1 ታ ጭማይ ዶረትዳ ጎዳተስነ እ ናይታስ ኪትዳ ኪታ። ታ ፃላላ ግዶናሽን፥ ቱማ ኤርያ ኡባይ ህንተና ዶሶሶና። 2 ሀ ቱማይ ኑናን ደእያ ግሾነ መርናዉ ኑራ ዳና ግሾ ታኒ ህንተና ቱማ ዶሳይስ።

3 ፆሳ ኑ አዋነ እያ ናኣ የሱስ ክርስቶሳ አꬎ ኬሀተꬃይ፥ ማሮተꬃይነ ሳሮተꬃይ ቱማንነ ሲቆን እስፈ ኑራ ግዶ።

4 አዋይ ኑና ኪትዳይሳዳ፥ ነ ናይታፐ ባጋት፥ ቱማስ ኪተተይሳ በአዳ ታኒ ዳሮ ኡፋይታስ። 5 ጎዳተ፥ ሀእካ ኑኒ ኡባይ እሶይ እሱዋ ሲቃና መላ ታኒ ነና ዎሳይስ። ሀ ኪታይ ኮይሮፐ ኑራ ደእያ ኪታፐ አትሽን፥ ታኒ ነዉ ኦራꬃ ኪታ ፃፍከ። ዮሀ 13:34፤ 15:12፥ 17. 6 ቱማ ሲቆይ ኑኒ ፆሳ ኪታ ናግድ ዳናይሳ። ቃስ ኮይሮፐ ህንተ ስእዳይሳዳ እያ ኪታይ፥ ህንተ ኡባይ ሲቆን ዳና መላሳ።

7 የሱስ ክርስቶሲ አሰ ግድድ ይዳይሳ አማኖና፥ ዳሮ ባለꬅያ አሳት፥ አላመን ደንድዶሶና። ሄሳ መላ አስ ኦንካ ባለይሳነ ክርስቶሳ ሞርከ። 8 ህንተ ኦꬅዳ ኩመꬃ ዎይቱዋ ኤካናዉ ምንተ። ህንተ ኦꬅዳይስ ꬋዮና መላ ናገትተ።

9 ክርስቶሳ ትምርትያን ዶናይሳስነ እያፐ ሃክያ ኡራስ ፆሳይ ባዋ። ክርስቶሳ ትምርትያን ደእያ ኡራስ አዋይነ ናአይ ደኦሶና። 10 ኦንካ ህንተኮ ይሸ ሀ ትምርትያ ኤሆና እፅኮ፥ ህንተ ሶ ገልሶፍተ፤ ሳሮካ ጎፕተ። 11 እያ ሳሮ ግያ ኦንካ እያ ኢታ ኦሱዋን እያራ ሻከቴስ።

12 ታኒ ህንተዉ ፃፋናዉ ኮይዳ ዳሮባይ ደኤስ፥ ሽን ዎርቃተንነ ቃላመን ፃፋናዉ ኮይከ። ኑ ኡፋይሳይ ፖለታና መላ ህንተራ ሶምኦን ጋሄታዳ ኦደታናዉ ህንተኮ ባና ጋዳ ቆፓይስ።

13 ፆሳይ ዶርዳ ነ ምቸ ናይት ነና ሳሮ ያጎሶና።