1 ሶሎሞነይ ባ ጋꬉዋ ታማነ ሄꬑ ላይꬃን ኬፅድ ዉርስስ። 2 “ልባኖሰ ዎራ ኬꬃ” ጌተትያ ኬꬃ ሶሎሞነይ ኬፅስ፤ ሄ ኬꬃ አዱሳተꬃይ ፄቱ ዋꬋ፤ ጎምፓይ እሻታሙ ዋꬋ፤ ጌሳይ ሀስታሙ ዋꬋ። ዝጋ ቱቀት ኦይዱ ማራን ኤቅዶሶና፤ ማሰትዳ ዝጋ ምꬃት ኤንታ ቦላ ዎꬍዶሶና፤ 3 ዝጋ ምꬃት ሄꬑ ማራን፥ እስ እስ ማራን ታማነ እቻሹ ምꬃት ደኦሶና፤ ኤንቲ ኩመꬅ ኦይታማነ እቻሻ። 4 ሄ ኬꬃስ ማስኮተት ሄꬑ ማራን ደኦሶና፤ ኤንቲ እሶይ እሱዋ ስንꬃን ደኦሶና። 5 ፐንገትነ ማስኮተት ኦይዱ ማዛነራ ደኦሶና፤ ማስኮተት ሄꬑ ማራን ግድድ፥ እሶይ እሱዋ ስንꬃን ደኦሶና።

6 ሶሎሞነይ፥ “ቱኡቀይ ኩምዳ ኬꬅ” ጌተትያ ኬꬅ ኬፅስ፤ ሄ ኬꬃ አዱሳተꬃይ እሻታሙ ዋꬋ፤ ጎምፓይ ሀስታሙ ዋꬋ። ሄ ኬꬃ ስንꬃን ዳሮ ቱቀን ዘምፕዳነ ቦላራ ካራን ካመትዳ ባራንድ ደኤስ። 7 ሶሎሞነይ ፕርዳ አራታይ ደእያ “ፕርዳ ኬꬅ” ኬፅስ፤ ሄ ኬꬃይ ዉይገፐ ብድ ካራ ጋካናዉ ዝጋን ካመትድ ኡትስ። 8 ፕርዳ ኬꬃፈ ጉየ ባጋራ ደእያ ሀራ ዳባባን ባዉ ዳናዉ ካዎ ጋꬎ ሀንኮ ኬꬃታዳ ኦꬅድ ኬፅስ። ባ ማቸ፥ ግብፀ ካዋ ናኤስ፥ ሄ ኬꬃ መላ ሀራ ኬ ኬፅስ።

9 ሀ ኬꬃት ኡባይ፥ ካረፐ ዶምድ ድርሳፈ ሶራ ደእያ ግታ ጉታራ ጋካናዉ፥ ባሱዋፐ ዶምድ ካራ ጋካናዉ፥ ልክድ ማስዳነ ሶራነ ካረራ ጊግስዳ ሎኦ ሹቻን ኦሰትዶሶና። 10 ግምበይ ሂፀትዳይ ታሙ ዋꬋ ዎይኮ ሆስፑን ዋꬋ ግድያ ሎኦ ማሰትዳ ግታ ሹቻና። 11 ቦላ ባጋራ ልከትድ ማሰትዳ ሎኦ ሹችነ ዝጋ ምꬅ ደኤስ። 12 ግታ ዳባባ ዩሹዋን ደእያ ግምበይ ፆሳ ኬꬃዳነ ባራንዳዳ ማሰትዳ ሄꬑ ሹቹ፥ እሱዋ እሱዋ ቦላ ዎꬅድ፥ እስ ማሰትዳ ዝጋ ኤንታ ቦላ ዎꬅድ ግምብስ።

13 ካዎይ ሶሎሞነይ፥ ክራማ ጌተትያ አድያ ፅሮሳፐ ኤህስ። 14 ክራማ አይያ አምኦ፤ እያ ንፍታለመ ኮቸ። እያ አዋይ ፅሮሳ አስ። ክራም ናሰ ብራታ ቆፅያ ሂል ደእያ አሰ፤ እ ናሰ ብራታ ቆፅድ ኦꬅያባን ዳሮ ሎህዳ አስ፤ እ ሶሎሞነኮ ይድ እያ ኦሶ ኡባ ኦꬅስ።

15 ክራም እሱዋ እሱዋ ጌሳይ ታማነ ሆስፑን ዋꬋ አዱቅድ፥ ዩሾይ ታማነ ናምኡ ዋꬋ ዳልግዳ ናምኡ ቱሳታ ናሰ ብራታ ሴርስድ ከስስ። ሄ ቱሳ ኦርደተꬃይ ኦይዱ ብራ። ናምአንꬆ ቱቀይካ ሄሳ መላ። 16 ሄሳዳካ፥ ቱሳታ ሁጰን ዎꬃናዉ ናምኡ ጉምቦታ ናሰ ብራታ ሼሽድ፥ መꬍስ፤ እስ እስ ጉምቦይ እቻሹ ዋꬋ አዱቄስ። 17 ቱኡሳ ሁጰን ደእያ እስ እስ ጉምቦታ ግተዳ ኦꬅዳ ላፑን ሳንꬃላታ ኦꬅስ። 18 ቱሳታ ፄራን ደእያ ጉምቦታ አሌቅሳናዉ ናምኡ ማራን ኦሮማነ ምስለ አሌቅስስ። 19 ባራንዳን ኤቅዳ ቱሳታ ቦላ ደእያ ጉምቦት ጪሻ መꬎን አሌቀትዶሶና፤ ኤንታ ጌሳይ ኦይዱ ዋꬋ። 20 ናምኡ ቱቀታ ሁጰን ደእያ ጉምቦታን ገርቶ ግድድ ኡትዳ በሳፈ ቦላ ባጋራ፥ ሳንꬃላታ ግትያ ካልድ፥ ናምኡ ፄቱ ኦሮማነ ምስለት ናምኡ ማራን ዩይ አꬍድ ደኦሶና። 21 ክራም ሄ ናምኡ ቱሳታ ፆሳ ኬꬃ ባራንዳ ማታን ኤስስ። ኡሻቻ ባጋራ ኤቅዳ ቱሳ ያክና ግድ ሱንꬅስ፤ ሀድርሳ ባጋራ ኤቅዳ ቱሳ ቦኤዛ ግድ ሱንꬅስ። 22 ቱሳታ ሁጰን ደእያ ጉምቦት ጪሸ ዳንድ መትዶሶና። ሄሳዳ ሀንድ ቱሳታ ኦሶይ ፖለትስ።

23 ክራም አባ ሳንያ ጌተትያ እስ ዳሮ ግታ ሳንያ ናሰ ብራታ ሼሽድ መꬍስ። ሄ አባ ሳንያ ዶናይ ሀ ጋፃፐ ያ ጋፃ ጋካናዉ ታሙ ዋꬋ፤ ጌሳይ እቻሹ ዋꬋ፤ ዩሾይ ሀስታሙ ዋꬋ። 24 አባ ሳንያ ዶናን ካረ ባጋራ ዝቅ ግድ፥ እያራ ኦይከትድ መትዳ ጎሰ ምስለት ደኦሶና፤ ሄ ጎሰታ ምስለት ናምኡ ማራን፥ እስ እስ ዋꬋን ታማይ ታማይ ዩይ አꬍድ ሹየትዶሶና።

25 አባ ሳነይ ናሰ ብራታፐ መትዳ ታማነ ናምኡ ቦራታ ምስለታ ዞኩዋን ኡትስ። ቦራ ምስለታፐ ሄꬓት ፑደሀ ባጋ፥ ሄꬓት ዶሎሀ ባጋ፥ ሄꬓት ዱገሀ ባጋ፥ ሄꬓት ዉሎሀ ባጋ ስሚድ ፄሎሶና። አባ ሳነይ ኤንታ ቦላ ኡትስ። 26 አባ ሳነይ ኦይዱ ብራ ኦርደ፤ እያ ዶናይ ዋንጫ ዶና መላ፤ ጪሸ ዳኔስ። አባ ሳነይ ኦይታማነ እቻሹ ሙኩሉ ልትሮ ግድያ ሃ ኦይኬስ።

27 ክራም ታሙ ጋረታ ናሰ ብራታፐ መꬍስ። ሄ ጋረት እሶይ እሶይ ኦይዱ ዋꬋ አዱሰ፤ ኦይዱ ዋꬋ ዳልጋነ ሄꬑ ዋꬋ ꬎቃ። 28 ሄ ጋረት ሀይሳዳ ኦሰትዶሶና፤ ፑደ ኤቅዳ ኦይዱ ብራታ ቦላ ፕድ ግዳ ሎቸ ናሰ ብራታት ኦይከትድ ኡትዶሶና። 29 ሄ ብራታ ቦላ ጋሞ፥ ቦርነ ክሩበ ምስለት ደኦሶና፤ ጋሞነ ቦራ ምስለታፐ ሁጰራነ ቶሆራ ደእያ ብራታታ ቦላ ቆፅድ መꬍዳ ጪሻ ኤንጩርሳ ምስለት ደኦሶና። 30 እስ እስ ጋርያስ ናሰ ብራታፐ ኦꬅዳ ኦይዱ ገርቶትነ ገርቶታ ጋꬅድ ዋፅያ ናሰ ብራታ ካሶት ደኦሶና። ሄሳዳካ፥ ኦይዱ ማዛነን ከርያ ዘምፕስያባት ደኦሶና። ሄ ዘምፕስያባት ጪሻ ኤንጩርሳ ምስለታን አሌቀትድ ኡትዶሶና። 31 ጋርያ ዘምፕስያ ሚሸታ ሁጰን ገርቶት ኡትዳ ዶያ በሲ ደኤስ፤ ሄ ዶያይ ጋርያ ፄራፐ ፑደ እስ ዋꬋ ꬎቁ ግድ፥ ዱገ ታካꬎ ዝቅ ግድ መትስ። ሄ ዶያ በሳ ዶና ዩሾይ ምስለን አሌቀትስ። 32 ገርቶታ ጌሳይ እስ ዋꬋነ ታካꬎ፤ ገርቶት ሎቸ ናሰ ብራታታስ ጋርሳ ባጋራ ደኦሶና። ገርቶት ኦይከትድ ኡትዳ ካሶት ጋርያራ ኦይከትድ ኡትዶሶና። 33 ገርቶት ኦላ ፓራ ጋረ ገርቶታ መላ መትዶሶና፤ ገርቶታ ጋꬅድ ኦይክያ ካሶት፥ ማጫራትነ ኤንታ ኦይክያ ሚሸት ኡባይ ናሰ ብራታፐ ኦሰትዶሶና። 34 ሄ ጋረታ ኡባ ማዛነታስ ኤንታ ቶሆሶራ ቶሆሶራ ኤንታራ እሶ ግድድ ኦይከትዳ ናሰ ብራታፐ ኦሰትዳ ዘምፖት ደኦሶና። 35 እስ እስ ጋርያ ሁጰ ባጋ ዩሹዋን ታካꬎ አዱቅያ ክርክሮይ ደኤስ፤ ዘምፖትነ ሎቸ ናሰ ብራታት ጋርያራ ኦይከትድ፥ እሶ ግድድ ኦሰትዶሶና። 36 ሀ ዘምፖታፐነ ሎቸ ናሰ ብራታታፐ ግዶን ደእያ ዶያ በሳ ኡባይ ክሩበን፥ ጋሞንነ ዛምባ ምስለተን አሌቀትድ ኡትዶሶና፤ ኤንታ ዩሾይ ጪሻ ኤንጩርሳ ምስለን አሌቀትድ ኡትስ። 37 ህዛ ታሙ ጋረት ሀይሳዳ ኦሰትዶሶና፤ ኤንታ ላንፅዳ ሚሸይ እስኖ ግድያ ግሾ ኤንታ ጌሳይነ ኤንታ መꬎይ እስ መላ።

38 ክራም ሜጨትያ ታሙ ከረታ ናሰ ብራታፐ መꬍስ፤ እስ እስ ከርያ ጎምፓይ ኦይዱ ዋꬋ ዳልጋ ግድድ፥ ሆስፑን ፄቱ ልትሮ ሃ ኦይኬስ፤ ታሙ ጋረታስ ሁጰን ሁጰን እስ እስ ሜጨትያ ከረይ ደኤስ። 39 ክራም እቻሹ ጋረታ ፆሳ ኬꬃፈ ፑደሀ ባጋራ፥ እቻሹ ጋረታ ፆሳ ኬꬃፈ ዱገሀ ባጋራ ዎꬅስ፤ ናሰ ብራታፐ ኦሰትዳ አባ ሳንያ ፆሳ ኬꬃፈ ዱገሀ ዶሎሀ ባጋ ዛሪድ ኤስስ።

40 ክራም ቃጰታ፥ አካፋታነ ፃሮታ መꬍስ፤ ያትድ ካዋ ሶሎሞነስ ፆሳ ኬꬃ ኦሱዋ ኦꬅድ ፖልስ። 41 እ ኦꬅዳ ኦሶት፥ ናምኡ ቱሳታ፥ ቱሳታ ሁጰን ደእያ ሳነ ዳንያ ናምኡ ጉምቦታ፥ ቱሳታ ቦላ ደእያ ናምኡ ጉምቦታ አሌቅስያ ናምኡ ሳንꬃላታታ፥ 42 እስ እስ ጉምቡዋ ቦላ ናምኡ ማራን ናሰ ብራታፐ ኦሰትዳ እስ እስ ፄቱ ኦሮማነ ምስለታ፥ ኩምꬅ ኦይዱ ፄቱ ኦሮማነ ምስለታ፥

ክራም ካዋ ሶሎሞነስ ፆሳ ኬꬃ ኦሱዋስ መꬍዳ ሚሸታ ኡባ ቁሸትዳ ናሰ ብራታፐ መꬍስ። 46 ካዎይ ሶሎሞነይ ሱኮታፐነ ፃርታናፐ ግዶን፥ ዮርዳኖሰ ደንባን ደእያ፥ ናሰ ብራታ ሼሽያ በሳን ሀይሳታ ኦስስስ። 47 ናሰ ብራታፐ ኦሰትዳ ሚሸይ ዳሮ ግድዳ ግሾ፥ ሶሎሞነይ እያ ማዛንስቤና፤ ሄሳ ግሾ፥ አይ መላ ዴፅያኮ ልከይ ኤረትቤና።

48 ሶሎሞነይ ፆሳ ኬꬃ ግዶን ደእያ ሚሸታ ኡባ ዎርቃፈ መꬍስስ። ሄሳትካ፥ ዎርቃፈ ኦሰትዳ ያርሾ በሳ፥ ጎዳ ስንꬃን ዎꬅያ ኡይꬃይ ኡትያ ፃርጴዛ፥ 49 ኡባፈ ጌሻ በሳፈ ስንꬃን ኡሻቻ ባጋራነ ሀድርሳ ባጋራ ኤቅዳ እቻሹ እቻሹ ፆምፐ ዎꬅያ ኮጫታ፥ ጪሻታ፥ ፆምፐታነ ቃጰታ፥ 50 ፁአታ፥ ፆምፐ ቶይስያባታ፥ ፃሮታ፥ እፃነ ጩይስያባታ፥ ታማ ኤክያ ሚሸታ፥ ኡባፈ ጌሻ በሳ ቆልአ ፐንገታነ ፆሳ ኬꬃ ካረ ባጋ ፐንገታ ኦይክዳ ማፃፈታ። ሀ ሚሸት ኡባይ ዋላህ ባይና ዎርቃፈ ኦሰትዶሶና።

51 ካዎይ ሶሎሞነይ ፆሳ ኬꬃ ኦሱዋ ኡባ ፖልዳፐ ጉየ፥ እያ አዋይ ዳዊቲ ጎዳስ ዱማይድ ዎꬅዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬꬃ ሻሎ ምንጅያ ኬꬃን ዎꬅስ።