1 ህንተ ታዉ ፃፍዳ ዳብዳብያስ ዛሮይ ሀይሳ። እስ አስ ማጫስ ቦቾና አግኮ ሎኦ። 2 ሽን ላይማተꬃፈ አታናዉ እስ እስ አደይ ማቾ ኤኮ፤ ቃስ እስ እስ ማጫሳስ አዝን ደኦ።

3 አዝናይ ባ ማቼስ፥ ቃስ ማችያ ባ አዝናስ በሲያባ ኩንꬆ። 4 ማቼስ ባ አሳተꬃ ቦላ ማት ባዋ፥ ሽን ማት እ አዝናሳ። ሄሳዳካ፥ አዝናስ ባ አሳተꬃ ቦላ ማት ባዋ፥ ሽን ማት ማቸሳ። 5 ህንተ ዎሳን ጉꬃ ዎደ ጋምአናዉ ዞረተꬃን ግዶና እፅኮ፥ እሶይ እሱዋ ድጎፍተ። ሄሳ ጋሶን ህንተናተꬃ ሃራናዉ ፆነትን፥ ፃላሄይ ህንተና ፓጮና መላ እስፈ ደእተ። 6 ሽን ታኒ ህንተና ዞራናዉ ሀይሳ ጋይስፐ አትሽን፥ ኪታ ግደና። 7 አስ ኡባይ ታዳ ማቾ ኤኮና ደእያኮ ዶሳይስ፥ ሽን ፆሲ እሱዋስ እሱዋስ እምዳ ዱማ እሞት ደኤስ። እሱዋስ ሀይሳ መላ ሀንኩዋስ ሄሳ መላ እሞት ደኤስ።

8 ማቾ ኤክቦናይሳታስነ አዝና ገልቦናይሳታስ ቃስ አምኤታስ ታኒ ኦደይ፥ ታዳ ደእተ ጋዳ ዞራይስ። 9 ሽን አሞን ፁገተይሳፈ ኤከይስነ ገለይስ ሎኦ ግድያ ግሾ፥ ኤንቲ ባንታና ሃራናዉ ዳንዳኦና እፅኮ፥ ኤኮነ ገሎ።

10 ታኒ ኤክዳይሳታነ ገልዳይሳታ ሀይሳዳ ጋዳ ዞራይስ፤ ታና ግድከ ጎዳይ ኪቴስ፤ ማችያ ባ አዝናፐ ሻከቶፎ። ማቶ 5:32፤ 19:9፤ ማር 10:11-12፤ ሉቃ 16:18. 11 ሽን ሻከትኮ ሀራ አዝና ገሎና ባርካ ደኦ ዎይኮ ባ አዝናራ ስገቶ። አዝን ባ ማችዉ ብሎፎ።

12 ሽን ሀራታስ ጎዳ ግዶናሽን፥ ታኒ ሀይሳዳ ጋይስ። አማኖና ማቻ ደእያ አማንያ አዝን ደእኮ፥ እያ ማችያ እያራ እስፈ ዳናዉ ኮይኮ እዮ ብሎፎ። 13 ቃስ አማኖና አዝን ደእያ አማንያ ማቻ ደእኮ፥ እ አዝናይ ኢራ እስፈ ዳናዉ ኮይኮ እያፐ ብለቶፎ። 14 አማኖና አዝን ባ አማንያ ማቸ ባጋራ ፅሌስ፤ ቃስ አማኖና ማችያ ባ አማንያ አዝና ባጋራ ፅላዉሱ። ሄስ ባይነኮ፥ ህንተ ናይት ቱና ግዶሶና፥ ሽን ሀእ ኤንቲ ጌሽ። 15 ሽን አማኖና አዝናይ ዎይኮ ማችያ ብላናዉ ኮይኮ ብሎ። አማንያ ማችያ ዎይኮ አዝናይ ሄሳ መላባን ቃሸቶኮና። ፆሲ ኑና ሳሮተꬃን ዳና መላ ፄግስ። 16 ነኖ፥ አማንያ ማቸተ፥ ኔኒ አማኖና ነ አዝና አሻነኮ አይ ኤራይ? ዎይኮ አማንያ አዝናዉ፥ ኔኒ አማኖና ነ ማችዉ አሻነኮ አይ ኤራይ?

17 እስ እስ አስ ጎዳይ እያዉ እምዳ እሞታዳነ ፆሳይ እያ ፄግዳይሳዳ ደኦ። ዎሳ ኬꬃ ኡባን ታኒ ታማርስያ ዎጋይ ሀይሳ። 18 ኦንካ ቃፃረትድ ፄገትዳባ ግድኮ፥ ቃፃረቶናዳ ሀኖፖ። ቃፃረቶና ፄገትዳ ኦንካ ደእኮ፥ ቃፃረታናዉ ኮዮፖ። 19 ፆሳ ኪታ ፖላናዉ በሴስፐ አትሽን፥ ቃፃረትን ቃፃረቶና አግን አይኮካ ማደና።

20 እስ እስ አስ ፆሳይ ባና ፄግያ ዎደ ደኤይሳዳ ደኦ። 21 ፆሳይ ነና ፄግያ ዎደ ኔኒ አይሌ? አይኮይ ባዋ ሄሳስ ኡንኤቶፋ። ሽን ኔኒ አይለተꬃፈ ላአ ከያናዉ ዳንዳእኮ ላአ ከያ። 22 አይለ ግድድ ደእሸ ጎዳን ፄገትዳ አስ ጎዳን አይለተꬃፈ ላአ ከይስ። ሄሳዳካ፥ አይለ ግዶና ደእሸ፥ ጎዳን ፄገትዳ አስ ክርስቶሳ አይለ። 23 ፆሳይ ህንተና ጋተን ሻምዳ ግሾ አሳ አይለ ግዶፕተ። 24 ታ እሻቶ፥ ህንተ እሶይ እሶይ ፄገትያ ዎደ ደእያ ደኡዋን ፆሳራ እስፈ ደእተ።

25 ጌላኦታባ ጎዳይ ታና ኪትዳባይ ባዋ። ሽን ጎዳይ ታዉ እምዳ ማሮተꬃ መላ ታኒ ህንተና ዞራይስ። 26 ህዛ፥ ሀእ መቱዋ ግሾ፥ ኤኮና ዎይኮ ገሎና ዱስ ታዉ ሎኦ ዳኔስ። 27 ነ ማቾ ኤክዳባ ግድኮ፥ ሻከታናዉ ኮዮፓ። ኔኒ ማቾ ኤካቦናባ ግድኮ፥ ኤካናዉ ኮዮፓ። 28 ሽን ነ ማቾ ኤክኮ ናጋር ባዋ። ሄሳዳ ጌላእያ አዝና ገልኮ ናጋር ባዋ። ሽን ኤክያ ገልያ አሳስ ሀ ሳአን ዳሮ መቶይ ደእያ ግሾ ህንተ ሄሳፈ አታና መላ ታኒ ኮያይስ።

29 ታ እሻቶ፥ ታ ገይ ሄሳ፤ ዎደይ ዉርስ። ህዛፐ ጉየ ማቻ ደኤይ ማቾ ኤኮናዳ ደኦ። 30 ዬከይሳት ዬኮናዳ፥ ኡፋይተይሳት ኡፋይቶናዳ፥ ሻመይሳት አይኮይካ ባይናዳ ባንታና ታይቦ። 31 ሀ ሳኣ ሻሎን ማደተይሳት ማደትቦናዳ ሀኖ። ሀ አላምያ ማላይ አꬋና።

32 ህንተ ህርግ ባይና ዳና መላ ታ ዶሳይስ። ማቾ ኤክቦናይስ ጎዳ ኡፋይሳናዉ ኮያ ግሾ፥ ጎዳባ ቆፔስ። 33 ሽን ማቾ ኤክዳይስ ባ ማችዉ ኡፋይሳናዉ ኮያ ግሾ፥ ሀ ሳአባ ቆፔስ። 34 እያ ቆፋይ ናምአን ሻከቴስ። አዝና ገላቦና ጌላእያ ባ አሳተꬃንነ ባ ሸምፑዋን ጌያዳ ጎዳ ኡፋይሳናዉ ኮያ ግሾ፥ ጎዳባ ቆፓዉሱ። ሽን አዝና ገልዳራ ባ አዝና ኡፋይሳናዉ ኮያ ግሾ፥ ሳአባ ቆፓዉሱ። 35 ታኒ ሄሳ ህንተዉ ኦደይ፥ ህንተ ማደታና መላሳፈ አትሽን፥ ህንተና ኡንኤꬃናዉ ግደና። ሽን ህንተ ቆፋይ ሻከቶና ማራን ደእድ ጎዳ ኡፋይስያባ ህንተ ኦꬃና መላ ታኒ ኦዳይስ።

36 ኦንካ ባ ኦይችዳ ጌላኤስ ገሎ ዎደይ አꬍስ ግድ እዮ አጋናዉ ቆፕኮ፥ ሄስ ቃስ እዉ ሎኦ ግዶናይስ እያዉ ስኤትኮ፥ ባ ኮይዳይሳ ኦꬆ፤ ኤንቲ ኤከቶ፥ ገለቶ፤ ሄሳን ናጋር ባዋ። 37 ሽን እስ አስ ኡንኤꬅያባይ ꬋይን፥ ባ ዎዛናን ምንድ፥ ባና ሃርድ፥ ባ ኦይችዳ ጌላእዉ ኤከናዉ አጋናዉ ኮይኮ ሎይꬅስ። 38 ሄሳ ግሾ፥ ጌላእዉ ኤክያ ኡራይ ሎይꬅስ፤ ቃስ ኤኮና ኡራይ ዳሮ ሎይꬅስ።

39 ማችያ ባ አዝናይ ፓፃ ደእያ ዎደ ኡባን እያራ ቃሸታሱ። ሽን እ አዝናይ ሀይቅኮ፥ ባ ዶስዳ አዝና ገላናዉ ዳንዳአዉሱ። ግዶሽን፥ እያ ገልያ አደይ አማንያ አስ ግዳናዉ በሴስ። 40 ታ ቆፋን ግድኮ፥ እያ ገሎና ደእኮ ኡፋይሳን ዳና። ቃስ ታዉ፥ ታ ቦላ ፆሳ አያን ደእያ ዳኔስ።