1 ሶሎሞነይ ግብፀ ካዋራ ቦሎትድ፥ እያ ናእዉ ባዉ ማቾ ኤክስ። ባ ካዎ ጋꬎ፥ ፆሳ ኬꬃነ የሩሳላመ ዩሹዋ ድርሳ ግምብድ ኦንጋና ጋካናዉ እዮ ዳዊታ ካታማን ዎꬅስ። 2 ጎዳ ሱንꬃን ፆሳ ኬꬃይ ቡሮ ኬፀትቦና ግሾ አሳይ ሄ ዎደ ꬎቃ ጎይኖ በሳን ያርሽሸ ጋምእስ። 3 ሶሎሞነይ ጎዳ ዶስያ ባ አዋ ዳዊቲ ዎጋን ሄመትስ። ሽን ꬎቃ ጎይኖ በሳን ያርሽሸነ እፃነ ጩይስሸ ጋምእስ። 4 ካዎይ ያርሾ ያርሻናዉ ጋባኦና ብስ፤ ሄ በሳይ ሀራ ኡባፈ አꬍድ ኮሽያ ꬎቃ ጎይኖ በሲ። ሶሎሞነይ ሙኩሉ መሄ ኤህድ፥ ሄ ያርሾ በሳን ፁሳ ያርሾ ያርሽስ። 5 ጎዳይ ሶሎሞነስ ጋባኦናን ቃማ አሙሆን ቆንጭድ፥ “ታ ነዉ አይ እማና መላ ኮያይ?” ያግስ።

6 ሶሎሞነይ፥ “ነ አይለይ፥ ታ አዋይ ዳዊቲ ነዉ አማነትዳ፥ ፅሎነ ሱረ አስ ግድዳ ግሾ፥ ኔኒ እያ ዶሳዳሳ። ኔኒ ሀ ኬሀተꬃን፥ ሀች እያ አራታን ኡትያ አደ ናኣ እያዉ እማዳሳ።

7 “አቤት ጎዳዉ፥ ታ ፆሳዉ፥ ኔኒ ታና ነ አይልያ፥ ታ አዋ ዳዊታ በሳን ካዎꬃዳሳ። ሽን ታኒ ጉꬃ ናአ ግድያ ግሾ፥ አሳ ዋታዳ ካለꬃኔኮ ኤርከ። 8 ታኒ፥ ነ አይለይ ነ ዶርዳ አሳ ግዶንነ ታይቦይ ባይና አሳ ግዶን ደአይስ። 9 ሄሳ ግሾ፥ ታኒ ነ አሳ አይሳናዉ ሎኦነ ኢታ ሻካዳ ኤራና መላ ታዉ ነ አይልያስ አኬካ ዎዛና እማ። ሄስ ሀኖና እፅኮ፥ ሀ ነ ግታ አሳ ኦን ካለꬃናዉ ዳንዳኢ?” ያግስ።

10 ሶሎሞነይ ሄሳ ኦይችዳ ግሾ፥ ጎዳይ ኡፋይትስ። 11 ፆሳይ እያኮ፥ “ኔኒ ነዉ ላይꬅ አዱቃና መላ ዎይኮ ዱረ ግዳናዉ ዎይኮ ነ ሞርከት ሀይቃና መላ ኦይቾናሽን፥ ሀ አሳ ሱረ ፕርዳን አይስያ ጭንጫተꬅ ኦይችዳ ግሾ፥ 12 ሄኮ፥ ነ ኦይችዳይሳ ታ ነዉ እማና። ሀይሳፈ ካሰ ነ መል ባይናይሳዳ ህዛፐ ጉየ ነ ማል ደንዶናዳ ጭንጫተꬅነ አኬካ ዎዛና ነዉ እማና። 13 ቃስ ነ ኦይቾናባካ ታ ነዉ እማና፤ ኔኒ ደእዳ ላይꬃ ኡባን ሀራ ካዎይ ደሞና ዱረተꬃነ ቦንቹዋ ታ ነዉ እማና። 14 ነ አዋይ ዳዊቲ ሄመትዳይሳዳ ታ ኦግያን ነ ሄመትኮ፥ ታ ዎጋነ ታ ኪታ ናግኮ፥ ታ ነ ላይꬃ አዱሳና” ያግስ። 15 ሶሎሞነይ ꬍስኮፈ ባርክድ፥ ሄኮ፥ ፆሳይ እያዉ አሙሆን ኦድዳይሳ አኬክስ። እ፥ የሩሳላመ ስሚድ፥ ጎዳ ጫቆ ታቦትያ ስንꬃን ኤቅድ፥ ፁሳ ያርሾነ እስፈተꬃ ያርሾ ያርሽስ። ያትድ፥ ባ ሞርናታስ ግብራ ጊግስስ።

16 እስ ጋላስ ናምኡ ላይማ ማጫሳት ካዋ ሶሎሞነኮ ይድ፥ እያ ስንꬃን ኤቅዶሶና። 17 ኤንታፈ እስንያ፥ “ታ ጎዳዉ፥ ታንነ ሀ አስያ እስ ኬꬃን ደኦስ። ያን እያ ታራ እስፈ ደእሽን፥ ታ እስ ናአ የላስ። 18 ታ ናአይ የለትዳ ሄꬓንꬆ ጋላስ ሀ ማጫስያካ እስ ናአ የላሱ። ሄ ኬꬃን ኑፐ፥ ናምኣፈ ሀራ አስ ኦንካ ባዋ።

19 “እስ ቃማ እያ ባና ናኣ ቦላ ዝንእዳ ግሾ፥ ሀ ማጫሰ ናአይ ሀይቅስ። 20 እያ ቃማ ደንዳዳ፥ ታኒ፥ ነ አይልያ ꬍስክዳሽን፥ ታ ናኣ ታ ምየፐ ኤካዳ፥ ባ ክኦን ዎꬃዳ፥ ባ ሀይቅዳ ናኣ ታ ክኦን ዎꬃሱ። 21 ዎንታ ታኒ ታ ናኣ ꬋንꬃናዉ ደንድያ ዎደ፥ ሄኮ ሀይቅስ። ሽን ታኒ ዎንታ ፖኦን ትሽ ኦꬃዳ ፄልያ ዎደ፥ ሄኮ፥ ታ ናኣ ግደና” ያጋሱ።

22 ሀንኮ ማጫስያ፥ “አካይ፥ ፓፃ ደኤይስ ታ ናኣ፤ ሀይቅዳይስ ነ ናኣ” ያጋሱ።

ሽን ኮይሮ ማጫስያ ዛራዳ፥ “አካይ፥ ሀይቅዳይስ ነ ናኣ፤ ፓፃ ደኤይስ ታ ናኣ” ያጋሱ። ሄሳዳ ግድ ኤንቲ ካዋ ስንꬃን ፓላምዶሶና።

23 ካዎይ ሶሎሞነይ፥ “ሀ ማጫስያ፥ ‘ፓፃ ደእያ ናአይ ታይሳ፤ ሀይቅዳይስ ነይሳ’ ያጋዉሱ፤ ሀንክያካ፥ ‘አካይ፥ ነ ናአይ ሀይቅዳይሳ፤ ታ ናአይ ፓፃ ደኤይሳ’ ያጋዉሱ” ያግስ።

24 ካዎይ፥ “ታዉ ማሻ ኤክድ ዪተ” ያግን፥ ኤንቲ እያዉ ማሻ ኤህዶሶና። 25 ካዎይ፥ “ፓፃ ደእያ ናኣ ናምኡ ከስድ ቃንፅድ፤ እስ ባጋ ሀንስ እምተ፤ እስ ባጋ ህንስ እምተ” ያግስ።

26 ፓፃ ደእያ ናአይ እባ ግድዳ ማጫስያ ባ ናኣስ ምሸታዳ፥ “ታ ጎዳዉ፥ ፓፃ ደእያ ናኣ እዉ እማ! እያ ዎꬎፓ” ያጋሱ።

ሽን ሀንክያ፥ “ታዉካ ነዉካ ግዶፖ፤ ናምኡ ከይድ ቃንፀቶ” ያጋሱ።

27 ካዎይ፥ “ናኣ ዎꬎፕተ፤ ሀ ፓፃ ደእያ ናኣ ሀ ኮይሮ ማጫሴስ እምተ፤ ናኣ አይያ እዮ” ያግድ ፕርድስ።

28 እስራኤለ አሳ ኡባይ ካዎይ ፕርድዳ ፕርዳ ስእዳ ዎደ፥ ኤንቲ ካዋ ዳሮ ቦንችዶሶና። አሳስ ፅሎተꬃን ፕርዳናዉ እያዉ ጭንጫተꬅ ፆሳፈ እመትዳይሳ በእዶሶና።