1 ታኒ የዳ ደእያ አስ ግድክና? ታ ሀዋረ ግድክና? ታኒ ኑ ጎዳ የሱስ ክርስቶሳ በአብክና? ህንተ ጎዳን ታ ዳቡራ አይፈ ግደከቲ? 2 ህንተ ጎዳባ ግድያ ግሾ፥ ታ ሀራታስ ሀዋረ ግዶና እፅኮካ፥ ህንተዉ ሀዋረ ግደይሳስ ህንተ ማርካ።

3 ታና ሀዋረ ግደና ገይሳታስ ታኒ እምያ ዛሮይ ሀይሳ። 4 ኑ ህንተፈ ማናዉነ ኡያናዉ ቱማ ኑስ ማት ባዌ? 5 ሀንኮ ሀዋረታዳ፥ ጎዳ እሻታዳነ ጰፅሮሳዳ፥ አማንያ ኑ ማቸታ ኤክድ ሄመታናዉ ኑስ ማት ባዌ? 6 ዎይኮ ኦꬅድ አቃናዉ በሰይ ታራነ ባርናባሳ ፃላሌ? 7 ባ ሚሸን ዎታዳረታꬅ ኦይ ኦኔ? ዎይኮ ዎይነ ቶክድ፥ እያፐ አይፈ ሞናይ ኦኔ? ዎይኮ ዉደ ሄምሸ፥ ሄ ዉድያፐ ማꬅ ኡዮናይ ኦኔ?

8 ታኒ ሄሳ አሳ ቆፋꬆ ጋይናዬ? ሙሰ ህገይ ሄሳ ጌነዬ? 9 ሙሰ ህግያን፥ “ዉዱማን ካꬅ የꬍያ ቦራ ዶና ቃቾፋ” ጌተትድ ፃፈትስ። ያትን ፆሳይ ሄሳ ቦራስ ቆፕድ ኦድዴ?ዛረ 25:4፤ 1 ፅሞ 5:18. 10 ፆሳይ ሄሳ ግዳይ ኑስ ቆፕድ ግደኔ? ኤ፥ ኑ ግሾሳ። ቢታ ጎየይስነ ካꬃ ጌሸይስ ባና ጋከይሳ ኤካና ግድ ኡፋይሳን ኦꬃናዉ በሴስ ጌተትድ ቱማ ኑ ግሾ ፃፈትስ። 11 ኑኒ ህንተ ግዶን አያና ዘረꬅ ዘርዳ ግድኮ፥ አሾስ ኮሽያባ ኑ ህንተፈ ኤክኮ፥ ሄስ ግታባዬ?ሮመ 15:27. 12 ሀራት ሄሳ ህንተፈ ኤካናዉ ኤንታዉ ማት ደእኮ፥ ኑስ ኤንታፈ አꬍያ ማት ዴኔ?

ሽን ኑኒ ክርስቶሳ ዎንገላስ ꬉበ ግዶና መላ፥ ኡባባ ገንጮስፐ አትሽን፥ ሄ ማታን ጎኤትቦኮ። 13 ፆሳ ኬꬃን ኦꬅያ አሳት ባንታ ካꬃ ፆሳ ኬꬃፈ ኤከይሳ ኤረከቲ? ቃስ ያርሾ በሳን ኦꬅያ አሳት ያርሹዋፈ ኤከይሳ ኤረከቲ?ዛረ 25:4፤ 1 ፅሞ 5:18. 14 ሄሳዳካ፥ ዎንገላ ማርካተይሳት ዱሳስ ኮሽያባ ዎንገላፐ ኤካና መላ ጎዳይ ኪትስ። ማቶ 10:10፤ ሉቃ 10:7.

15 ሽን ታኒ ሀ ማታ ኡባን አይኮካ ጎኤታብከ። ታኒ ሄሳ ፃፍዳይ ታ ማታ ቦንችሳናዉ ኮያዳ ግደና። ኦንካ ታ ጬቁዋ ሀዳ ኦꬃናፐ ሀይቆይ ታዉ ሎኦ። 16 ታኒ ዎንገላ ኦደይ ኪተትዳ ግሾሳፈ አትሽን፥ ታና ጬቅስያባ ግደና። ዎንገላ ኦዶና እፅኮ፥ ታና አየ!። 17 ታኒ ዎንገላ ዶሳዳ ኦድኮ፥ ታዉ ዎይቶይ ደኤስ። ሽን ታኒ ዎንገላ ዶሶና ኦድያባ ግድኮ፥ ሄሳ ፆሲ ታዉ ሀዳራ እሚስ። 18 ያትን፥ ታ ዎይቶይ አይቤ? ታኒ ዎንገላ ኦድያ ዎደ ታ ማታን ጎኤቶና፥ ዎንገላ ጋተይ ባይና ኦደይስ ታዉ ዎይቶ።

19 ታኒ ኦደስካ አይለ ግድከ፥ ሽን ዳሮታ ማዳናዉ ኡባስ አይለ ግዳስ። 20 ታኒ አይሁደታ ማዳናዉ ኤንታራ ኤንታ ግዳስ። ታ ሁጰን ህገፈ ጋርሳን ደእከ፥ ሽን ህገፈ ጋርሳን ደኤይሳታ ማዳናዉ ህገፈ ጋርሳን ደእያ አስ ግዳስ። 21 ፆሳ ህግያፈ ካረ ከዮና፥ ክርስቶሳ ህግያስ ኪተታሸ፥ ህገይ ባይናይሳታ ማዳናዉ ህገይ ባይና አሳዳ ሀናስ። 22 ታኒ ዳቡራንቾታ ማዳናዉ ዳቡራንቾ ግዳስ። ታኒ እሶታ እሶታ ማዳናዉ ኡባራ ኡባባ ሀናስ። 23 ታኒ ዎንገላ አንጁዋ ሻከታናዉ፥ ዎንገላ ግሾ፥ ሀ ኡባ ሀናስ።

24 ዎꬃን ጋደትያ ኡባይ ዎፄስ፥ ሽን እሱዋ ፃላል ዎይቶ ኤከይሳ ኤረከቲ? ሄሳዳ ህንተካ ዎይቶ ኤካናዉ ዎፅተ። 25 ጋደትያ አሳ ኡባይ ኡባባን ባንታና ሃሬስ። ኤንቲ ሄሳ ዳቡረይ ꬋይያ ዎይቶ ኤካናሳ። ሽን ኑኒ ዳቡረይ መርና ዎይቶ ኤካናሳ። 26 ሄሳ ግሾ፥ ታኒ ቆፍ ባይና አሳዳ ዎፅከ። ጫርኮ ይምፕያ አሳዳ ጮ ኩሸ የድከ። 27 ሽን ታኒ ሀራታስ ዎንገላ ኦድዳፐ ጉየ፥ ታኒ ታ ሁጰን የገትዳ አስ ግዶና መላ ታ አሳተꬃ ዎልቃን ሃራዳ ታዉ ኪተታና መላ ኦꬃይስ።