1 ታ እሻቶ፥ ታ ህንተዉ ማርካትዳ ዎንገላ ህንተ ኤክዳይሳነ ህንተ አማኖይ እያን ኤቅዳይሳ ህንተ አኬካና መላ ታኒ ኮያይስ። 2 ታ ታማርስዳ ዎንገላ ምንꬅድ ኦይክኮ ህንተ እያን አታና። ሄስ ሀኖና እፅኮ ህንተ አማኖይ ሀዳ ግዳና።

3 ታኒ ኤክዳ ኡባፈ አꬍያ ኪታ ካሰታዳ ህንተዉ እማስ። ሄስካ፥ ጌሻ ማፃፋይ ገይሳዳ፥ ክርስቶስ ኑ ናጋራ ግሾ ሀይቅስ። እሳ 53:5-12. 4 ሞገትስ፤ ጌሻ ማፃፋይ ገይሳዳ፥ ሄꬓንꬆ ጋላሳን ሀይቆፐ ደንድስ። ማዝ 16:8-10፤ ማቶ 12:40፤ ሀዋ 2:24-32. 5 ጰፅሮሳስ ቆንጭስ። ሄሳፈ ጉየ፥ ታማነ ናምኡ ሀዋረታስ ቆንጭስ። ማቶ 28:16-17፤ ማር 16:14፤ ሉቃ 24:34፥ 36፤ ዮሀ 20:19. 6 ሄሳፈ ጉየ፥ እቻሹ ፄታፐ ዳርያ አሳስ እስቶሆ ቆንጭስ። ኤንታፈ ዳርያ ባጋይ ሀእ ጋካናዉ ፓፃ ደኦሶና፥ ሽን ጉꬃት ሀይቅዶሶና። 7 ሄሳፈ ጉየ፥ ያይቆባስ ቆንጭስ፤ ጉየፐ ባ ሀዋረታ ኡባስ ቆንጭስ።

8 ቃስ ዉርሰꬃን አዉጫያ መላ ግድዳ ታዉ ቆንጭስ። ሀዋ 9:3-6. 9 ታኒ የሱሳ ሀዋረታ ኡባፈ ላፋ። ታኒ ፆሳ ዎሳ ኬꬃ ጎድዳ ግሾ የሱሳ ሀዋረ ጌተታዳ ፄገታናዉ በሶናይሳ። ሀዋ 8:3. 10 ሽን ፆሳ አꬎ ኬሀተꬃን ታ ሀእ ግድዳይሳ ግዳስ፤ እ ታዉ እምዳ አꬎ ኬሀተꬃይ መላ አትቤና። ታኒ ሀንኮ ሀዋረታፐ አꬃዳ ዳቡራስ። ሽን ታራ ደእያ ፆሳ አꬎ ኬሀተꬃይ ኦꬅስፐ አትሽን፥ ታና ግድከ። 11 ህዛ፥ ታና ግድን ኤንቲ፥ ኑ ኡባይ ታማርሰይ ሄሳ፤ ህንተካ ሄ ኪታ አማንደታ።

12 ክርስቶስ ሀይቆፐ ደንድዳይሳ ኑ ሳባክያ ዎደ ህንተፈ እሶት እሶት ያትን፥ ዎይግድ፥ “ሀይቆፐ ደንዶይ ባዋ” ያጎና? 13 ሀይቆፐ ደንዶይ ባይናባ ግድኮ ክርስቶስ ሀይቆፐ ደንድቤና ጉሱ። 14 ክርስቶስ ሀይቆፐ ደንድቦናባ ግድኮ ኑ ትምርተይ ቃስ ህንተ አማኖይካ ሀዳ። 15 ሀይቆፐ ደንዶይ ባይናሽን፥ ኑኒ ፆሳይ፥ “ክርስቶሳ ሀይቆፐ ደንꬅስ” ያግድ ሳባክሸ ፆሳ ዎርዳንቾ ማርካታ ግድዳ ጉሱ። 16 ሀይቅዳ አሳይ ሀይቆፐ ደንድቦናባ ግድኮ ህዛ፥ ክርስቶስ ሀይቆፐ ደንድቤና። 17 ክርስቶስ ሀይቆፐ ደንዶናባ ግድኮ፥ ህንተ አማኖይ ሀዳ፤ ቃስ ህንተ ሀእ ጋካናዉ ህንተ ናጋራን ደኤታ። 18 ህዛ፥ ክርስቶሳ አማንድ ሀይቅዳይሳትካ ꬋይዶሶና ጉሱ። 19 ኑኒ ሀ አላምያ ደኡዋ ፃላላስ ክርስቶሳን ኡፋይስ ኦꬅዳባ ግድኮ፥ ሀ ሳአን ደእያ አሳ ኡባፈ ኑባይ አꬍዳ ይባታ።

20 ሽን ክርስቶስ ሀይቅዳይሳታስ ሀይቆፐ ደንዶን ባይራ ግድድ ቱማ ደንድስ። 21 ሀይቆይ እስ አሳ ባጋራ ሀ አላምያ ይዳይሳዳ ሀይቆፐ ደንዶይ እስ አሳ ባጋራ ይስ። 22 አዳመ ባጋራ አሳ ኡባይ ሀይቅዳይሳዳ ክርስቶሳ ባጋራ አሳ ኡባይ ደኦን ዳና። 23 ሽን እሶይ እሶይ ባ ማራን ማራን ደንዳና። ክርስቶስ ኡባፈ ካሰትድ ደንድስ፤ ሄሳፈ ጉየ፥ ክርስቶሳይሳት እ ያ ዎደ ደንዳና።

24 ሄሳፈ ጉየ፥ ክርስቶስ ሀላቃተꬅ፥ ማታነ ዎልቃ ኡባ ꬋይስድ፥ ካዎተꬃ ፆሳ አዋስ እምያ ዎደ ዎድያ ዉርሰꬃይ ያና። 25 ፆሳይ እያ ሞርከታ ኡባ እያ ቶሁዋፐ ጋርሳን ዎꬃና ጋካናዉ ክርስቶስ ሃራናዉ በሴስ። ማዝ 110:1. 26 ዉርሰꬃን እ ꬋይሳናዉ ደእያ ሞርከይ ሀይቆ። 27 ጌሻ ማፃፋን፥ “ፆሳይ ኡባባ እያ ማታፐ ጋርሳን ሃርስስ” ጌተትድ ፃፈትስ። ሽን ኡባ እያ ማታፐ ጋርሳን ሃርስስ ገይስ፥ ኡባባ እያ ማታፐ ጋርሳን ሃርስዳ ፆሳ ጉጀና። ማዝ 8:6. 28 ኡባባይ ክርስቶሳ ማታፐ ጋርሳን ሃረትዳፐ ጉየ ክርስቶስ ቃስ ባ ሁጰን ኡባባ ባዉ ሃርስዳ ፆሳስ ሃረታና። ሄ ዎደ ፆሳይ ባ ፃላላ ኡባ ሃራና።

29 ሀይቅዳይሳት ደንዶናባ ግድኮ ኤንታ ግሾ ፃማቀትያ አሳስ አይባ ዎይ ደኢ? ሀይቅዳይሳት ደንዶናባ ግድኮ ያትን፥ አይስ፥ አሳይ ሀይቅዳይሳታ ግሾ ፃማቀቶና?

30 ያትን፥ ኑኒ አይስ ኡባ ዎደ ኑናተꬃ መቶስ አꬅድ እሞና? 31 ታ እሻቶ፥ ታ ጋላስ ጋላስ ሀይቆስ አꬋዳ እመታይስ። ሄስካ፥ ጎዳ ክርስቶስ የሱሳን ደእያ ደኡዋ እስፈተꬃን ህንተናን ጬቅያ ግሾሳ። 32 አሳ ቆፋꬆ ግድኮ፥ ታኒ ኤፈሶናን ዶአራ ቡተትዳይስ ታና አይ ማዲ? ሀይቅዳይሳት ሀይቆፐ ደንዶናባ ግድኮ፥ “ዎንቶ ኑ ሀይቅያ ግሾ ሀች ማና ኡያና” ግያ አሳ መላ ግዶስ። እሳ 22:13.

33 ጭመቶፍተ! ኢታ ላገተꬅ ሎኦ አማለ ኢሴስ። 34 ህንተ አኬካኮ ስምተ። ናጋራ ኦꬆፍተ። ህንተፈ እስ እስ አሳይ ፆሳ ኤሮኮና። ታኒ ህንተና ዬላያናዉ ሄሳ ጋይስ።

35 እስ አስ፥ “ሀይቅዳ አሳይ ዋንድ ደንዳኔ? ኤንቲ አይ መላ አሳተꬃራ ያኔ?” ያጎና አገና። 36 ነኖ ኤያዉ፥ ኔኒ ቢታን ዘርያ ዘረꬃይ ሀይቆና ዶለና። 37 ኔኒ ዘረይ ግስተ ግድን ዎይኮ ሀራ ካꬃ ቆሞ አይፈ ፃላላ ዘራሳፐ አትሽን፥ ዶልዳ ዶላ ግደና። 38 ሽን ፆሳይ ዘረꬃስ ባ ዶስዳ መላ መተꬅ እሜስ። ዱማ ዱማ ዘረꬃስ ዱማ ዱማ አሳተꬅ እሜስ። 39 መተꬃ ኡባ አሾይ እሶ ግደና። ሽን አሳ አሾይ እሱዋ፤ መሄ አሾይ ዱማ፤ ካፎታ አሾይ ዱማ፤ ቃስ ሞሎ አሾይ ዱማ።

40 ሳሎ አሳተꬅ ደኤስ፤ ቃስ ሳአ አሳተꬅ ደኤስ። ሽን ሳሎ አሳተꬃ ቦንቾይ ዱማ፤ ቃስ ሳአ አሳተꬃ ቦንቾይ ዱማ። 41 አዋ ቦንቾይ ዱማ፤ አጌና ቦንቾይ ዱማ፤ ፆልንቶታ ቦንቾይ ዱማ፤ እስ ፆልንቶይ ሀንኮ ፆልንቱዋፈ ቦንቾን ዱማቴስ።

42 ሀይቅዳይሳት ሀይቆፐ ደንድያ ዎደ ሄሳዳ ሀናና። ሀይቅያ አሳተꬃይ ዘረቴስ፤ ሀይቆና አሳተꬅ ግድድ ደንዴስ። 43 ቶሸን ዘረትድ፥ ቦንቾን ደንዳና፤ ዳቡራን ዘረትድ፥ ዎልቃን ደንዳና። 44 መተꬃ አሳተꬃይ ዘረትድ፥ አያና አሳተꬅ ግድድ ደንዳና። መታ አሳተꬅ ደእኮ፥ አያና አሳተꬅ*አያና አሳተꬅ፦ ጌሻ አያናይ ሃርዳ ዎይኮ ጌሻ አያናይ ደኦ እምዳ አሳተꬅ ጉሱ። ደኤስ።

45 ሄሳዳካ፥ ጌሻ ማፃፋን፥ “ኮይሮ አደይ፥ አዳመይ፥ ፓፃ ደእያ አሰ ግድድ መትስ”መ 2:7. ያጌስ። ሽን ዉርሰꬃ አዳመይ፥ ክርስቶስ፥ ደኦ እምያ አያና ግድስ። 46 ሽን መታ አስ ኮይሮ ይን፥ ጉየፐ አያና አስ ይስፐ አትሽን፥ አያና አስ ኮይሮ ይቤና። 47 ኮይሮ አዳመይ ቢታፈ መትዳ ቢታ አስ፤ ናምአንꬆ አዳመይ ሳሎፐ ይዳ ሳሎ አስ። 48 ቢታፈ መትዳይሳት ቢታፈ መትዳይሳ ዳኖሶና። ሳሎይሳት ሳሎፐ ይዳይሳ ዳኖሶና። 49 ኑኒ ቢታፈ መትዳ አድያ ዳነይሳ መላ ሳሎፐ ይዳ አድያ ዳናና።

50 ታ እሻቶ፥ ታ ገይስ ሄሳ፤ ሀእ ኑ ማእዳ አሳተꬃይ ፆሳ ካዎተꬃ ላታናዉ ዳንዳኤና። ዎቅያ አሳተꬃይ ዎቆና አሳተꬃ ላተና።

51 ታ ህንተዉ እስ ፁራ ኦዳና። ኑ ኡባይ ሀይቆኮ፥ ሽን ዉርሰꬃን ኡባይ ላመታና። 52 ሞይዘይ ፑነትያ ዎደ፥ አይፈይ ቅጵ ፄላናዉ ሀሳዮና ላመታና። ሀይቅዳ አሳይ ዎቆና አስ ግድድ ደንዳና፤ ኑካ ላመታና። 1 ተሰ 4:15-17. 53 ሀይስ ዎቀይስ ዎቆናይሳ፥ ሀይስ ሀይቀይስ ሀይቆናይሳ ማአናዉ በሴስ።

54 ሀይስ ዎቀይስ ዎቆናይሳ፥ ቃስ ሀይስ ሀይቀይስ ሀይቆናይሳ ማእያ ዎደ፥ ጌሻ ማፃፋን፥ “ሀይቆይ ፆኖን ምተትስ”እሳ 25:8. ግያ ቃላይ ፖለታና። 55 ሄሳዳካ፥

58 ሄሳ ግሾ፥ ታ ሲቆ እሻቶ፥ ቃፆና ምንድ ኤቅተ። ጎዳ ኦሱዋን ህንተ ዳቡረይስ ጮ ግዶናይሳ ኤርድ ኡባ ዎደ ጎዳ ኦሱዋ አዛሎና ኦꬅተ።