1 ኑኒ ፆሳ ናይታ ጌተትድ ፄገታና መላ ፆሳይ ኑና አይ መላ ዶስዳኮ በእተ። ኑኒ ቱማካ ፆሳ ናይታ። ሀ አላመይ ፆሳ ኤሮና ግሾ ኑናካ ኤረና። ዮሀ 1:12. 2 ታ ሲቆ እሻቶ፥ ሀእ ኑኒ ፆሳ ናይታ፤ ኑኒ አይ ሀናኔኮ ቡሮ ኤረትቤና። ሽን ክርስቶስ ቆንጭያ ዎደ ኑኒ እያ ዳናናይሳ ኤሮስ። እ ቱማ ደኤይሳ ኑኒ በአና። 3 ክርስቶሳ በአና ግድ ኡፋይሳን ናግያ ኦንካ፥ ክርስቶስ ጌሽ ግድዳይሳዳ ባና ጌሼስ።

4 ናጋር ህገ መንꬆ ግድያ ግሾ ናጋራ ኦꬅያ ኡባይ ፆሳ ህገ መንꬄስ። 5 ክርስቶስ አሳ ናጋራ ꬋይሳናዉ ቆንጭዳይሳ ህንተ ኤሬታ፤ እያን ናጋር ባዋ። ዮሀ 1:29. 6 ክርስቶሳን ደእያ ኦንካ ናጋራን ዴና። ቃስ ናጋራን ደእያ ኦንካ እያ በእቤና ዎይኮ ኤርቤና።

7 ታ ናይቶ፥ ህንተና ኦንካ ባለꬆፎ። ክርስቶስ ፅሎ ግድዳይሳዳ ፅሎ ኦꬅያ ኦንካ ፅሎ። 8 ፃላሄይ ኮይሮፐ ናጋራ ኦꬅዳ ግሾ ናጋራ ኡባ ዎደ ኦꬅያ ኦንካ ፃላሄ ዳቦ። ሄሳ ግሾ፥ ፆሳ ናአይ ፃላሄ ኦሶ ꬋይሳናዉ ቆንጭስ። 9 ፆሳ ናአ ግድያ ኦንካ ፆሳ አያናይ እያን ደእያ ግሾ፥ እ ኡባ ዎደ ናጋራን ዴና። ፆሳይ እያ አዋ ግድያ ግሾ ናጋራን ዴና። 10 ፆሳ ናይታ ግዶንነ ፃላሄ ናይታ ግዶን ደእያ ዱማተꬃይ ሄሳን ኤረቴስ፤ ፅሎ ኦꬆና አስ ዎይኮ ባ እሻ ዶሶና አስ ፆሳ ናአ ግደና።

11 ኮይሮፐ ህንተ ስእዳ ኪታይ፥ “እሶይ እሱዋ ዶሳናዉ በሴስ” ግያ ኪታ። ዮሀ 13:34. 12 ኑኒ ቃየላ መላ ግዳናዉ በሰና። ቃየላ ፃላሄ ዳቦ ግድድ ባ እሻ ዎꬍስ። እ ባ እሻ አይስ ዎꬍዴ? እያ ኦሶይ ኢታ ግድዳ ግሾነ እያ እሻ ኦሶይ ሎኦ ግድዳ ግሾ ዎꬍስ።መ 4:8.

13 ታ እሻቶ፥ ሀ አላምያ አሳይ ህንተና እፅኮ ማላለቶፍተ። 14 ኑኒ ኑ እሻታ ሲቅያ ግሾ፥ ሀይቆፐ ደኦ ፕንዳይሳ ኤሮስ። ባ እሻ ዶሶና ኦንካ ሀይቆ ኩያን ደኤስ። ዮሀ 5:24. 15 ባ እሻ እፅያ ኦንካ ሸምፖ ዎꬌስ። ቃስ ሸምፖ ዎꬍያ ኦደስካ መርና ደኦይ ባይናይሳ ህንተ ኤሬታ። 16 ክርስቶስ ባ ሸምፑዋ ኑ ግሾ አꬅድ እምዳይሳን ሲቆይ አይበኮ ኑኒ ኤርዳ። ኑካ ኑ እሻታ ግሾ ኑ ሸምፑዋ አꬅድ እማናዉ በሴስ። 17 ሽን ዱረ ግድዳ ኦንካ መቶታንቹዋ በእሸ፥ እያዉ ቃቶና እፅኮ ባ ዎዛናን ፆሳ ሲቆይ ደኤስ ጋናዉ ዋንድ ዳንዳኢ? 18 ታ ናይቶ፥ ኑኒ ኦሶንነ ቱማተꬃን ኑ ሲቁዋ ቆንጭሳናዉ በሴስፐ አትሽን፥ ጮ ኦዳ ፃላላን ዎይኮ ዶና ፃላላን ሲቀታናዉ በሰና።

19 ኑኒ እሶይ እሱዋ ሲቅኮ፥ ኑ ቱማ ባጋ ግደይሳ ኤሮስ፤ ሄሳስ ፆሳ ስንꬃን ዬላቶኮ። 20 ኑ ዎዛናይ ኑ ቦላ ፕርድያባ ግድኮ፥ ፆሳይ ኑ ዎዛናፐ ግታ ግደይሳ ኤሮስ፤ እ ኡባባ ኤሬስ።

21 ታ ሲቆ እሻቶ፥ ኑ ዎዛናይ ኑ ቦላ ፕርዶናባ ግድኮ ኑኒ ፆሳ ስንꬃን ያዮኮ። 22 ኑኒ እያ ኪታ ናግያ ግሾነ እያ ኡፋይስያባ ኦꬅያ ግሾ ዎስያባ ኡባ እያፐ ኤኮስ። 23 ክርስቶስ ኑና ኪትዳይሳዳ ፆሳ ናኣ የሱስ ክርስቶሳ ሱንꬃን አማናናዳነ እሶይ እሱዋ ሲቃናዳ ፆሳይ ኑና ኪትስ። ዮሀ 13:34፤ 15:12፥ 17. 24 ፆሳ ኪታ ናግያ ኦንካ ፆሳን ደኤስ፤ ፆሳይካ እያን ደኤስ። ፆሳይ ኑስ እምዳ ጌሻ አያና ባጋራ እ ኑናን ደኤይሳ ኤሮስ።