1 ኤቃስ ያርሸትያ ካꬃባ ግድኮ ኑ ኡባይ ኤሮስ። ኤራተꬅ ኦቶርሴስ፥ ሽን ሲቆይ ድቼስ። 2 ኦንካ ባና ኤራይስ ግድ ቆፕኮ፥ እ ቡሮ ኤራናዉ በሰይሳ ኤርቤና። 3 ሽን ኦንካ ፆሰ ሲቅኮ፥ እ ፆሳ ማታን ኤረትዳይሳ።

4 ሄሳ ግሾ፥ ኤቃስ ያርሸትዳ ካꬅ ሙሳባ ግድኮ፥ ሀ አላምያን ጎድ እስ ፆሳፈ አትሽን፥ ሀር ባይና ግሾ፥ ኤቅ ፓꬆናባ ግደይሳ ኑኒ ኤሮስ። 5 ፆሰ ግዶናሽን፥ ሳሎንነ ሳአን ፆሰ ጌተትድ ፄገትያ ዳሮ ፆሳትነ ጎዳት ደእኮካ፥ 6 ኡባባ መꬍዳ፥ ኑ እያባ ግድዳ፥ እስ ፆሲ፥ አው፥ ኑስ ደኤስ ዛረ 6:4፤ 10:13.። ኡባይ እያ ባጋራ መትዳ፥ ኑካ እያ ባጋራ ደኦ ደምዳ እስ ጎዳይ፥ የሱስ ክርስቶሲ ኑስ ደኤስ።

7 ሽን ሀ ኤረይ ኡባ ማታን ዴና። እስ እስ አሳይ ኤቃ ጎይኖራ ሜዘትዳ ግሾ፥ ካꬅ ምያ ዎደ ኤቃስ ያርሸትዳባ ኦꬅድ ኤኮሶና። ሄ ዎደ ኤንታ ካሀይ ዳቡራ ግድያ ግሾ ቱኔስ። 8 ሽን ካꬅ ኑና ፆሳራ ዳቦየና። ኑ ሞና አግድ አይኮካ ቆሄቶኮ፤ ቃስ ምድ ዱማ ጎኤቶኮ።

9 ሽን ህንተ ኮይዳባ ማናዉ ማት ህንተዉ ደእኮካ ሄስ አማኖን ምኖና አሳታ ꬉቦና መላ ናገትተ። 10 ኔኒ ነና ኤራንቾ ጋዳ ኤቃስ ያርሸትዳ ካꬅ ማናዉ ኤቃ ኬꬃን ኡትዳሽን፥ አማኖን ምኖና አስ ነና በእኮ፥ ሄስ ኤቃስ ያርሸትዳ ካꬅ እ ማና መላ ደንነዬ? 11 ህዛ፥ ነ ኤራተꬃ ጋሶን ክርስቶስ እያ ግሾ ሀይቅዳ፥ አማኖን ምኖና ነ እሻይ ꬋይስ። 12 ሄሳዳ ኦꬅድ፥ አማኖን ምኖና ህንተ እሻታ ቆህሸነ ኤንታ ካሀ ማዱንፅስሸ ክርስቶሳ ቆሄታ። 13 ሄሳ ግሾ፥ ካꬅ ታ እሻ ꬉብያባ ግድኮ፥ እ ꬉበቶና መላ ኡባራካ አሾ ሚከ።