1 ታኒ ይሁድ፥ የሱስ ክርስቶሳ አይለይ፥ ያይቆባ እሻይ፥

ፆሳይ ፄግዳይሳታስ፥ ፆሳ አዋይ ዶሰይሳታስነ የሱስ ክርስቶሳን ናገትዳይሳታስ ሀ ዳብዳብያ ፃፋይስ። ማቶ 13:55፤ ማር 6:3.

2 ማሮተꬅ፥ ሳሮተꬅነ ሲቆይ ህንተዉ ኩሞ።

3 ታ ሲቆ እሻቶ፥ ኑኒ እስፈ ሻከትያ አቶተꬃባ ህንተዉ ፃፋናዉ ታኒ ዳሮ አሞታስ። ሽን አማንያ አሳስ እስቶሆነ ዉርሰꬅ ጋካናዉ እመትዳ አማኑዋስ ኦለታና መላ ህንተና ዞራሸ ፃፋናይስ ታዉ ኮሽያባ ግድስ። 4 ኤንታ ፕርዳይ በንፐ ፃፈትድ ኡትዳ፥ እስ እስ አሳት ኦንካ ኤሮና ህንተ ግዶ ገልዶሶና። ኤንቲ ፆሳ ኤሮናይሳታ፥ ኑ ፆሳ አꬎ ኬሀተꬃ ላይማታናዉ ጎኤትያ ኦገ ኦꬅድ ኤኮሶና። ባ ፃላላ ካዎ ግድዳ፥ ኑ ጎዳ የሱስ ክርስቶሳ ካዶሶና።

5 ሽን ህንተ ሀ ኡባ ኤርያባ ግድኮካ፥ ጎዳይ እስራኤለ አሳ ግብፀ ቢታፈ ዋት ከስዳኮ፥ ቃስ ጉየፐ አማኖናይሳታ ꬋይስዳይሳ ታ ህንተና አኬክሳናዉ ኮያይስ። ከሳ 12:51፤ ታይቦ 14:29-30. 6 ባንታ ደእያሱዋ አግድ፥ ባንታዉ እመትዳ ማታ ናግቦና ኪታንቾታ፥ ግታ ፕርዳ ጋላሳይ ጋካናዉ ፆሳይ ኤንታ ꬉማፐ ጋርሳን መርና ሳንꬃላታን ቃች ዎꬅስ። 7 ሄሳዳ፥ ሶዶመነ ጋሞራ አሳይነ ኤንታ ማታን ደእያ ካታማታን ደእያ አሳይ ላይማትዶሶና፤ ላይማተꬃራ ጋሄትያ ቱናተꬅ ኦꬅዶሶና። ኤንቲ መርና ታማን ፕርደታናይሳታስ ሌምሶ ግድዶሶና። መ 19:1-24.

8 ሄሳዳካ፥ ሀ አሙሀንቾት ባንታ አሳተꬃ ቱንሶሶና፤ ማታ አዋታ ካꬎኦሶና፤ ሳሎ መተꬃታ ጫዮሶና። 9 ሽን ኪታንቾታ ሀላቃይ ምካኤል ሙሰ አሃስ ፃላሄራ ፓላምዳ ዎደ፥ “ጎዳይ ነና ሴሮ” ያግስፐ አትሽን፥ እያ ቦላ ጫሻ ቃላ ኦድድ ሞታናዉ ኮይቤና። ዳነ 10:13፥ 21፤ 12:1፤ ቆን 12:7፤ ዛረ 34:6፤ ዛካ 3:2. 10 ሽን ሀ አሳት ባንታዉ ኤሮናባ ኡባ ጫዮሶና፤ ቃስ ኤንቲ ዎዛን ባይና መሄዳ መꬎን ኤርያ ኤራይ፥ እ ኤንታና ꬋይሳና። 11 ኤንታና አየ! ኤንቲ ቃየላ ኦግያን ብዶሶና። ሚሸ ኮይድ ባላማ ባላን ኩንድዶሶና። ቆረ ጌተትያ አደይ ፆሳ ቦላ ደንድዳይሳዳ ኤንቲ ፆሳ ቦላ ደንድድ ꬋይዶሶና።መ 4:3-8፤ ታይቦ 22:1-35፤ 16:1-35.

12 ሀ አሳት፥ ህንተ ሲቆ ግብራ ምያ በሳን ህንተራ ኡትያ ዎደ ዬል ባይና ካዉሻታ። ኤንቲ ባንታና ፃላላ ሄመይሳታ። ኤንቲ ጫርኮይ ኤፍያ እር ባይና ሻራ መላ። ቃስ አይፈ ዎደን አይፈ አይፎና፥ ፃጶራ ሾደትድ፥ ናምኡ ቶሆ መልዳ ምꬃ መላ። 13 ኤንቲ ሀንቀትዳ አባ ዙልያ መላ ባንታ ፖኩዋ ጎፖንተይሳታ። ኤንቲ መርናዉ ሳካና ꬉማይ ናግያ ቶይላትያ ፆልንቶታ።

14 አዳመፐ ዶምድ፥ ላፑንꬃ የለታ ግድዳ ሄኖከይ፥ ሀ አሳታባ ትንብተ ኦድሸ፥ “ሄኮ፥ ጎዳይ፥ ባ ዳሮ ሙኩሉ ጌሻታራ ያና። መ 5:18፥ 21-24. 15 አሳ ኡባ ፕርዳና፤ ጌላታ ኡባ ኤንቲ ኦꬅዳ ኢታ ኦሶ ኡባ ግሾነ ማካላተꬃን ኤንቲ ፆሳ ቦላ ኦደትዳ ኢታ ኦዳ ኡባ ግሾ ፕርዳና” ያግስ። 16 ሄ አሳት ኡባ ዎደ ዙዙመይሳታነ ኦዳ ኮየይሳታ። ቃስ ባንታ ኢታ አሙዋ ካሎሶና፤ ባንታናን ጬቆሶናነ ባንታና ጎእያባ ደማናዉ ሀራታ ሳቦሶና።

17 ሽን ታ እሻቶ፥ ኑ ጎዳ የሱስ ክርስቶሳ ሀዋረት ካሰ ህንተዉ ኦድዳ ቃላ አኬክተ። 18 ኤንቲ፥ “ዉርሰꬃ ዎድያን፥ ባንታ አሙዋ ካልድ ቶቸይሳት ያና” ያግዶሶና። 2 ጰፅ 3:3. 19 ሄ አሳት አሳ ግዶን ሻሄተꬅ መይሳታ፥ ባንታ አሾ አሙዋስ ሃረተይሳታነ ጌሻ አያናይ ባይናይሳታ።

20 ሽን ታ እሻቶ፥ ጌሽ ግድዳ ህንተ አማኑዋን ህንተና ድቻናዉ ምንተ፤ ቃስ ጌሻ አያና ዎልቃን ዎስተ። 21 ህንተና መርና ደኡዋኮ ጋꬅያ ኑ ጎዳ የሱስ ክርስቶሳ ማሮተꬃ ናግሸ ህንተና ፆሳ ሲቁዋን ናግተ።

22 ስይ ደእያ አሳስ ቃትተ። 23 እስ እስ አሳታ ታማፐ ከስ ኤክተ። ቃስ ኢታ አሞን ቱንዳ ኤንታ ማኡዋ እፅሸ ሀራታስ ያሻን ቃትተ።

24 ህንተ ኩንዶና መላ ናጋናዉ ቦረይ ባይናይሳታነ ግታ ኡፋይሳን ኩምዳይሳታ ኦꬅድ ባ ቦንቹዋ ስንꬃን ህንተና ሺሻናዉ ዳንዳእያ፥ 25 ኑና አሽያ እስ ፆሳስ፥ ኑ ጎዳ የሱስ ክርስቶሳ ባጋራ ቦንቾይ፥ ግታተꬅ፥ ዎልቅነ ማት፥ ካሰካ፥ ሀእካ፥ መርናዉካ እያዉ ግዶ። አምንእ።