1 ታ እሻቶ፥ ታኒ ህንተ ሀይሳ አኬካና መላ ኮያይስ። ኑ ማይዛት ኡባይ ሻራፐ ጋርሳራ ሄመትዶሶና፤ ኡባይ አባ ፕንዶሶና። ከሳ 13:21-22፤ 14:22-29. 2 ኤንቲ ሙሰራ እስፋናዉ ሻራንነ አባን ፃማቀትዶሶና። 3 ኤንቲ ኡባይ እስ አያና ካꬅ ምዶሶና። ከሳ 16:35. 4 ቃስ ኡባይ እስ አያና ኡሻ ኡይዶሶና። ኤንቲ ባንታና ካልያ አያና ዛላፈ ፑልትዳ ኡሻ ኡይዶሶና፤ ሄ ዛላይካ ክርስቶሳ። ከሳ 17:6፤ ታይቦ 20:11. 5 ሽን ፆሳይ ኤንታፈ ዳሮታን ኡፋይትቦና ግሾ፥ ኤንታ አሀይ መላ ቢታን ዎꬍድ አትስ። ታይቦ 14:29-30.

6 ኤንቲ ኢታባ አሞትዳይሳዳ፥ ኑካ ኢታባ አሞቶና መላ ሄ ኡባይ ኑስ ሌምሶ ግድስ። ታይቦ 11:4. 7 ጌሻ ማፃፋን፥ “አሳይ ማናዉነ ኡያናዉ ኡትዶሶና፤ ቃስ የፃናዉ ደንድዶሶና” ጌተትዳይሳዳ ኤንታፈ እሶት እሶት ኤቃ ጎይንዳይሳ መላ ህንተ ኤቃ ጎይኖፍተ። ከሳ 32:6. 8 ኤንታፈ እሶት እሶት ላይማትዳይሳዳ ኑ ላይማታናዉ በሰና። ሄሳ ጋሶን ኤንታፈ እስ ጋላስ ላታማነ ሄꬑ ሙኩላይ ሀይቅስ። ታይቦ 25:1-18. 9 ኤንታፈ እሶት እሶት ጎዳ ፓጭድ ሾሻን ዱከትድ ሀይቅዳይሳዳ ኑ ጎዳ ፓጫናዉ በሰና። ታይቦ 21:5-6. 10 ኤንታፈ እሶት እሶት ዙዙምድ ሀይቆ ኤህያ ኪታንቹዋን ꬋይዳይሳዳ ህንተካ ዙዙሞፍተ። ታይቦ 16:41-49.

11 ሀ ኤንታ ቦላ ጋክዳ ኡባይ ኑ ናገታና መላ ኑስ ሌምሶ ግድስ። ቃስ ዎደ ዉርሰꬃ ቦላ ደእያ ኑስ ትምርተ ግዳና መላ ሀ ኡባይ ፃፈትስ።

12 ሄሳ ግሾ፥ ታ ኤቃስ ግያ ኦንካ ኩንዶና መላ ባና ናጎ። 13 አሰ ኡባ ጋክያ ፓጨፐ አትሽን፥ ዱማ ፓጨይ ህንተና ጋክቤና። ህንተ ዎልቃይ ዳንዳኤይሳፈ አꬍያ ፓጨን ህንተ ፓጨቶና መላ አꬅድ እሞና ፆሳይ አማነትዳይሳ። ህንተና ፓጨይ ጋክያ ዎደ ሄ ፓጭያ እ ህንተና ዳንዳእሳና። ቃስ ሄ ፓጭያፐ ህንተ ከያና ኦግያ እ ጊግሳና።

14 ህዛ፥ ታ አልኦ እሻቶ፥ ኤቃ ጎይኖፈ ሃክተ። 15 ህንተ ዎዛናማ አስ ግድዳ ግሾ ታ ሀይሳ ኦዳይስ። ታኒ ገይስ ቱማ ግደይሳ ህንተ ህንተ ሁጰን ፕርድተ። 16 ኑኒ ፆሳ ጋላትድ ሻከትያ አንጆ ፁአይ ክርስቶሳ ሱꬃራ እስፈተꬅ ደኤይሳ ግደነዬ? ቃስ ኑኒ ባꬅያ ኡይꬃይ ክርስቶሳ አሹዋራ እስፈተꬅ ደኤይሳ ግደነዬ?ማቶ 26:26-28፤ ማር 14:22-24፤ ሉቃ 22:19-20. 17 ኑኒ ዳሮ ግድኮካ ኡይꬃይ እስኖ፥ ኑ ሄ እስ ኡይꬃ ሻከትያ ግሾ እስ አሳተꬅ።

18 አነ እስራኤለ አሳይ ኦꬅዳይሳ አኬክተ። ያርሸትዳ ያርሹዋ መይሳት ያርሾ በሳራ እስፈተꬅ ባወዬ?ሌወ 7:6. 19 ታኒ አይ ጋናዉ ኮያዳ ጋይና? ኤቃስ ያርሸትዳ ካꬃይ ዎይኮ ኤቃይ ፓꬅያባ ጉሰዬ? 20 ግደና፥ ኤንቲ ያርሸይ ፆሳስ ግዶናሽን፥ ቱና አያናታሳ። ሄሳ ግሾ፥ ህንተዉ ቱና አያናታራ እስፈተꬅ ዳና መላ ኮይከ። ዛረ 32:17. 21 ህንተ ጎዳ ፁአፐ ኡይሸ፥ ቃስ ቱና አያናታ ፁአፐ ኡያናዉ ዳንዳኤከታ። ጎዳ ጋይታፐ ምሸ ቃስ ቱና አያናታ ጋይታፐ ማናዉ ዳንዳኤከታ። 22 ኑኒ ሄሳ ኦꬅድ ጎዳ ይሎይኖ? ኑኒ እያፐ አꬍያ ምኖዬ?ዛረ 32:21.

23 ህንተ፥ “ኡባባ ኦꬆና መላ ድግያባይ ባዋ” ጌታ፥ ሽን ኡባይ ማደና። ህንተ፥ “ኡባባ ኦꬆና መላ ድግያባይ ባዋ” ጌታ፥ ሽን ኡባይ ድቸና። 2 ቆሮ 6:12. 24 እስ እስ አስ፥ ሀራ አስ ማድያባ ቆፓናዉ በሴስፐ አትሽን፥ ባና ማድያባ ፃላላ ቆፖፎ።

25 ህንተ ካሀ ስን ገልስያ ኦይሻ ደንꬆና ግያን ባይዘትያ አሹዋ ጮ ሚተ። 26 አይስ ጊኮ፥ ሳእነ ሳአን ደእያ ኡባይ ጎዳባ። ማዝ 24:1.

27 እስ አማኖና አስ ህንተና እማታናዉ ኮይድ ፄግኮ ባናዉ ኮይኮ ቢተ። ህንተ ካሀን መትያ ኦይሻን ስꬎና ህንተ ስን አꬅያባ ኡባ ሚተ። 28 ሽን እስ አስ፥ “ሀይስ ኤቃስ ያርሸትዳባ” ጊኮ፥ ሄ ህንተዉ ኦድዳ አድያ ግሾነ ካሀ ግሾ ሄ ካꬃ ሞፕተ። 29 ታኒ፥ ካሀ ግሾ ገይ፥ ሄ ህንተዉ ኦድዳ ኡራ ካሀ ጉሱፈ አትሽን፥ ህንተ ካሀ ግደና።

ሀራ አሳ ካሀ ግሾ ጋዳ ታኒ ታ ላአተꬃ ቦላ አይስ ፕርዶ? 30 ታኒ ምያ ካꬃ ፆሳ ጋላታዳ ሚኮ ባልዳዳ አይስ ቦረትያና?

31 ህዛ፥ ህንተ አይ ሚኮ አይ ኡይኮ፥ ዎይኮ አይ ኦꬅኮካ ኡባባ ፆሳ ቦንቾስ ኦꬅተ። 32 አይሁደታ ግድን ግርከታ ግድን ዎይኮ ፆሳ ዎሳ ኬꬅ ግድን ኦደስካ ꬉበ ግዶፕተ። 33 ታኒ ኡባ ዎደ ዳሮታ አሻናዉ ኤንቲ ማደትያ ኦገ ኮያይስፐ አትሽን ታና ማድያ ኦገ ኮይከ።