1 ፅሮሳ ካዎይ ክራም ዳዊታራ ስጋን ጋምእዳ ግሾ፥ ሶሎሞነይ ባ አዋ ዳዊታ በሳን ካዎታናዉ ትየትዳይሳ ስእድ፥ አሰ ሶሎሞነኮ ኪትስ። 2 ሶሎሞነይ ዛሪድ፥ 3 “ጎዳይ እያ ሞርከታ እያ ቶሁዋፐ ጋርሳን ሃርሳና ጋካናዉ፥ ታ አዋ ዳዊታ ቦላ ደንድዳ ኦላ ጋሶን፥ ጎዳ ባ ፆሳ ሱንꬃስ ፆሳ ኬꬅ ኬፅቦናይሳ ነ ኤራሳ። 4 ሽን ሀእ ጎዳይ ታ ፆሳይ ታዉ ሸምፖ እሚስ፤ ታዉ አይባ ሞርከይ ዎይኮ ኢታባ ኦይ ባዋ። 5 ጎዳይ ታ አዋ ዳዊታስ፥ ‘ታኒ ነ በሳን፥ ነ አራታን ካዎꬅያ ነ ናአይ ታ ሱንꬃስ ኬ ኬፃና’ ግዳይሳዳ ታኒ ጎዳ ታ ፆሳ ሱንꬃስ ኬꬅ ኬፃናዉ ሀልቻስ። 6 ሄሳ ግሾ፥ ልባኖሰፐ ዝጋ ማስያ አሳታ የዳ፤ ታ አሳት ነ አሳታራ ኦꬃና። ነ አሳታስ ነ ቃንፃ ግዳባ ታ ቃንፃና። ስዶና አሳታዳ ምꬃ ማሰꬃ ሂላ ኑ አሳይ ኤሮናይሳ ነ ኤራሳ” ያግስ።

7 ክራም ሶሎሞነ ኪታ ስእድ ዳሮ ኡፋይትስ፤ “ሀ ግታ ካዎተꬃ ሃራና መላ ዳዊታስ ሀ ጭንጫ ናኣ እምዳ ጎዳይ ጋላተቶ” ያግስ።

8 ሄሳፈ ጉየ ክራም ሶሎሞነኮ ሀይሳዳ ያግድ ኪትስ፤ “ነ ኪትዳ ኪታይ ታና ጋክስ። ኔኒ ኮይዳባ ታኒ ኦꬃና፤ ዝጋነ ፂዳ ታ ነዉ ሺሻና። 9 ታ አሳይ ዱሩማ ጪነꬃ ልባኖሰፐ አባኮ ጋዛና። ታኒ ቃሽሳዳ፥ አባ ቦላራ ቶከትድ ነ ኮይያ በሲ ጋꬃናዳ ኦꬃና፤ ያን ኤንቲ ብርሽድ ነ አሳስ እማና። ሄሳፈ ጉየ፥ ኔኒ ነ ባጋራ ታ ካዎ ኬꬃን ደእያ አሳስ ምያባ ኪታዳ ታ አሙዋ ፖላና” ያግስ።

10 ሄሳዳ ኦꬅድ ክራም ሶሎሞነይ ኮይዳ ኬና ዝጋነ ፂዳ እሚስ። 11 ሶሎሞነይ ካዎ ኬꬃን ደእያ አሳይ ማና መላ 20,000 ኩንታለ ግስተነ 400,000 ልትሮ ሻማሆ ዛይተ ላይꬃን ላይꬃን ፓጮና ክራማስ እሚስ። 12 ጎዳይ ሶሎሞነስ እማና ግዳይሳዳ፥ እያዉ ጭንጫተꬅ እሚስ። ክራምነ ሶሎሞነይ ባንታ ግዶን ሳሮ ደእዶሶና፤ ኤንቲ ናምአይ ባንታ ግዶን ጫቅዶሶና።

13 ካዎይ ሶሎሞነይ እስራኤለ 30,000 ማዳ ኦይሳታ ዶርድ ከስስ። 14 አዶንራማ ጌተትያ አድያ ኤንታ ቦላ ሀላቃ ኦꬅድ ሹምስ። ሄ ኦሳንቾታ ታሙ ታሙ ሙኩላን ሻክድ፥ ሄꬑ ጩጋ ከስስ፤ እስ እስ ጩጋይ ታራን ታራን ብድ፥ እስ አጌና ልባኖሰን ኦꬃናዳነ ናምኡ አጌና ባንታ ሶን ዳናዳ ኦꬅስ። 15 ሶሎሞነስ ቶሆ ቶክያ 70,000 አሳትነ ሹቹ ቆእያ 80,000 አሳት ገዘ ቢታን ደኦሶና። 16 ኤንታ ቦላ ሀላቃ ግድድ ኦስስያ 3,300 አሳታ ሹምስ። 17 ካዋ ሶሎሞነ ኪታን፥ ፆሳ ኬꬃ ባሱዋስ ግዳና መላ ግታ ሹቻታ ቆእድ ጊግስዶሶና። 18 ሶሎሞነ አሳይነ ክራማ አሳይ ኩሸ ሂላ ኤረይሳት፥ ገባላ አሳራ ግድድ፥ ፆሳ ኬꬃ ኬፃናዉ ምꬅ ቃንፅድ፥ ሹቻ ቆእድነ ማስድ ጊግስዶሶና።