1 አማንያ አሳስ ሚሸ ሺሾባ ጋላትያ ዎሳ ኬꬃታስ ታኒ ኪትዳይሳዳ ህንተካ ኦꬅተ።ሮመ 15:25-26. 2 ሚሽያ ሺሾይ ታ ህንተኮ ብያ ዎደ ግዶና መላ እሶይ እሶይ ሳምንታፈ ኮይሮ ጋላስ፥ ዎጋ ዎደ፥ ዎጋ ዎደ፥ ባ ደመይሳፈ ከስድ ባ ሶን ዳጋዮ። 3 ታኒ ያ ብዳ ዎደ ሚሽያ የሩሳላመ ጋꬃና መላ ህንተ ዶርያ አሳስ ዳብዳበ እማዳ ኤንታ የሩሳላመ ኪታና። 4 ኤንታራ ታ ቡሳይ ኮሽያባ ግድኮ ኤንቲ ታራ ባናዉ ዳንዳኦሶና።

5 ታኒ ማቀዶነራ አꬋናዉ ቆፕዳ ግሾ፥ ያ ባዳ ህንተኮ ያና። ሀዋ 19:21. 6 ታ ብያ በሳ አዉ ግድኮካ፥ ታ ቡሳን ህንተ ታና ማዳና መላ ህንተ ማታን ጉꬃ ዎደ ጋምኦና አግከ። ባልጎ አጌናታ ህንተ ማታን አꬆና ዋያ አጋና። 7 ታኒ ኦገራ አꬋሸ ህንተና በአናዉ ኮይከ። ጎዳይ ጊኮ፥ ህንተ ማታን ጉꬃ ዎደ ታካናዉ ቆፓይስ።

8 ሽን ታኒ ጳንፀቆስፀ ባለይ ጋካናዉ ኤፈሶናን ጋምአና። 9 ታዉ ኦሶይ ኩምዳ ዳልጋ ፐንገይ ዶየትስ፥ ሽን ዳሮ ኤቀትያ ሞርከት ደኦሶና። ሌወ 23:15-21፤ ዛረ 16:9-11፤ ሀዋ 19:8-10.

10 እ ታ መላ ጎዳ ኦሶ ኦꬅያ አስ ግድያ ግሾ፥ ፅሞትዮስ ህንተኮ ቢኮ፥ ህንተ ማታን እ ህርጎና ዳና መላ ኦꬅተ።2 ቆሮ 4:17. 11 ኦንካ እያ ካꬎፖ። እ ታኮ ሳሮ ስማና መላ እያ ማድድ ሞይዝተ። ታኒ እ ሀንኮ አማነይሳታራ ስማናይሳ ናጋይስ።

12 ኑ እሻ አጵሎስ ሀንኮ አማነይሳታራ ህንተኮ ባና መላ ታ እያ ምንꬃ ዎሳስ። ሀእ ህንተኮ ባናዉ ኮይቤና፥ ሽን እያዉ እንጀትያ ዎደ ህንተኮ ባና።

13 ባርክተ፤ አማኖን ኤቅተ፤ ፃልተ፤ ምንተ። 14 ኦሶ ኡባ ሲቆን ኦꬅተ።

15 ታ እሻቶ፥ እስፅፋኖሰይነ እያ ሶ አሳይ አካያን ኤንቲ ኮይሮ አማንዳይሳታ ግደይሳነ አማነይሳታ ማዳናዉ ባንታና አꬅድ እምዳይሳ ህንተ ኤሬታ። 2 ቆሮ 1:16. 16 ህንተካ ኤንታ መላ አሳስነ፥ ኤንታራ ኦሶን ዳቡርያ ኡባስ ኪተታና መላ ታ ህንተና ዎሳይስ።

17 እስፅፋኖሰይ፥ ፈርዶናፅስነ አካይቆስ ታኮ ይዳይስ ታና ኡፋይስስ። ህንተ ባይና በሳን ኤንቲ ህንተና ግድድ ታ ፓጫ ኩንꬅዶሶና። 18 ኤንቲ ህንተና ኡፋይስዳይሳዳ ታናካ ኡፋይስዶሶና። ሄሳ መላ አሳታ ዶጎፕተ።

19 ኢሰ ዎሳ ኬꬃ አሳይ ህንተና ሳሮ ጎሶና። አቅልነ ጵርስቅላ ባንታ ሶን ሺቅያ ዎሳ ኬꬃ አሳራ እስፈ ህንተና ጎዳ ሱንꬃን ዎዛናፐ ሳሮꬆሶና።ሀዋ 18:2. 20 አማንያ እሻት ኡባይ ህንተና ሳሮ ያጎሶና።

ጌሻ ዬረተꬅ ዬረትሸ እሶይ እሱዋ ሳሮꬅተ። 21 ታኒ፥ ጳዉሎስ፥ ሀ ሳሮꬁዋ ታ ኩሸን ፃፋስ።

22 ጎዳ ዶሶና አስ ደእኮ፥ ባደትዳይሳ ግዶ። ኑ ጎዳዉ፥ ሃያ!

23 ጎዳ የሱስ ክርስቶሳ አꬎ ኬሀተꬃይ ህንተራ ግዶ።

24 ታ ሲቆይ ክርስቶስ የሱሳን ደእያ ህንተ ኡባራ ግዶ። አምንእ።