1 ታኒ ናምአንꬆ ህንተኮ ቢከ ጋዳ ቆፋ ቃችዳይ ህንተና አዛንꬆና አጋናሳ። 2 ታኒ ህንተና አዛንꬅኮካ ታ አዛንꬅዳ ህንተፈ ሀር ታና ኡፋይሳናዉ ደኤይ ኦኔ? 3 ታኒ ህንተዉ ሄ ዳብዳብያ ፃፍዳይ፥ ታ ህንተና በአናዉ ብያ ዎደ ታና ኡፋይሳናዉ በሲያ አሳን ታ አዛናናዉ ኮዮና ግሾሳ። ታ ኡፋይትያ ዎደ ህንተ ኡባይካ ኡፋይታናይሳ ታ አማናይስ። 4 ታኒ ዳሮ ዋየንነ ኡንአን ቃስ ዳሮ አፉꬃን ፃፍዳይ፥ ህንተና አዛንꬃናሳ ግዶናሽን፥ ታኒ ህንተና ኡባ አይ መላ ዶስያኮ ህንተና ኤርሳና መላሳ።

5 አሰ አዛንꬅዳ ኦንካ ደእኮ ታ እያ ናቁዋ ዳርሳናዉ ኮይከፈ አትሽን፥ ታና ግዶናሽን፥ ህንተፈ ዳሮታ አዛንꬅስ። 6 ህንተፈ ዳርያ አሳይ ሄ ኡራ ሴርዳ ሴራይ እያዉ ግዳና። 7 ሄሳ ግሾ፥ ሄ ኡራይ ዳሮ አዛንድ፥ ኡፋይስ ቃንፆና መላ ህንተ እያ ማራናዉነ ምንꬃናዉ በሴስ። 8 ህንተ እያ ሲቀይሳ ዛር እያዉ ቆንጭሳና መላ ታ ህንተና ዎሳይስ። 9 ታ ሄ ዳብዳብያ ህንተዉ ፃፍዳይ፥ ህንተ ፓጨትድ፥ ኡባባን ታዉ ኪተተይሳ ኤራናዉ ኮይዳ ግሾሳ። 10 ህንተ ማርያ ኡራ ታካ ማራና። ታኒ ማራናባይ አይብ ደእኮካ፥ ክርስቶሳ ስንꬃን ህንተ ግሾ ጋዳ ማራስ። 11 ታኒ ሄሳ ኦꬅዳይ ፃላህያ ጭሞ ኦሱዋ ኑ ኤርያ ግሾ፥ ፃላሄን ጭመቶና አታና መላሳ።

12 ታኒ ክርስቶሳ ዎንገላ ሳባካናዉ ፅሮኣዳ ብዳ ዎደ፥ ጎዳይ ያን ታዉ ኦሶ ኦገ ጊግስድ ዎꬅስ።ሀዋ 20:1. 13 ሽን ታኒ ታ እሻ ትቶ ያን ደማቦና ግሾ ታ ዎዛናይ ሸምፕቤና። ሄሳ ግሾ፥ ያን ደእያ አሳ ሳሮꬃዳ እያ ኮያናዉ ማቀዶነ ባስ።

14 ሽን ክርስቶሳ ባጋራ ኡባ ዎደ ኑና ፆኖን ካለꬅያነ ሽቶ መላ ሳውያ ክርስቶሳባ ኑ ኤርያ ትምርትያ ኡባ በሲ ጋꬃና መላ ኦꬅያ ፆሳ ጋላት ጋኮ። 15 ኑኒ አትያ አሳ ግዶንነ ꬋይያ አሳ ግዶን ክርስቶሳ ባጋራ ፆሳስ እመትዳ ሳውያ ሽቶ መላ። 16 ꬋያ አሳስ ሀይቆኮ ኤፍያ ሀይቆ ፔኖ፤ ቃስ አትያ አሳስ ደኦኮ ኤፍያ ደኦ ሳዎ፤ ያትን፥ ሄሳ መላ ኦሶስ ግዳናይ ኦኔ? 17 ኑኒ ፆሳ ቃላ ዎ ደማናዉ ኮይድ ዋላክድ ዛልእያ ዳሮ አሳ መላ ግዶኮ። ሽን ፆሳይ ኪትዳ ሱረ አሳታ መላ ክርስቶሳን ደእድ ፆሳ ስንꬃን ቃላ ኦዶስ።