1 ህንተ ግዶፈ እሶይ እሱዋራ ሞቶይ ደእኮ፥ ሄሳ አማንያ አሳ ስንꬃን ፕርደታናይሳ አግድ፥ አማኖና አሳ ስንꬃን ፕርደታናዉ ዋንድ ቢ? 2 አማንያ አሳይ አላመ ቦላ ፕርዳናይሳ ህንተ ኤረከቲ? ያትን፥ ህንተ አላመ ቦላ ፕርድያባ ግድኮ፥ ሀይሳ መላ ጉꬃባ ፕርዳናዉ ዋንድ ዳንዳኤከቲ? 3 ኑኒ ኪታንቾታ ቦላ ፕርዳናይሳ ኤረከቲ? ያትን፥ ሀ ሳአ ዱሳባ ቦላ ፕርዳናይስ ህንተና ዋንድ ፆኒ? 4 ያትን፥ ሄሳ መላ መቶይ ህንተ ግዶን መትኮ፥ ዎሳ ኬꬃ አይፈን ካትዳ አሳ ስንꬃን ፕርደታናዉ ዋትድ ኤፌቲ? 5 ታኒ ህንተና ዬላያናዉ ሄሳ ጋይስ። ህንተ ግዶን ካጨትዳ እሻታ ስገꬃናዉ ዳንዳእያ አኬካ አስ ባዌ? 6 ያትን፥ እስ አማንያ እሻይ ሀንኮ አማንያ እሻ ፕርዳ ኬꬃን አማኖና አሳ ስንꬃን ሞታናዉ በሲ?

7 ህዛ፥ ህንተ እሶይ እሱዋ ሞትያባ ግድኮ ሄስ ህንተ ኩንደꬃ በሴስ። ሄሳፈ ህንተ ቆሄትኮ ኬሄኔ? ህንተ ጭመትኮ ሎኤኔ? 8 ሽን ህንተ ዎል ግዶን አማነይሳት፥ እሶይ እሱዋ ቆሄታነ ጭሜታ።

9 ጌላት ፆሳ ካዎተꬅ ላቶናይሳ ህንተ ኤረከቲ? ህንተና ጭሞፍተ፤ ላይማተይሳት ዎይኮ ኤቃ ጎይነይሳት ዎይኮ ላመይሳት ዎይኮ አደራ አደራ ጋሄተይሳት፥ 10 ዎይኮ ካይሶት ዎይኮ ኡዘት ዎይኮ ማꬆተይሳት ዎይኮ ጫየይሳት ዎይኮ ቦንቀይሳት ፆሳ ካዎተꬅ ላቶኮና። 11 ህንተፈ እስ እስ አሳት ካሰ ሄሳ መላ። ሽን ሀእ፥ ህንተ ጎዳ የሱስ ክርስቶሳ ሱንꬃንነ ፆሳ አያናን ሜጨትደታ፤ ጌይደታ፤ ፅልደታ።

12 ህንተ፥ “ኑ ኮይዳባ ኦꬃናዉ ዳንዳኦስ” ያጌታ። ሽን ኡባይ ማደና። “ታኒ ኮይዳባ ኡባ ኦꬃናዉ ዳንዳአይስ” ያጌታ። ሽን አይብካ ታና ሃረና። 13 ህንተ፥ “ካꬅ ኡሎሳ፤ ኡሎይካ ካꬃሳ” ያጌታ። ሽን ፆሲ ኡሎካ ካꬅካ ꬋይሳናይሳ ታ ህንተዉ ኦዳይስ። ኑ አሳተꬃይ ጎዳሳፈ አትሽን፥ ላይማተꬃስ ግደና። ጎዳይካ ኑ አሳተꬃሳ። 14 ፆሳይ ጎዳ ሀይቆፐ ደንꬅዳይሳዳ፥ ኑናካ ሀይቆፐ ባ ዎልቃን ደንꬃና።

15 ህንተ አሳተꬃይ ክርስቶሳ አሳተꬃፈ እስ ባጋ ግደይሳ ኤረከቲ? ያትን፥ ታኒ ክርስቶሳ አሳተꬃፈ እስ ባጋ ኤፋዳ ላይማተꬃ አሳተꬅ ግዳና መላ ኦꬆ? ሀነና! 16 ላይማትያ አደይ፥ እ ጋሄትያ ማጫሴራ እስ አሳተꬅ ግደይሳ ኤረከቲ? ጌሻ ማፃፋን፥ “ኤንቲ ናምአይ እስ አሳተꬅ ግዳና” ጌተትድ ፃፈትስ። መ 2:24. 17 ሽን ጎዳራ እስፍያ አስ እያራ አያናን እስኖ ግዴስ።

18 ላይማተꬃፈ ሃክተ። እስ አስ ኦꬅያ ሀራ ናጋር እያ አሳተꬃፈ ካረራ ኦሰቴስ፥ ሽን ላይማትያ አስ ባ አሳተꬃ ቦላ ናጋራ ኦꬄስ። 19 ህንተ አሳተꬃይ፥ ፆሳይ ህንተዉ እምዳ ህንተናን ደእያ ጌሻ አያና ኬꬅ ግደይሳ ኤረከቲ? ህንተ ህንተባ ግደከታ። 2 ቆሮ 3:16፤ 2 ቆሮ 6:16. 20 ፆሳይ ህንተና ጋተን ሻምስ። ሄሳ ግሾ፥ ህንተ አሳተꬃን ፆሰ ቦንችተ።