ጌሻ ማፃፋ 1 ዮሃንሳ ኪታ 1

ዮሃንስ ፃፍዳ

ኮይሮ ኪታ

ጋꬃ ቆፋ

ሀዋርያ ዮሃንስ ፃፍዳ ኮይሮ ኪታይ፥ ናምኡ አይፈ ቆፋታ ኦይኬስ።

1. ኪታ ናባበይሳት ፆሳራነ እያ ናኣ የሱስ ክርስቶሳራ እስፈተꬅ ዳና መላ ምንꬃናሳ።

2. እስፈተꬅ ꬋይስያ ዎርዶ ትምርተፈ ሃካና መላ ኤንታ አኬክሳናሳ።

ሄ ዎደ ደንድዳ ዎርዶ ትምርተይ፥ “ፆሳይ በንቶና አያና አላመ መꬍስ። ሀ በንትያ አላምያነ ኑ አሳተꬃ ፆሲ መꬍቦና ግሾ ኢታ። ቃስ ሀ በንትያ አላመይነ ኑ አሳተꬃይ ኑ አያና ቆሀናዉነ ቱንሳናዉ ዳንዳኤና” ያግድ ታማርሶሶና። ሄሳ ጉሳይ፥

1. የሱሲ አሰ ግድድ ይቤና ጉሱ፤

2. እስ አስ ባ አያና ቱንሶና ደእሸ ባ አሾን ናጋራ ኦꬃናዉ ዳንዳኤስ ጉሱ።

ሄሳ ግሾ፥ ዮሃንስ ባ ኪታን፥ የሱሲ አሰ ግድድ ይዳይሳ ካድያ ኦንካ ፆሳ ናአ ግደና (4:2-3)። ቃስ ፆሳፈ የለትዳ ኦንካ ኡባ ዎደ ናጋራን ዴና (3:6) ያግድ ፃፍስ።

ዎርዶ አስታማረት፥ “አቶተꬅ ጉስ፥ ሀ ሳአ ዱሳስ ኡንኤተꬃፈ ከይድ የዳ ግድድ ደኦ” ያጎሶና። ሄሳ ቦላ ጉጅድ፥ “ኢታነ ሎኦ ሻክድ ኦይከꬅ ግድን፥ ቃስ ሀራ አስ ሲቆ ግድን፥ አቶተꬃራ አይብ ጋሄተꬅካ ባዋ” ያጎሶና።

ሀ ኪታ ፃፈይ ሄ ትምርትያ ፓልቅድ፥ “የሱስ ክርስቶሲ ፖሎ አሰ። የሱሳ አማነይሳትነ ፆሰ ሲቀይሳት ኡባይ ባንታ ግዶን እሶይ እሱዋራ ሲቀታናዉ በሴስ” ያግድ ኦድስ።

ማፃፋ አይፈ ቆፋታ

ደኦ እምያ ቃላ (1:1-4)

ፖኦነ ꬉማ (1:5—2:6)

ኦራꬃ ኪታ (2:7-17)

ክርስቶሳ ሞርከነ ፆሳ ናይታ (2:18—3:10)

ፆሳ ሲቆነ ኑ ሲቆ (3:11—4:21)

አላመ ፆንያ አማኖ (5:1-21)

ደኦ ቃላ

1 ኑኒ ኮይሮፐ ዶምድ ደእያ፥ ኑ ሀይꬃን ስእዳ፥ ኑ ፄልዳ፥ አይፈን በእዳ፥ ኑ ኩሸን ቦችዳ ደኦ ቃላባ ህንተዉ ፃፎስ። 2 ሄ ደኦይ ቆንጭን፥ ኑኒ እያ በእድ፥ እያባ ማርካቶስ። አዋ ማታን ደእያ ኑስ ቆንጭዳ፥ መርና ደኡዋባ ህንተዉ አዋጆስ። 3 ኑራ ህንተዉ እስፈተꬅ ዳና መላ ኑኒ በእዳይሳነ ስእዳይሳ ህንተዉ ኦዶስ። ህንተዉ ኑራ እስፈተꬅ ደእያ ግሾ፥ አዋራነ እያ ናኣ የሱስ ክርስቶሳራ እስፈተꬅ ደኤስ። 4 ኑ ኡፋይሳይ ፖሎ ግዳና መላ ሄሳ ህንተዉ ፃፎስ።

ፆሳይ ፖኦ

5 ኑኒ ደኦ ግድዳ እያፐ ስእድ፥ ህንተዉ ኦድያ ኪታይ ሀይሳ፦ “ፆሳይ ፖኦ፤ እያን ꬉም ባዋ” ያገይሳ። 6 ኑስ እያራ እስፈተꬅ ደኤስ ያግሸ ꬉማን ደእኮ፥ ኑ ኦዳንነ ኑ ኦሱዋን ዎርዶቶስ። 7 ሽን ፖኦን እ ደኤይሳዳ፥ ኑካ ፖኦን ደእኮ፥ ኑስ ዎል ግዶን እስፈተꬅ ደኤስ። እያ ናኣ፥ የሱሳ ሱꬃይ ናጋራ ኡባፈ ኑና ጌሼስ።

8 ኑኒ፥ ኑናን ናጋር ባዋ ጊኮ ኑ ኑና ጭሞስ፤ ኑናን ቱም ባዋ። 9 ሽን ፆሳስ ኑ ናጋራ ፓፅኮ፥ እ ኑ ናጋራ አቶ ጋናዉነ ኑ ቆሆ ኦሶ ኡባፈ ኑና ጌሻናዉ፥ አማነትዳይሳነ ቱማ። 10 ኑኒ ናጋራ ኦꬅቦኮ ጊኮ ፆሳ ዎርዳንቾ ከሶስ፤ እያ ቃላይካ ኑናን ዴና።

1:1 ዮሀ 1:1.

1:2 ዮሀ 1:14.