1 ዳዊታስ ሀይቅያ ዎደይ ማትን፥ ባ ናኣ ሶሎሞነ ሀይሳዳ ያግድ ኪትስ፤ 2 “ታ ሀይቅያ ዎደይ ማትስ። ሄሳ ግሾ፥ ምና፤ አሰ ግዳ። 3 ጎዳይ ነ ፆሳይ ኪትዳባ ናጋ፤ እያ ኦግያን ሄመታ፤ ሙሰ ማፃፋን ፃፈትዳ እያ አዋጁዋ፥ እያ ኪታ፥ እያ ህግያነ እያ ዎጋ ናጋ። ሄሳ ነ ኦꬅኮ፥ ነ ኦꬅያባ ኡባይነ ነ ብያ በሳ ኡባይ ነዉ እንጀታና። 4 ጎዳይ፥ ‘ነ ኮቻት ባንታ ደኡዋን ናገትድ ደእኮ፥ ኤንቲ ታ ስንꬃን ባንታ ኩመꬃ ዎዛናፐነ ባንታ ኩመꬃ ሸምፑዋፈ አማነትድ ሄመትኮ፥ እስራኤለ አራታን ኡትያ አስ ነዉ ꬋየና’ ” ያግዳ ኡፋይሳ ቃላ ታዉ ፖላና።

5 ጉጅድካ፥ “ፃሩያ ናአይ እዮኣብ እስራኤለ ናምኡ ቶራ ሞጮናታ ኔራ ናኣ አበኔራነ የተራ ናኣ አማሳ ዎꬍድ፥ እ ኦꬅዳባ ነ ኤራሳ። ሄስካ፥ ኦል ባይናሽን ሳሮ ዎደ ኤንታ ዎꬍድ፥ ሄ ሱꬃን ባ ፄሳ ሳቅያነ ባ ቶሁዋ ጫማ ትይስ። 6 ነ እያ ነ ጭንጫተꬃዳ ኦꬃ፤ እ ጬግድ ሳሮ ሀይቃናዳ ኦꬆፋ።

7 “ሽን ታኒ ነ እሻ አበሰሎመፐ ባቃትያ ዎደ ኤንቲ ታዉ ምየ ግድዳ ግሾ፥ ጋላዳ ቢታን ደእያ ባርዝለ ናይታስ ኬሀባ ኦꬃ፤ ኤንቲ ነ ጋይታፐ ምያ አሳራ ሞ።

8 “ታኒ ማሀናይማ ካታማ ብዳ ዎደ ታና ኢታ ባደꬅ ባድዳ ብንያመ ቢታን ብራቅማ ካታማፐ ይዳ ጌራ ናኣ ሳም ኔራ ደኤይሳ ቆፓ። እ ታራ ጋሄታናዉ ዮርዳኖሰ ሻፋ ይዳ ዎደ፥ ‘ታ ነና ዎꬍከ’ ጋዳ ጎዳን እያዉ ጫቃስ። 9 ሽን ሀእ ኔኒ እያ ፅሎ አሳዳ ታይቦፓ። ነ ጭንጫ አስ ግድያ ግሾ አይ ኦꬃነኮ ኤራሳ። ነ ሄ ጭማ አድያ ሱꬃራ ሞጋ” ያግስ።

10 ዳዊቲ ሀይቅድ፥ ባ ማይዛታን ጋሄትስ፤ ባ ካታማን ሞገትስ። 11 ዳዊቲ እስራኤለ ቦላ ኦይታሙ ላይꬅ ካዎትስ፤ ከብሮናን ላፑን ላይꬅ፥ የሩሳላመን ሀስታማነ ሄꬑ ላይꬅ ካዎትስ። 12 ሶሎሞነይ ባ አዋ ዳዊታ አራታን ኡትስ፤ እያ ካዎተꬃይ ዳሮ ምንስ።

13 ሃግታ ናአይ አዶንያስ፥ ሶሎሞነ አየ በርሳብኮ ብን በርሳባ፥ “ነ ታኮ ሳሮ ያዲ?” ያጋዳ እያ ኦይቻሱ።

እ፥ “ኤ፤ ሳሮ ያስ” ያግድ ዛርስ። 14 ጉጅድካ፥ “ታኒ ነና ኦይችያባይ ደኤስ” ያግስ።

እያ፥ “ኦይቻ” ያጋሱ።

15 አዶንያስ፥ “ካዎታናዉ በሰይ ታና ግደይሳነ እስራኤለ አሳ ኡባይ ታና ባንታዉ ካዎዳ ፄለይሳ ኔኒ፥ ነ ሁጰን ኤራሳ። ሽን ሀኖይ ፆሳፈ ግድዳ ግሾ ኦዳይ ላመትን ካዎተꬃይ ታ እሻኮ ዩይስ። 16 ሀእ ታኒ ነና እስባ ኦይቻና። ሀያና ታና ዬላዮፓ” ያግስ።

እያ፥ “ኦይቻ” ያጋሱ።

17 እ፥ “ካዎይ ሶሎሞነይ ነና እፃስ ጌና፤ ሄሳ ግሾ፥ ሱናማ ማጫስዉ አብሶ ታዉ ማቾ ኦꬃዳ ኤካና መላ ሀያና ታዉ እያ ኦይቻርክ” ያግስ።

18 በርሳባ፥ “ዳሮ ሎኦ፤ ታ ሄሳ ካዋስ ኦዳና” ያጋሱ።

19 ሄሳ ግሾ፥ በርሳበይ አዶንያሳ ኪታ ኦዳናዉ ሶሎሞነኮ ገልን፥ ካዎይ ደንድ ኤቅድ፥ እዉ ዝግስ። ባ አራታን ኡትስ፤ ባ አየስ ሀራ አራታ ኤህስድ፥ ባፐ ኡሻቻ ባጋን ኡትስስ።

20 በርሳባ፥ “ታ ነና እስ ጉꬃባ ኦይችያባይ ደኤስ፤ ሀያና ታና ዬላዮፓ” ያጋሱ።

ካዎይ ዛሪድ፥ “ታ አየ፥ ኦይቻ። ታ ነና ዬላይከ” ያግስ።

21 እያ፥ “ሱናማ ማጫስዉ አብሶ ነ እሻይ አዶንያስ ማቾ ኦꬅድ ኤካናዉ ኮይያ ግሾ እያዉ እማርክ” ያጋሱ።

22 ካዎይ ሶሎሞነይ ዛሪድ፥ “ሱናማ ማጫስዉ አብሶ ነ አዶንያስ አይስ ኦይቻይ? እ ታ ባይራ ግደኔ? ኔኒ እያዉ ካዎተꬅ አይስ ኦይችኪ? ቃስ ካህንያ አብያታርነ ፃሩያ ናአይ እዮኣብ እያራ ደኦሶና ግዶኮና?”

23 ካዎይ ሶሎሞነይ ጎዳን ጫቅድ፥ “አዶንያስ ሀይሳ ኦይችዳ ግሾ ታኒ እያ ዎꬎና እፅኮ፥ ጎዳይ ታና ፕርዶ! 24 ታና፥ ታ አዋ ዳዊቲ አራታን ኡትስድ፥ ታ ካዎተꬃ ምንꬅ ኤስድ፥ ታ ኮቻታስ ባ ቃላ ፖልዳ ጎዳይ ኤርያ መላ፥ አዶንያስ ሀች ሀይቃና!” ያግስ። 25 ካዎይ ሶሎሞነይ ዮዳሄ ናአ ባናያ ኪትን፥ እ ብድ አዶንያሳ ሾጭድ ዎꬍስ።

26 ሄሳፈ ጉየ፥ ካዎይ ሶሎሞነይ፥ ካህንያ አብያታራኮ፥ “ኔኒ ነ ቢታ አናቶታ ባ። ኔኒ ሀይቃናዉ በሳሳ፥ ሽን ታ ነና ዎꬍከ። ኔኒ ታ አዋ ዳዊቲ ስንꬃን ኡባ ሃርያ ጎዳ ታቦትያ ቶካዳሳ፤ ቃስ ታ አዋ መቱዋ ኡባ እያራ ኤካዳሳ” ያግስ። 27 ሶሎሞነይ፥ አብያታር ጎዳ ካህነ ግድዳ በሳፈ ድግድ፥ ጎዳይ ሴሎን ኤለ ሶ አሳስ ኦድዳ ቃላ ፖልስ።

28 አበሰሎመ እፅድ፥ አዶንያሳ ማድዳ እዮኣባ ሀ ኦዳይ ጋክን፥ ባቃትድ ጎዳ ዱንካንያኮ ብድ፥ ያርሾ በሳ ካጨታ ኦይክስ። 29 እዮኣብ ባቃትድ ጎዳ ዱንካንያኮ ብድ፥ ያርሾ በሳ ማታን ደኤይሳ ካዋ ሶሎሞነይ ስእዳ ዎደ፥ ዮዳሄ ናኣ ባናያ፥ “ባዳ እያ ዎꬋ” ግድ ኪትስ። 30 ባናይ ጎዳ ዱንካንያ ግዶ ገልድ እዮኣባኮ፥ “ካዎይ ነና ሀ በሳፈ ከያ ጌስ” ያግስ።

ሽን እ ዛሪድ፥ “ከይከ! ታ ሀይሳን ሀይቃና” ያግስ።

ባናይ፥ ብድ እዮኣብ ግዳይሳ ካዋስ ኦድስ።

31 ካዎይ፥ “እ ግዳይሳዳ እያ ኦꬃ፤ እያ ዎꬋዳ ሞጋ! እዮኣብ ፅሎ አሳ ሱꬁ ጉስዳ ዳፋፐ ታናነ ታ አዋ ሶ አሳ ጌሻሳ። 32 እ ጉስዳ ሱꬃ አጩዋ ጎዳይ እያዉ ቃንፃና። እ፥ ታ አዋ ዳዊቲ ኤሮናሽን፥ ባፐ ፅሎ ግድዳ ናምኡ አሳታ ማሻን ዎꬍስ። እስራኤለ ቶራ ሞጮናይ፥ ኔራ ናአይ አበኔርነ ይሁዳ ቶራ ሞጮናይ የተራ ናአይ አማስ፥ ሱረ አስ ሽን ዎꬍስ። 33 እዮኣብ ሀ አሳታ ዎꬍዳ ግሾ፥ ኤንታ ሱꬃ አጮይ መርናዉ እዮኣባ ቦላነ እያ ኮቻ ቦላ ዎꬎ። ዳዊቲ ቦላነ እያ ሶ አሳ ቦላ፥ እያ ኮቻ ቦላነ እያ አራታ ቦላ መርናዉ ጎዳ ሳሮይ ግዶ” ያግስ።

34 ሄሳ ግሾ፥ ዮዳሄ ናአይ ባናይ ከይድ፥ እዮኣባ ሾጭድ ዎꬍን፥ እ መላ ቢታን ደእያ ባ ጋደን ሞገትስ። 35 ካዎይ ዮዳሄ ናኣ ባናያ እዮኣባ በሳን ቶራ ሞጮና ኦꬅድ ሹምስ፤ ቃስ አብያታራ በሳን ካህንያ ሳዶቃ ሹምስ።

36 ሄሳፈ ጉየ፥ ካዎይ ሶሎሞነይ ሳማ ፄግድ፥ “ነዉ የሩሳላመን ኬ ኬፃዳ፥ ያን ደአ፤ ሀራ ሶ አዉካ ቦፓ። 37 ነ ካታማፐ ከያዳ፥ ቀድሮና ዛንጋራ ፕንዳ ጋላስ ሀይቃናይሳ ኤራ። ነ ሱꬃ ጎመይ ነና ኦይካና” ያግስ።

38 ሳሚ ዛሪድ፥ “ኔኒ ገይስ ሎኦ፤ ታኒ ነ አይለይ ነ ታ ጎዳይ ካዎይ ግዳይሳዳ ኦꬃና” ያግስ። ሳም የሩሳላመን ዳሮ ዎደ ደእስ።

39 ሽን ሄꬑ ላይꬃፈ ጉየ፥ ሳማ አይለታፐ ናምአት ማእካ ናኣ፥ ጋተ ካዋ አንኩሳኮ ብድ፥ “ነ አይለት ጋተን ደኦሶና” ግድ ሳማስ ኦድዶሶና። 40 እ ባ ሀርያ ኮርድ፥ ባ አይለታ ኮያናዉ አንኩሳኮ ጋተ ብድ፥ ያፐ ባ አይለታ ዛሪድ ኤህስ።

41 ሳሚ የሩሳላመፐ ጋተ ብድ ስምዳይሳ ሶሎሞነይ ስእዳ ዎደ፥ 42 ሳማ ፄግድ፥ “ኔኒ የሩሳላመፐ ሀራ ሶ ብዳ ዎደ ሀይቃናይሳ ኤራ” ጋዳ ታ ነና ጎዳን ጫቅሳብክና? ሄ ዎደ ኔኒ፥ “ነ ገይስ ሎኦ፤ ኤሮ፥ ታ ኪተታና” ጋዳሳ።

43 ያትን፥ “ጎዳን ጫቅዳ ጫቁዋነ ታ ኪታ አይስ ናጋብኪ? 44 ታ አዋ ዳዊታ ቦላ ነ ኦꬅዳ ኢታ ኦሶ ኡባ ነ ዎዛናይ ኤሬስ። ነ ኦꬅዳ ኢታ ኦሱዋ ጎዳይ ነዉ ዛራና። 45 ሽን ካዎይ ሶሎሞነይ አንጀታና፤ ዳዊታ አራታይ ጎዳ ስንꬃን መርናዉ ሳሮ ዳና” ያግስ።

46 ካዎይ፥ ዮዳሄ ናኣ ባናያ ኪትን፥ እ ብድ፥ ሳም ሾጭድ ዎꬍስ።

ያትን፥ ካዎተꬃይ ሶሎሞነ ኩሸን ምንድ አትስ።