1 ታኒ ጭማይ፥ ቱማ ዶስያ ጋዮሳስ ኪትዳ ኪታ። ሀዋ 19:29፤ ሮመ 16:23፤ 2 ቆሮ 1:14. 2 ታ ሲቁዋዉ፥ ኔኒ ነ ሸምፑዋን ሎኦ ደኤይሳ ታ ኤረይሳዳ ነዉ ፓያተꬅ ዳና መላነ ነ ኦꬅያባይ ሱራና መላ ነዉ ፆሳ ዎሳይስ። 3 ጉꬃ አማንያ አሳት ይድ፥ ኡባ ዎደ ኔኒ ቱማን ደኤይሳነ ነ ቱማተꬃባ ማርካትዳ ዎደ ታኒ ዳሮ ኡፋይታስ። 4 ታ ናይት ቱማተꬃን ደኤይሳ ስኤይሳፈ አꬍድ፥ ታና ኡፋይስያባይ ባዋ።

5 ታ ሲቁዋዉ፥ ኤንቲ ነዉ እማ ግድኮካ፥ ኔኒ አማንያ አሳታስ አማንꬅያ ኦሶ ኦꬃሳ። 6 ኤንቲ ነ ሲቁዋባ ዎሳ ኬꬃን ማርካቶሶና። ሀእካ ኤንቲ ብያ ኦግያን ፆሳይ ዶሰይሳዳ ኦꬃዳ ኤንታ ማድኮ ሎኦ ኦꬃሳ። 7 ኤንቲ ክርስቶሳ ሱንꬃ ግሾ ከይሸ፥ አማኖና አሳታፐ አይኮካ ኤክቦኮና። 8 ኑኒ ቱማ ኦሱዋ ኤንታራ እስፈ ኦꬃናዉ ሀይሳ መላ አሳታ ማዳናዉ በሴስ።

9 ታኒ ዎሳ ኬꬃታስ ዳብዳበ ፃፋስ፥ ሽን ኤንታ ሀላቃ ግዳናዉ ኮይያ ድዮትራፍስ ኑኒ ገይሳ ኤከና። 10 ሄሳ ግሾ፥ ታኒ ያ ብያ ዎደ እ ኑ ቦላ ኦደትያ ኢታ ኦዳነ እ ኦꬅዳ ኦሱዋ ኦዳና። እ ሄስ ጉፅስ ግድ፥ ኑ እሻት ያ ዎደ ሞከና። ሀር አቶሽን፥ ኤንታ ሞካናዉ ኮየይሳታካ ድግድ ዎሳ ኬꬃፈ ከሴስ።

11 ታ ሲቁዋዉ፥ ሎኦባ ዳናፐ አትሽን፥ ኢታባ ዳኖፓ። ሎኦባ ኦꬅያ ኦንካ ፆሳ አስ፥ ሽን ኢታባ ኦꬅያ ኦንካ ፆሳ በእቤና።

12 ድመፅሮስ ሎኦ አስ ግደይሳ አሳ ኡባይ ማርካቴስ። ቱማይ ባ ሁጰን እያባ ማርካቴስ፤ ኑካ እያባ ማርካቶስ፤ ኑ ማርካተꬃይ ቱማ ግደይሳ ህንተ ኤሬታ።

13 ታኒ ነዉ ፃፋናዉ ኮይዳ ዳሮባይ ደኤስ፥ ሽን ቃላመንነ ዎርቃተን ፃፋናዉ ኮይከ። 14 ሽን ታኒ ማታራ ኔራ ጋሄታናዉ ቆፓይስ፤ ሄ ዎደ ኑኒ ኦደታና።

15 ሳሮይ ነዉ ግዶ።

ነ ዳቦት ነና ሳሮ ያጎሶና። ኑ ዳቦታ ኡባ ኤንታ ሱንꬃ ሱንꬃ ፄጋዳ ታና “ሳሮ ግስ” ያጋ።