1 ታ ሲቆ እሻቶ፥ ሀይስ ታ ህንተዉ ፃፍዳ ዳብዳበይ ናምአንꬆ። ታኒ ሀ ናምኡ ዳብዳበታካ ህንተዉ ፃፍዳይ፥ ህንተ ሱረ ቆፋ ቆፓናዳ ህንተና ደንꬃናሳ። 2 ቃስ ጌሻ ናበት በን ኦድዳ ቃላነ ኑና አሽያ ጎዳይ፥ ሀዋረታ ባጋራ ኪትዳ ኪታ ህንተ ሀሳያና መላ ኮያይስ። 3 ኡባፈ ካሰትድ፥ ዎደ ዉርሰꬃን ባንታ አሙዋ ካልድ አሰ ቶቸይሳት፥ ቶችሸ ያናይሳ ኤርተ። ይሁ 18. 4 ኤንቲ፥ “ታ ያና ግዳይስ አዉን ደኢ? ኑ አዋት ሀይቅዶሶና፥ ሽን ኡባባይ ሳእ መቶሳፐ ዶምድ ደኤይሳዳ ደኤስ” ያጎሶና። 5 ዳሮ ዎደፐ ካሰ ሳሎይ ፆሳ ቃላን መትዳይሳ፤ ቃስ ሳእ ሃꬃፈነ ሃꬃን መትዳይሳ ኤርሸ ካዶሶና። መ 1:6-9. 6 ሄ ዎደ ደእያ ሳአይ ሃꬃን ምተትድ ꬋይስ።መ 7:11. 7 ሽን ሀእ ደእያ ሳሎይነ ሳእ፥ ጌላት ፕርደትያ ጋላሳይነ ꬋይያ ጋላሳይ ጋካናዉ ሄ ቃላን ታማስ ናገትድ ደኦሶና።

8 ሽን ታ ሲቆ እሻቶ፥ ሀ እስባ ዶጎፕተ። ጎዳ ማታን እስ ጋላስ ሙኩሉ ላይꬃ መላ ግደይሳነ ሙኩሉ ላይꬅ እስ ጋላሳ መላ ግደይሳ ዶጎፕተ። ማዝ 90:4. 9 እሶት እሶት ጋምእስ ግድ ቆፐይሳዳ፥ ጎዳይ ባ ኡፋይሳ ቃላ ግሾ ጋምኤና። ሽን ኦንካ ꬋዮና መላ ኮይድ፥ ኡባይ ባንታ ናጋራፐ ስማና መላ ህንተ ግሾ ግድ ገንጬስ።

10 ሽን ጎዳ ጋላሳይ ካይሶዳ ያና። ሄ ጋላሳን ሳሎት ዎልቃማ ጉንꬃን ꬋያና፤ ሳሎ መተꬃት ታማን ፁገታና፤ ሳእነ እያ ቦላ ደእያ ኡባይ ꬋያና።ማቶ 24:43፤ ሉቃ 12:39፤ 1 ተሰ 5:2፤ ቆን 16:15. 11 ህዛ፥ ኡባባይ ሄሳዳ ሀንዳ ꬋይያባ ግድኮ ህንተ አይ መላ አስ ግዳናዉ በሲ? ህንተ ጌሽነ ፆሳ ዳንያ ደኦ ዳናዉ በሴስ። 12 ህንተ ስንꬃራ ያ ፆሳ ጋላሳ ናግሸ ህንተዉ ዳንዳኤትያባ ኡባ ኦꬅድ ሄ ጋላሳ ኤሶይተ። ሄ ጋላስ ሳሎትነ እያን ደእያባይ ታማን ፁገታና፤ ዎልቃማ ሱላን ትልአና። 13 ሽን ኑኒ ፅሎተꬅ ሃርያ ኦራꬃ ሳሎነ ኦራꬃ ሳአ ፆሳ ኡፋይሳ ቃላዳ ናጎስ። እሳ 65:17፤ 66:22፤ ቆን 21:1.

14 ሄሳ ግሾ፥ ታ ሲቆ እሻቶ፥ ኑ ሄ ጋላሳ ናግያ ግሾ ፖኮይነ ቦረይ ባይናይሳታ ግድድ፥ ጎዳራ ሳሮን ዳናዉ ምንተ። 15 አስ ኡባይ አታና መላ ኮይድ ጎዳይ ዳንዳኤይሳ ዶጎፕተ። ቃስ ኑ ሲቆ እሻይ፥ ጳዉሎስ፥ ፆሳይ እያዉ እምዳ ጭንጫተꬃን ሄሳዳ ህንተዉ ፃፍስ። 16 እ ባ ዳብዳበታ ኡባን ሄሳታባ ፃፍስ። እያ ዳብዳበታ ግዶን አኬካናዉ ዋይስያ ቆፋት ደኦሶና። ታማርቦናነ ምንቦና አሳት ሀራ ፆሳ ቃላ ምርቀይሳዳ ሀ ኪታታካ ꬋያናዉ ማችድ ምርቆሶና።

17 ሄሳ ግሾ፥ ታ ሲቆ እሻቶ፥ ህንተ ሄሳ ኤርያ ግሾ ማካላታ ባላን ጭመትድ፥ ꬋዮና መላነ ምንድ ደእያ በሳፈ ኩንዶና መላ ናገትተ። 18 ሽን ህንተ ኑና አሽያ ኑ ጎዳ፥ የሱስ ክርስቶሳ አꬎ ኬሀተꬃንነ ኤራተꬃን ድጭተ። እያዉ ሀእካ መርናዉካ ቦንቾይ ግዶ። አምንእ።