ዮሃንሳ ቆንጨꬅ
ጋꬃ ቆፋ
ዮሃንሳ ቆንጨꬃይ ፃፈትዳይ፥ አማንያ አሳይ የሱስ ክርስቶሳ ባንታዉ ጎዳ ኦꬅድ፥ ጌሻተꬃን ደእዳ ግሾ፥ መቶይነ ዋየይ ጋክዳ ዎደና። ፃፈይ ዉድድ ፄልዳ አይፈ ቆፋይ፥ አማንያ አሳ ኡፋይሳይ ኩመꬅ ግዳና መላ ኤንታ ምንꬅድ፥ ኤንታ ጋክዳ ጎዳነ መቱዋ ግዶን ባንታ አማኑዋን ምንድ ኤቃና መላ ደንꬃናሳ።
ማፃፋን ዳርያ ክፍለይ ዳሮነ ካል ካልድ ይዳ ቆንጨꬃታ ኦይኬስ። ሀ ቆንጨꬃት ሄ ዎደ ደእያ አሳስ ገሌስ፥ ሽን ሀራታስ ፁራ ግድድ ጋምእስ። ኤንቲ ኦደትዳይነ ቆንጭዳይ ሌምሶ ኦዳና። ሀ ማፃፋን ደእያ ታይቦት፥ ማካ ሚሸትነ ዶአት ደረታነ አያና መተꬃታ ሌምሶ። ማዝሙረ አዝማቸይ ስም ስሚድ የፀተይሳዳ፥ ሀ ማፃፋን ደእያ ሁጰ ቆፋት ዱማ ዱማ ቆንጨꬃታ ባጋራ ዱማ ዱማ ኦገን ስም ስም ሺቅዶሶና። ሀ ማፃፋ ብርሸꬃስ ዱማ ዱማ ቆፋይ ደእኮካ፥ እያዉ ሁጰ ቆፋይ ቆንጨ። ሄስካ፥ “ፆሳይ ጎዳ ክርስቶሳ ባጋራ ዛረꬆና ኦገን ባ ሞርከታ፥ ፃላሄራ ጉጅድ፥ እስቶሆነ ዉርሰꬅ ፆናና። ሄ ፆኑዋፐ ጉየ፥ እያዉ አማነትድ ደእዳ ባ አሳ ኦራꬃ ሳሎነ ኦራꬃ ሳአ አንጆ ላትሳና” ያጌስ።
ማፃፋ አይፈ ቆፋታ
ዮሃንሳ ሃሳያ (1:1-8)
የሱሲ ላፑን ዎሳ ኬꬃታ ግዶን (1:9-20)
ላፑን ዎሳ ኬꬃታስ ፃፈትዳ ኪታ (2:1—3:22)
ሳሎን ሀንዳ ጎይኖ ቆንጨꬃ (4:1-11)
ፃꬃ ማፃፋነ ላፑን ማታመታ (5:1—6:17)
ፆሳ አራታ ስንꬃን ጎይኖ ማራ (7:1-17)
ላፑን ሞይዘታ (8:2—11:19)
ዳውያነ ናምኡ ዶአታ (12:1—13:18)
ዱማ ዱማ ቆንጨꬃታ (14:1—15:8)
ላፑን ሀንቆ ፁአታ (16:1-21)
ባብሎነ ኩንደꬅ፥ ዶአነ ዎርዶ ናበ (17:1—20:10)
ዉርሰꬃ ፕርዳ (20:11-15)
ኦራꬃ ሳሎነ ሳአ (21:1-8)
ኦራꬃ የሩሳላመ (21:9—22:5)
ክርስቶስ ስሚድ ያና (22:6-21)
1
1 ኤሶን ሀናናዉ ደእያባ ባ አይለታ በሳና መላ ፆሳይ እያዉ እምዳ የሱስ ክርስቶሳ ቆንጨꬃይ ሀይሳ። የሱሲ ባ ኪታንቹዋ ኪትድ፥ ባ አይልያ ዮሃንሳስ ቆንጭስስ። 2 ዮሃንስ ፆሳ ኪታ፥ የሱስ ክርስቶሲ ኦꬅዳባነ ኦድዳባ ኡባ ማርካትስ። 3 ሀ ኡባይ ሀናናዉ ዎደይ ማትዳ ግሾ፥ ሀ ትንብተ ቃላ ናባብያ ኦንካ አንጀትዳይሳ፤ ቃስ ሀ ቃላ ስኤይሳትነ ፃፈትዳ ኪታ ናግያ ኡባይ አንጀትዳይሳታ።
ዎሳ ኬꬃታስ ኪተትዳ ሳሮꬆ
4-5 ሀ ዳብዳበይ፥ ዮሃንሳፐ፥ ኢሰ ቢታን ደእያ ላፑን ዎሳ ኬꬃታስ ፃፈትስ። ካሰካ፥ ሀእካ ደእያ፥ ስንꬃፈካ ያናዉ ደእያ ፆሳፈ፥ ቃስ እያ አራታ ስንꬃን ደእያ ላፑን አያናታፐ፥ ሄሳዳካ፥ ሀይቆፐ ደንዶን ኮይሮ ግድዳይሳፈ፥ ሳኣ ካዎታ ሃርያ አማነትያ ማርካ ግድዳ የሱስ ክርስቶሳፐ፥ አꬎ ኬሀተꬃይነ ሳሮተꬃይ ህንተዉ ግዶ። ከሳ 3:14፤ ቆን 4:5.
የሱሲ ኑና ሲቄስ፥ ቃስ ባ ሱꬃን ናጋራ አይለተꬃፈ ኑና ላአ ከስስ። እሳ 55:4፤ ማዝ 89:27. 6 ኑኒ ፆሳ እያ አዋስ ኦꬃና መላ ኑና ካዎተꬃ ካህነ ኦꬅስ። እያዉ መርናፐ መርና ጋካናዉ ቦንቾይነ ዎልቃይ ግዶ። አምንእ። ከሳ 19:6፤ ቆን 5:10.
7 ሄኮ፥ የሱሲ ሻራራ ዬስ። አሳ ኡባይ ሀር አቶሽን፥ እያ ጫድዳ አሳይካ እያ በአና። ሳአን ደእያ አሳ ኡባይ እያ ግሾ ዬካና። ሄስ ቱማ ሀናና! አምንእ። ዳነ 7:13፤ ማቶ 24:30፤ ማር 13:26፤ ሉቃ 21:27፤ 1 ተሰ 4:17፤ ዛካ 12:10፤ ዮሀ 19:34.
8 “ካሰካ፥ ሀእካ ደኤይስ፥ ስንꬃፈካ ያና ጎዳይ፥ ኡባፈ ዎልቃማ ፆሳይ፥ አልፋነ ኦመግ ታና”*አልፋነ ኦመጋ፦ ግርከ ዶናን አልፋነ ኦመግ ኮይሮነ ዉርሰꬃ ፕዳለታ፤ ብርሸꬃይካ ኮይሮነ ዉርሰꬅ ጉሱ። ያጌስ ጎዳ ፆሳይ። ቆን 22:13፤ ከሳ 3:14.
ጎዳ ቆንጨꬅ
9 ታኒ፥ ዮሃንስ፥ ህንተ እሻይ፥ ህንተራ እስፈ የሱሳን ዋይያ፥ እያ ካዎተꬃነ እያ ዳንዳኣ በአስ። ታኒ ፆሳ ቃላ ግሾነ የሱሳባ ማርካትዳ ግሾ፥ ዩሾይ አባን ተቀትዳ ቢታን፥ ፓፅሞን ደአይስ። 10 ጎዳ ጋላሳን ታ ጌሻ አያናን ሃረታዳ ደአይስ፤ ታፐ ጉየራ ሞይዘ ፑኖ መላ ግታ ግርስ ስአስ። 11 ሄ ግርሳይ ታና፥ “ነ በኤይሳ ማፃፋን ፃፋዳ፥ ኢሰን ደእያ ላፑን ዎሳ ኬꬃታስ:- ኤፈሶና፥ ሳምርኔሳ፥ ጳርጋሞና፥ ትያትሮና፥ ሳርዴሳ፥ ፍላደልፍያነ ሎዶቀ የዳ” ያግስ።
12 ታኒ ታዉ ኦድያ ግርሳ በአናዉ ጉየ ስማዳ ፆምፐ ዎꬅያ ላፑን ዎርቃ ኮጫታ በአስ። 13 ሄ ኮጫታ ግዶን አሳ ናአ ዳነይሳ በአስ። እ አዱሳ አፍላ ባ ቶሁዋ ጋꬅ ማእስ፥ ዎርቃ ዳንጮን ባ ትራ ዳንጭስ። ዳነ 7:13፤ ዳነ 10:5. 14 እያ ሁጰይነ እያ ብናናይ ቦꬃ ዶርሳ እክሰ መላ ዎይኮ ሻቻ መላ ቦꬅ፤ እያ አይፈይ ታማ ላጮ ዳኔስ። ዳነ 7:9.ዳነ 10:6. 15 እያ ቶሆይ ታማን ሴርድ ዞእዳ ናሰ ብራታ ዳኔስ፤ እያ ግርሳይካ ግታ ሻፋ ኮሽንቻ መላ። ህዝ 1:24፤ 43:2. 16 እ ባ ኡሻቻ ኩሸን ላፑን ፆልንቶታ ኦይክስ። እያ ዶናፐ ናምኡ ባጋራ ቃራትዳ ማሻይ ከዬስ። እያ ሶምኦይ ሴታ ጋላሳ አዋ አይፈ ዳኔስ።
17 ታኒ እያ በእዳ ዎደ ሀይቅዳ አሳዳ ሀናዳ እያ ቶሁዋ ማታን ኩንዳስ። እ ባ ኡሻቻ ኩሽያ ታ ቦላ ዎꬅድ፥ “ያዮፋ፤ ኮይሮይነ ዉርሰꬃይ ታና። እሳ 44:6፤ 48:12፤ ቆን 2:8፤ 22:13. 18 ታኒ ደኦን ደአይስ፤ ታኒ ሀይቃስ፥ ሽን ሄኮ መር መርናዉካ ደኦን ደአይስ። ሀይቆነ ስኦለ ቁልፐይ ታ ኩሸና። 19 ህዛ፥ ሀእ ሀንያባነ ስንꬃፈ ሀናናባ ነ በእዳባ ፃፋ። 20 ኔኒ ታ ኡሻቻ ኩሸን በእዳ ላፑን ፆልንቶታነ ላፑን ዎርቃ ኮጫታ ብርሸꬃይ ሀይሳ፦ ላፑን ፆልንቶት ላፑን ዎሳ ኬꬃታ ኪታንቾታ፤ ላፑን ዎርቃ ኮጫት ላፑን ዎሳ ኬꬃታ።”
1:4-5 ከሳ 3:14፤ ቆን 4:5.
1:4-5 እሳ 55:4፤ ማዝ 89:27.
1:6 ከሳ 19:6፤ ቆን 5:10.
1:7 ዳነ 7:13፤ ማቶ 24:30፤ ማር 13:26፤ ሉቃ 21:27፤ 1 ተሰ 4:17፤ ዛካ 12:10፤ ዮሀ 19:34.
*1:8 አልፋነ ኦመጋ፦ ግርከ ዶናን አልፋነ ኦመግ ኮይሮነ ዉርሰꬃ ፕዳለታ፤ ብርሸꬃይካ ኮይሮነ ዉርሰꬅ ጉሱ።
1:8 ቆን 22:13፤ ከሳ 3:14.
1:13 ዳነ 7:13፤ ዳነ 10:5.
1:14 ዳነ 7:9.
1:14 ዳነ 10:6.
1:15 ህዝ 1:24፤ 43:2.
1:17 እሳ 44:6፤ 48:12፤ ቆን 2:8፤ 22:13.