስ ባና ፓጮ። ያትድ ኡይꬃ ሞ፤ ፁአፐ ኡዮ። 29 ጎዳ አሹዋባ ሻክድ ኤሮና፥ ኡይꬃ መይነ ፁአፐ ኡየይ፥ ባ ቦላ ፕርዳ ሜስነ ኡዬስ። 30 ሄሳ ግሾ፥ ህንተ ግዶፈ ዳሮት ዳቡርዶሶና፤ ሀርግዶሶና፤ ቃስ ኡንደና አሳት ሀይቅዶሶና። 31 ሽን ኑኒ ኑና ፓጭድ በእዳባ ግድያኮ፥ ኑ ቦላ ፕርደታናሽን። 32 አላመይ ፕርደትያ ዎደ ኑኒ አላምያራ ፕርደቶና መላ ሀእ ጎዳይ ኑና ሴሬስ።
33 ሄሳ ግሾ፥ ታ እሻቶ፥ ጎዳ ካሁዋ ኤካናዉ ህንተ ሺቅያ ዎደ እሶይ እሱዋ ናግድ ኤክተ። 34 ህንተ ሺቆይ ፕርዳስ ግዶና መላ ኮሻትዳ ኦንካ ደእኮ፥ ባ ሶን ሞ።
አትዳባ ታኒ ያ ባዳ ህንተዉ ኦዳና።