1 ታ ናይቶ፥ ናጋራ ህንተ ኦꬆና መላ ታኒ ሀይሳ ህንተዉ ፃፋይስ። ሽን ኦንካ ናጋራ ኦꬅኮ አዋ ማታን ኑስ ጋናትያ ፅሎይ፥ የሱስ ክርስቶሲ፥ ደኤስ። 2 ኑ ናጋራይ ክርስቶሳ ባጋራ አቶ ጌተቴስ። እ ኑ ናጋራ ፃላላስ ግዶናሽን፥ አሳ ኡባ ናጋራስ ያርሸትስ።

3 ኑኒ ፆሳ ኪታ ናግኮ፥ ስይ ባይናሽን፥ ቱማ ኑ እያ ኤሮስ። 4 ኦንካ፥ “ታኒ እያ ኤራይስ” ያግሸ፥ እያ ኪታ ናጎና እፅኮ ሄ ኡራይ ዎርዳንቾ፤ ቱማተꬅ እያን ባዋ። 5 ሽን እያ ቃላስ ኑ ኪተትያባ ግድኮ ሄ ኡራይ ፆሳ ሲቅያ ሲቆይ ፖሎ ግዴስ። ኑኒ ፆሳን ደኤይሳስ ሄስ ባዉ ቱማ ማርካ። 6 ታኒ፥ “ፆሳን ደአይስ” ግያ ኦንካ ክርስቶስ ደእዳይሳዳ ዳናዉ በሴስ።

7 ታ ሲቆ እሻቶ፥ ታኒ ህንተዉ ኮይሮፐ ደእያ ጋልአ ኪታ ፃፋይስፐ አትሽን፥ ኦራꬃ ኪታ ፃፍከ። እካ ህንተ ስእዳ ሄ ጋልአ ኪታ። ዮሀ 13:34. 8 ግድኮካ፥ ክርስቶሳንነ ህንተናን ቱማ ግድድ ደእያ፥ ኦራꬃ ኪታ ፃፋይስ። ꬉማይ ክችን፥ ሀእ ቱማ ፖኦይ ፖኤስ።

9 “ፖኦን ደአይስ” ግሸ ባ እሻ እፅያ ኦንካ፥ ሀእካ ꬉማን ደኤስ። 10 ባ እሻ ዶስያ ኦንካ ፖኦን ደኤስ። ሄ ኡራን ሀራ አስ ꬉብያባይ ባዋ። 11 ሽን ባ እሻ እፅያ ኦንካ ꬉማን ደኤስ፤ ꬉማን ሄመቴስ። ꬉማይ እያ አይፍያ ቆቅስዳ ግሾ አዉ ብያኮ ኤረና።

12 ታ ናይቶ፥ ክርስቶሳ ሱንꬃ ባጋራ ህንተ ናጋራይ አቶ ጌተትዳ ግሾ ታኒ ህንተዉ ፃፋይስ። 13 አዋቶ፥ ኮይሮፐ ደእያ፥ እያ ህንተ ኤርዳ ግሾ ህንተዉ ፃፋይስ። ያላጋቶ፥ ፃላህያ ህንተ ፆንዳ ግሾ ህንተዉ ፃፋይስ። 14 ጉꬃ ናይቶ፥ ፆሳ ህንተ ኤርዳ ግሾ ህንተዉ ፃፋይስ። አዋቶ፥ ኮይሮፐ ደእያ እያ ህንተ ኤርዳ ግሾ ህንተዉ ፃፋይስ። ያላጋቶ፥ ህንተ ምኖ ግድያ ግሾ፥ ፆሳ ቃላይ ህንተናን ደእያ ግሾነ ፃላህያ ህንተ ፆንዳ ግሾ ህንተዉ ፃፋይስ።

15 አላመ ዎይኮ አላመን ደእያባ ዶሶፕተ። አላምያ ዶስያ ኦንካ ፆሳ ዶሰና። 16 አላመን ደእያ ኡባባይ፥ አሾ አሞተꬅ፥ አይፈን በእድ አሞትያባይነ ሚሸን ጬቀተꬅ አላመባፐ አትሽን፥ ፆሳፈ ግደና። 17 አላመይነ አላመን አስ አሞትያ ኡባይ አꬋና፥ ሽን ፆሳ ሸነ ፖልያ ኦንካ መርናዉ ዳና።

18 ታ ናይቶ፥ ዎድያ ዉርሰꬃይ ማታትስ። ክርስቶሳ ሞርከይ ስንꬃፈ ያናይሳ ህንተ ስእዳይሳዳ ሀር አቶሽን፥ ሀእካ እያ ሞርከት ዳሮት ደንድዶሶና። ሄሳ ግሾ፥ ዎድያ ዉርሰꬃይ ማታትዳይሳ ኑኒ ሄሳን ኤሮስ። 19 ሄ ሞርከት ኑ ባጋ ግዶና ግሾ ኑ ግዶፈ ከይዶሶና። ኤንቲ ኑ ባጋ ግድያኮ ኑ ግዶን ደአና፥ ሽን ኤንታፈ ኦንካ ኑ ባጋ ግዶናይስ ኤረታና መላ ኑ ግዶፈ ከይዶሶና።

20 ሽን ክርስቶስ ህንተ ቦላ ጌሻ አያና ጉስስ፤ ቃስ ህንተ ኡባይ ቱማ ኤሬታ። 21 ቱማ ህንተ ኤርያ ግሾነ ቱማን አይባ ዎርዶይ ባይናይሳ ህንተ ኤርያ ግሾ፥ ታኒ ህንተዉ ፃፋይስፐ አትሽን፥ ቱማ ህንተ ኤሮና ግሾ ግደና።

22 የሱሲ፥ ፆሳይ ዶርዳይሳ ግደና ግድ ካድያ አሳፐ ሀር ዎርዳንቾይ ኦኔ? ሄሳ መላ አስ ክርስቶሳ ሞርከ። እ ናኣ ካድኮ አዋካ ካዴስ። 23 ናኣ ካድያ ኦደስካ አዋይ ባዋ፤ ቃስ ናኣስ ማርካትያ ኦደስካ አዋይ ደኤስ።

24 ሄሳ ግሾ፥ ኮይሮ ህንተ ስእዳ ቃላ ህንተ ዎዛናን ምንꬅድ ናግተ። ኮይሮ ስእዳይሳ ህንተ ናግኮ ህንተዉ ናአራነ አዋራ እስፈተꬅ ዳና። 25 ናአይ ኑስ መርና ደኡዋ እማና ግድ ቃላ ገልስ።

26 ህንተና ባለꬅያ አሳ ግሾ ታኒ ሀይሳ ህንተዉ ፃፋስ። 27 ሽን ክርስቶስ ህንተ ቦላ ባ ጌሻ አያና ጉስስ። ጌሻ አያናይ ህንተናን ደእያ ግሾ ኦንካ ህንተና ታማርሶ ኮሸና። እያ ጌሻ አያናይ ህንተና ቱማ ታማርሰስፐ አትሽን፥ ዎርዶ ግደና። ጌሻ አያናይ ህንተና ታማርስዳይሳዳ ክርስቶሳን ደእተ።

28 ህዛ፥ ታ ናይቶ፥ እ ቆንጭያ ዎደ ኑኒ ያሽ ባይናነ እያ ዩሳ ጋላስ እያ ስንꬃን ኑ ዬላን ቆሰቶና መላ እያን ደእተ። 29 ክርስቶስ ፅሎ ግደይሳ ህንተ ኤርኮ ፅሎ ኦꬅያ ኡባይ ፆሳ ናአ ግደይሳ ኤርተ።