1 የሱሳ፥ እ ክርስቶሳ ያግድ፥ አማንያ ኦንካ ፆሳ ናአ። አዋ ሲቅያ ኦንካ እያ ናኣካ ሲቄስ። 2 ኑኒ ፆሳ ሲቅያ ግሾነ እያ ኪታ ናግያ ግሾ ፆሳ ናይታ ሲቀይሳ ኤሮስ። 3 ኑኒ ፆሳ ሲቅኮ፥ እያ ኪታታ ናጎስ። እያ ኪታት ዴፆ ግዶኮና። ዮሀ 14:15. 4 አይስ ጊኮ፥ ፆሳ ናአ ግድያ ኦንካ ሀ አላምያ ፆናናዉ ዳንዳኤስ። ኑኒ ሀ አላምያ ፆናናይ ኑ አማኑዋና። 5 አላምያ ፆናናዉ ዳንዳኤይ ኦኔ? የሱሲ ፆሳ ናኣ ግደይሳ አማንያ አሳ ፃላል ፆናና።

6 የሱስ ክርስቶሲ ሃꬃ ፅንቃትያራነ ባ ሀይቁዋ ሱꬃራ ይስ። እ፥ ሃꬃራነ ሱꬃራ ይስፐ አትሽን፥ ሃꬃ ፃላላራ ይቤና። ጌሻ አያናይ ቱማ ግድያ ግሾ፥ ሄስ ቱማ ግደይሳ ማርካቴስ። 7 ሄꬑ ማርካት ደኦሶና። 8 ሄሳት፥ ጌሻ አያና፥ ሃꬃነ ሱꬃ። ሀ ሄꬓታ ማርካተꬃይ እስኖ። 9 ኑ አሳይ ማርካተይሳ አማኖስ። ሽን ፆሳ ማርካተꬃይ አሳይሳፈ ዳሮ አꬌስ። ፆሳይ ባ ናኣስ ማርካትዳ ማርካተꬃይ ሀይሳ። 10 ፆሳ ናኣ አማንያ ኡራ ዎዛናን ሀ ማርካተꬃይ ደኤስ። ፆሳ አማኖና ኦንካ ፆሳይ ባ ናኣስ ማርካትዳ ማርካተꬃ አማንቦና ግሾ፥ ፆሳ ዎርዳንቾ ኦꬄስ።

11 ህዛ፥ ማርካተꬃይ ሀይሳ፤ ፆሳይ ኑስ መርና ደኦ እሚስ፤ ሄ ደኦይካ እያ ናአን ደኤስ ያገይሳ። ዮሀ 3:36. 12 ፆሳ ናአይ ደእያ ኦደስካ ደኦይ ደኤስ። ፆሳ ናአይ ባይና ኦደስካ ደኦይ ባዋ።

13 ፆሳ ናአን አማንያ ህንተዉ መርና ደኦይ ደኤይሳ ህንተ ኤራና መላ ሀይሳ ህንተዉ ፃፋስ። 14 ፆሳ ሸንያዳ አይብባካ እያ ዎስኮ፥ እ ስኤይሳ ኑኒ ኤርያ ግሾ እያን አማነቶስ። 15 ኑኒ ዎስያ ኡባ እ ስኤይሳ ኤርኮ፥ ኑኒ ዎስያባ እ እማናይሳ ኤሮስ።

16 ኦንካ ባ እሻይ ሀይቆ በሶና ናጋራ ኦꬅሽን በእኮ፥ ፆሳ እያዉ ዎሳናዉ በሴስ። ሀይቆ በሶና ናጋራ ኦꬅዳይሳታስ ፆሳይ ደኦ እማና። ሀይቆ በሲያ ናጋር ደኤስ። ታኒ ህንተና ሄሳስ ፆሳ ዎስተ ጊከ። 17 ኢታ ኦሶ ኡባይ ናጋራ፥ ሽን ሀይቆ በሶና ናጋር ደኤስ።

18 ፆሳ ናአይ እያ ናግያ ግሾ፥ ፆሳ ናአ ግድዳ ኦንካ ናጋራን ኡባ ዎደ ደኦናይሳ ኑኒ ኤሮስ። ፃላሄይ እያ ቆሀናዉ ዳንዳኤና። 19 ኑኒ ፆሳሳ ግደይሳነ ሀ ኩመꬃ አላመይ ፃላሄን ሃረተይሳ ኤሮስ።

20 ኑኒ ቱማ ፆሳ ኤራናዳ ፆሳ ናአይ ይዳይሳነ ኑስ አኬካ እምዳይሳ ኤሮስ። ኑኒ እያ ናአ፥ የሱስ ክርስቶሳ ባጋራ ቱማ ፆሳን ደኦስ። የሱሲ ቱማ ፆሳነ መርና ደኡዋ።

21 ታ ናይቶ፥ ኤቃታፐ ህንተ ሃክተ።