1 ኑኒ ዛሪድ ኑና ሳቢኖዬ? ዎይኮ ሀራ አሳዳ፥ ሳባ ዳብዳብያ ህንተዉ የዳናዉ ዎይኮ ህንተፈ ኤካናዉ ኑና ኮሽዬ? 2 አስ ኡባይ ህንተና ኤራና መላነ ናባባና መላ ህንተ ኑ ዎዛናን ፃፈትድ ደእያ ኑ ዳብዳበ። 3 ህንተ ቃላመን ግዶናሽን፥ ደኦ ፆሳ አያናን፥ ሹቻ ቦላ ግዶናሽን፥ አሳ ዎዛናን ፃፈትዳይሳታነ ኑናን ሀጋዘትዳ ክርስቶሳ ዳብዳበ ግደይሳ በስደታ። ከሳ 24:12፤ ኤርም 31:33፤ ህዝ 11:19፤ 36:26.

4 ኑ ሄሳ ግዳይ፥ ክርስቶሳ ባጋራ ፆሳን አማኖይ ኑስ ደእያ ግሾሳ። 5 ኑ ሄሳ ኦꬃናዉ ዳንዳእዳይ ፆሳ ዎልቃናፐ አትሽን፥ ኑኒ ኑ ዎልቃን አይኮካ ኦꬃናዉ ዳንዳኦኮ። 6 ኑ ኦራꬃ ጫቁዋ ኦሳንቾታ ግዳና መላ ፆሳይ ኑና ዳንዳእስስ። ሄ ኦራꬃ ጫቆይ ጌሻ አያናን በንትዳይሳፈ አትሽን፥ ፃፈትዳ ህገን ግደና። ህገይ ዎꬌስ፥ ሽን ጌሻ አያናይ ደኦ እሜስ። ኤርም 31:31.

7 ሹቻ ቦላ ፃፈትዳ ህገይ እመትያ ዎደ ፆሳ ቦንቾይ ቆንጭስ። ሙሰ ሶምኡዋን ደእያ ቦንቾይ ꬋይሸ ብያባ ግድኮካ፥ እስራኤለ አሳይ እያ ሶምኡዋ ትሽ ኦꬅድ ፄላናዉ ዳንዳእቦኮና። ህዛ፥ ሀይቆ ኤህያ ህገይ ሄሳ መላ ቦንቾን ቆንጭኮ፥ ከሳ 34:29. 8 ያትን፥ ጌሻ አያናን ኦሰትያ ኦሱዋ ቦንቾይ ዋንድ አኔ? 9 አሳ ቦላ ፕርዳ ኤህያ ህገይ ቦንቾ ግድኮ ያትን፥ አሰ ፅልስያ ኦራꬃ ኦገይ ዋንድ አꬍድ ቦንቸተኔ? 10 ካሰ ቦንቾ ግድዳይሳ ሀእ አꬍያ ቦንቾይ ደኤይሳራ ጋꬅ በእያ ዎደ ቦንቾይ ባይናባ ግድስ። 11 ጉꬃ ዎደስ ቆንጭድ ጉየፐ ꬋይዳይስ ሀይሳዳ ቦንቸትኮ፥ መርናዉ ደኤይስ ዋንድ አꬍድ ቦንቸተኔ?

12 ኑስ ሀይሳ መላ ኡፋይሳይ ደእያ ግሾ፥ ዬላቶና ኦደቶስ። 13 ኑኒ፥ እስራኤለ አሳይ ꬋይሸ ብያ ቦንቹዋ ዉርሰꬃ በኦና መላ ባ ሶምኡዋ ካምዳ ሙሰ መላ ግዶኮ። ከሳ 34:33. 14 ሽን ኤንታ ዎዛናይ ዶጭስ። ሀች ጋካናዉ ኤንቲ ጋልአ ጫቁዋ ናባብያ ዎደ ኤንታ ዎዛናይ ሄ ካማን ካመትድ ደኤስ። ሄ ካማይ ክርስቶሳ ፃላላን ቃረቴስ። 15 ሽን ሀች ጋካናዉካ ኤንቲ ሙሰ ማፃፋ ናባብያ ዎደ ኡባን ሄ ካማይ ኤንታ ዎዛና ካሜስ። 16 ሽን ኦንካ ጎዳኮ ስምያ ዎደ አዉደካ ሄ ካማይ ቃረቴስ። ከሳ 34:34. 17 ጎዳይ አያና፤ ጎዳ አያናይ ደእያ በሳን ላአተꬅ ደኤስ። 18 ኑኒ ኡባይ ካመትቦና ሶምኦን ጎዳ ቦንቹዋ በአና። *በአና፦ ማስቶተዳ ዛሪድ ጶልሳና ጌተትድ ብርሸታናዉ ዳንዳኤስ። ኑኒ አያና ግድዳ ጎዳ ማላ ዳናናዉ ቦንቾፈ ቦንቾን ላመታና።