1 ፆሳ ሸነን የሱስ ክርስቶሳ ሀዋረ ግድዳ ጳዉሎስነ፥ ኑ እሻ ፅሞትዮስ፥

ቆሮንቶሳን ደእያ ፆሳ ዎሳ ኬꬃስነ አካያ ቢታን ደእያ ፆሳ አሳ ኡባስ ፃፍዳ ኪታ። ሀዋ 18:1.

2 ፆሳ ኑ አዋፐነ ጎዳ የሱስ ክርስቶሳፐ፥ አꬎ ኬሀተꬃይነ ሳሮተꬃይ ህንተዉ ግዶ።

3 ማሮተꬃ አዋስ፥ ኡባ ዎደ ኑና ምንꬅያ ፆሳስ፥ ኑ ጎዳ የሱስ ክርስቶሳ አዋስ ጋላት ግዶ። 4 ፆሳይ ኑስ እምዳ ምንꬁዋን፥ መቶን ደኤይሳታ ኑ ምንꬃና መላ ፆሳይ ኑና ኑ መቶ ኡባን ምንꬄስ። 5 ኑኒ ክርስቶሳ ዳሮ ዋይያ ሻከትዳይሳዳ ቃስ ኑኒ እያ ዳሮ ምንꬁዋን ምናና። 6 ኑኒ ዋየትኮ ሄስ ህንተና ምንꬃናሳነ ህንተና አሻናሳ። ቃስ ኑኒ ምነትኮ ኑኒ ገንጭዳ ዋይያ መላ ህንተካ ገንጭድ፥ ፆሳይ ህንተዉ እምያ ምንꬁዋን ምናና። 7 ህንተ ኑ ኤክዳ መቱዋ መላ ኤክድ፥ ኑ ምንꬁዋን ሻከታናይሳ ኑ ኤርያ ግሾ ኑ ኡፋይሳይ ህንተናን ምኖ።

8 ኑ እሻቶ፥ ኢሰ ቢታን ኑና ጋክዳ መቱዋ ህንተ ኤራና መላ ኮዮስ። ሄ ኑና ጋክዳ መቶይ ኑ ዎልቃፈ ዳርን፥ ሀይቆና አቶኮ ግድ ኡፋይስ ቃንፅዳሽን። 9 ኑኒ ኑ ቦላ ሀይቆ ፕርድ ፕርደትዳ መላ ቆፕዳ። ሽን ኑኒ ኑ ሁጰን ግዶናሽን፥ ሀይቅዳይሳታ ደንꬅያ ፆሳን አማነታና መላ ሄስ ሀንስ። 10 ፆሳይ ሄሳ መላ ኢታ ሀይቆፐ ኑና አሽስ፤ ሀእካ አሻና፤ ስንꬃፈካ እ ኑና አሻና ግድ እያን ኡፋይስ ዎꬆስ። 11 ዎሳን ኑና ማድተ። ዳሮ ዎሳ ጋሶን ፆሳ ማዱዋ ኑ ደምያ ዎደ ዳሮ አሳይ ኑ ግሾ ፆሳ ጋላቶሶና።

12 ኑኒ ኑ ጌሻ ካሀን ጬቀቶስ። ኑኒ ሀ አላምያን ደእዳ ደኡዋን ኡባራካ ህንተራ ኑ ደእዳ ደኡዋን ቱማተꬃንነ ሱረተꬃን ህንተራ ደእዳ። ሄስካ፥ ሀ አላምያ ጭንጫተꬃን ግዶናሽን፥ ፆሳ አꬎ ኬሀተꬃና። 13 ኑ ህንተዉ ፃፍዳ ዳብዳበይ ህንተ ናባባናዉነ አኬካናዉ ዳንዳእያባፐ አትሽን፥ ሀራ ግደና። ህንተ እያ አኬካናዉ ዳንዳኤይሳ ታ አማናይስ። 14 ሀእ ህንተ ኑና ሀንዳ ኬና ኤሬታ፥ ሽን ስንꬃፈ ኩመꬅ ኤራናይሳ ታ አማነታይስ። ኑ ጎዳ የሱሲ ስምያ ዎደ ኑኒ ህንተናን ጬቀትዳይሳዳ ህንተካ ኑናን ጬቀታና።

15 ሄሳ ታኒ ሎይꬃ ኤርዳ ግሾ፥ ህንተ ናምአንꬆ ጎኤታና መላ ካሰታዳ ህንተኮ ባናዉ ቆፋ ቃቻስ። 16 ታኒ ማቀዶነ ባሸነ ያፐ ስማሸ ህንተና በአና። ታኒ ያፐ ይሁዳ ብያ ዎደ ህንተ ታና ታ ኦግያን ማዳና ጋዳ ቆፓስ። ሀዋ 19:21. 17 ታኒ ሄሳ ጋሸ አይ ኦꬃናዉ በሲያኮ ኤሮና አስ ዳንያና? ዎይኮ ታኒ ታ ቆፋ ቃችያ ዎደ አሳ ቆፋዳ፥ እስ ቶሆ “ኤ” ቃስ እስ ቶሆ “አካይ” ግያ አሳ መለዬ?

18 ሽን ፆሳይ አማነተይሳ ግድያ ግሾ፥ ኑ ህንተዉ ኦድያ ቃላይ “ኤ” ዎይኮ “አካይ” ገይሳ ግደና። 19 ታኒ፥ ስላሰይነ ፅሞትዮስ ህንተዉ ማርካትዳ ፆሳ ናአይ፥ የሱስ ክርስቶሲ ኡባ ዎደ “ኤፐ” አትሽን፥ “ኤ” ነ “አካይ” ግደና። ሀዋ 18:5. 20 ፆሳይ እማና ግዳ ኡባይ ክርስቶሳ ባጋራ “ኤ” ግዴስ። ኑኒ ክርስቶሳ ባጋራ ፆሳ ቦንቾስ፥ “አምንእ” ገይ ሄሳ ግሾሳ። 21 ኑነ ህንተ ክርስቶሳን ምንድ ኤቃና መላ ኦꬅዳይነ ባ ኦሱዋስ ዶርዳይ ፆሳ። 22 ኑኒ እያባ ግደይሳ ኤርሳናዉ ባ ማታምያ ኑ ቦላ ዎꬅስ፤ ቃስ ባ ጌሻ አያና ኦይꬅ ኦꬅድ ኑ ዎዛናን ዎꬅስ።

23 ታኒ ቆሮንቶሳ ቦና አግዳይ ህንተ አዛኖና አታና መላሳ፤ ሄስ ዎርዶ ግድኮ ፆሳይ ታ ሸምፑዋ ታፐ ኤኮ። 24 ህንተ፥ ህንተ አማኑዋን ምንድ ደእያ ግሾ፥ ኑ ህንተና ኡፋይሳናዉ ህንተራ እስፈ ኦይሳታፐ አትሽን፥ ህንተና ዎልቃን አማንይሳታ ግዶኮ።