1 እስራኤለ አሳይ ግብፀ ቢታፈ ከይዳ 480 ላይꬃን፥ ሶሎሞነይ እስራኤለ ቦላ ካዎትዳ ኦይዳንꬆ ላይꬃን፥ ዚፋ ጌተትያ ናምአንꬆ አጌናን፥ ሶሎሞነይ ጎዳ ፆሳ ኬꬅ ኬፃናዉ ዶምስ። 2 ሶሎሞነይ ኬፅዳ ፆሳ ኬꬃይ አዱሳተꬃይ ኡሱፑን ታሙ ዋꬋ፤ ጎምፓይ ላታሙ ዋꬋ፤ ጌሳይ ሀስታሙ ዋꬋ። 3 ፆሳ ኬꬅ ገልያ በሳን ደእያ ባራንዳ ጎምፓይ ፆሳ ኬꬃ ጎምፓ መላ ላታሙ ዋꬋ፤ ኬꬃ አዱሳተꬃይ ፆሳ ኬꬃ ገልያ በሳ ጋካናዉ ታሙ ዋꬋ። 4 ፆሳ ኬꬃስ ሶ ባጋራ ዳልጋ፥ ካረ ባጋራ ፁንꬃ ማስኮተት ደኦሶና። 5 ፆሳ ኬꬃ ማታን፥ ጌሻ በሳነ ኡባፋ ጌሻ በሳ ዩሹዋን ሀራ ፖቀ ኬፅስ፤ ሄ ዩሹዋን ክፍለታ ኬፅስ። 6 ኮይሮ ፖቅያ ጎምፓይ እቻሹ ዋꬋ፤ ናምአንꬆ ፖቅያ ጎምፓይ ኡሱፑን ዋꬋ፤ ሄꬓንꬆ ፖቅያ ጎምፓይ ላፑን ዋꬋ። እስ እስ ፖቅያ ጎዳይ ጋርሳ ባጋራ ደእያ ጎዳፐ ሌኦ። ጌሻ በሳ ካንꬅድ ገሎና መላ ፆሳ ኬꬃ ጎዳስ ካረ ባጋራ ተቀ ዎꬅስ።

7 ፆሳ ኬꬃይ ሹቻ ቆእያ በሳን ማሰትዳ ሹቻ ፃላላን ግምበትስ፤ ፆሳ ኬꬃይ ግምበትያ ዎደ ናርቃ፥ ካልታ፥ ዎይኮ ሀራ አይ ብራታ ግርስ ፆሳ ኬꬃን ስኤትቤና።

8 ጋርሳራ ደእያ ፖቅያ ገልያ ፐንገይ ፆሳ ኬꬃፈ ዱገሀ ባጋራ ደኤስ፤ ሄ በሳፈ ናምአንꬆ ፖቅያነ ሄꬓንꬆ ፖቅያ ባናዉ የꬍድ ከይያ ደꬃት ደኦሶና። 9 ሄሳዳ ኦꬅድ፥ ሶሎሞነይ ኬꬃ ኬፅድ ዉርስስ፤ ኮርንስያ ማሰትዳ ዝጋ ምꬃን ካምስ። 10 ፆሳ ኬꬃ ዩሹዋን ፖቀታ ኬፅድ ኦንግስ፤ ኤንታ እሱዋ እሱዋ ጌሳይ እቻሹ ዋꬋ ግድድ፥ ጎዳራ ዝጋ ምꬃን ኦይከትስ።

11 ጎዳይ ሶሎሞነኮ፥ 12 “ሀ ኔኒ ኬፅያ ፆሳ ኬꬃን፥ ኔኒ ታ አዋጁዋ ካልኮ፥ ታ ዎጋ ኦꬅኮ፥ ታ ኪታ ናግኮነ ታ ኪታ ኪተትኮ፥ ታኒ ነ አዋ ዳዊታስ እምዳ ኡፋይሳ ቃላ ነ ባጋራ ፖላና። 13 ታኒ እስራኤለ አሳ ግዶን ዳና፤ ታኒ ታ አሳ እስራኤለ አግከ” ያግስ። 14 ሶሎሞነይ ፆሳ ኬꬃ ኬፅድ ኦንግስ።

15 ፆሳ ኬꬃ ጋꬃ ባጋ ጎዳ፥ ዉይገፐ ብድ ካራ ጋካናዉ ማሰትዳ ዝጋ ምꬃን ካምስ፤ ዉይግያን ማሰትዳ ፂዳ ምꬅ ሂፅስ። 16 ፆሳ ኬꬃ ግዶን ኡባፈ ጌሻ በሳ መꬋናዉ ጉየ ባጋራ ላታሙ ዋꬋ ግድያ በሰ ሻክድ፥ ዉይገፐ ካራ ጋካናዉ ማሰትዳ ዝጋ ጎዳ ኤስስ። 17 ሄ ኡባፈ ጌሻ በሳፈ ስንꬃ ባጋራ ደእያ ዉይግያ አዱሳተꬃይ ኦይታሙ ዋꬋ። 18 ፆሳ ኬꬃ ሶ ባጋይ ጎሰነ ጪሻ ምስልያ መꬍዳ ማሰትዳ ዝጋ ምꬃን ካመትስ፤ ኡባይ ዝጋፐ ኦሰትስ፤ አይ ሹችካ በንተና።

19 ሶሎሞነይ ጎዳ ጫቆ ታቦትያ ዎꬃናዉ ፆሳ ኬꬃ ግዶን ኡባፈ ጌሻ በሳ ጊግስስ። 20 ኡባፈ ጌሻ በሳይ ላታሙ ዋꬋ አዱሰ፥ ላታሙ ዋꬋ ዳልጋነ ላታሙ ዋꬋ ꬎቃ። ሶሎሞነይ ሄ ኡባፈ ገሻ በሳ ጋꬃ ባጋ ዋላህ ባይና ዎርቀን ላንፅስ፤ ያርሾ በሳይ ማሰትዳ ዝጋ ምꬃን ካመትስ። 21 ሶሎሞነይ ፆሳ ኬꬃ ግዱዋ ዋላህ ባይና ዎርቀን ላንፅስ፤ ዎርቃን ላንፀትዳ ቆልአ ገልያ ፐንግያ ቦላ ያነ ሃነ ጋክያ ዎርቃ ሳንꬃላታ ቶልድ አሌቅስስ። 22 ኬꬃ ግዶ ባጋ ዎርቃን ላንፅስ፤ ኡባፈ ጌሻ በሳ ስንꬃን ደእያ ያርሾ በሳ ዎርቃን ላንፅስ።

23 ኡባፈ ጌሻ በሳን ዎꬃናዉ እሶይ እሶይ ታሙ ዋꬋ አዱቅያ ሻማሆፐ ኦሰትዳ ናምኡ ክሩበ ምስለታ ማስድ ጊግስስ። 24 ኮይሮ ክሩብያ ቀፈይ፥ እሶይ እቻሹ ዋꬋ፤ ናምአንꬆይ እቻሹ ዋꬋ፤ ኮይሮ ቀፍያ ፄራፐ ብድ ናምአንꬆ ቀፍያ ፄራ ጋካናዉ ታሙ ዋꬋ። 25 ናምአንꬆ ክሩበይ ታሙ ዋꬋ፤ ናምኡ ክሩበታ ሀኖታይነ መꬎይ እስ መላ። 26 እስ ክሩብያ ጌሳይ ታሙ ዋꬋ፤ ናምአንꬆ ክሩብያ ጌሳይ ሄሳ መላ። 27 ሶሎሞነይ ፆሳ ኬꬃን ደእያ ኡባፈ ጌሻ በሳን ክሩበታ ዎꬅስ። ኤንታ ቀፈይ ምጨትድ ኡትስ፤ እስ ክሩብያ ቀፈይ እስ ባጋ ጎዳ ቦችያ ዎደ፥ ሀንኮ ክሩብያ ቀፈይ ሀንኮ ባጋ ጎዳ ቦቼስ፤ ኤንታ ናምኣ ቀፈይ ሶ ግዶን እሶይ እሱዋ ቦቾሶና። 28 ሶሎሞነይ ክሩበታ ዎርቃን ላንፅስ።

29 ቆልአነ ዉይገ ጎዳ ኡባ ክሩበታ፥ ዛምባነ ጪሻ ምስለን አሌቅስስ። 30 ፆሳ ኬꬃ ግዶ ክፍልያ ዉይግያ ካረ ባጋ ክፍልያ ዉይግያ ዎርቃን ላንፅስ።

31 ኡባፈ ጌሻ በሳ ገልያ ፐንግያን ሻማሆ ምꬃፈ ሳንቃ ጊግስስ። ፐንገ ጎባነታስ እቻሹ ባጋራ ማዛነይ ደኤስ። 32 ሻማሆ ምꬃፈ ኦሰትዳ ናምኡ ሳንቃታ ቦላ ክሩበታ፥ ዛምባነ ጪሻ ምስለ ጊግስድ ሳንቃታ፥ ክሩበታነ ዛምባ ዎርቃን ላንፅስ። 33 ሄሳዳካ፥ ፆሳ ኬꬃ ገልያ ፐንግያ ሻማሆፐ ኦሰትዳ ኦይዱ ማዛነራ ደእያ ሳንቃ ጊግስስ። 34 እ ሄ ፐንግያ እስ እስ ሳንቃይ ግዶን ዳኮትድ ዶየትያ ናምኡ ሳንቃታ ከስስ። 35 ክሩበታ፥ ዛምባነ ጪሻ ምስለታ ኤንታ ቦላ ዎꬅስ፤ ኤንታ ቦላ ዎርቃ እስ ግና ኦꬅድ ላንፅስ።

36 ሶ ባጋራ ደእያ ዳባባ ግምብስ፤ ሄ ግምብያ ቦላ ማሰትዳ ሄꬑ ሹቹ፥ እሱዋ እሱዋ ቦላ ዎꬅድ፥ እስ ማሰትዳ ዝጋ ኤንታ ቦላ ዎꬅድ ግምብስ።

37 ፆሳ ኬꬃ ባሶይ ሶሎሞነይ ካዎትዳ ኦይዳንꬆ ላይꬃን፥ ዚፋ ጌተትያ ናምአንꬆ አጌናን ባሰትስ። 38 ሶሎሞነይ ካዎትዳ ታማነ እስንꬆ ላይꬃን፥ ቡላ ጌተትያ ሆስፑንꬆ አጌናን ፆሳ ኬꬃይ ሀልችዳይሳ መላ ኬፀትድ ዉርስ። ሶሎሞነይ ፆሳ ኬꬃ ላፑን ላይꬃን ኬፅድ ዉርስስ።