1 ሄሳፈ ጉየ፥ ካዎይ ሶሎሞነይ ጎዳ ታቦትያ ዳዊታ ካታማፐ፥ ፅዮነፐ ከስድ፥ ፆሳ ኬꬅ ኤሀናዉ እስራኤለ ጭማታ፥ ኮቻታ ሀላቃታነ እስራኤለ ሶ አሳታ ካለይሳታ የሩሳላመ ካታማን ሺሽስ። 2 ኤታንማ ጌተትያ ላፑንꬃ አጌናን፥ ሻቃራ ባለይ ቦንቸትያ ዎደ እስራኤለ አሳ ኡባይ ካዋ ሶሎሞነኮ ሺቅዶሶና።

3 እስራኤለ ጭማት ኡባይ ሺቅን፥ ካህነት ታቦትያ ደንꬅዶሶና። 4 ሌወትነ ካህነት፥ ጎዳ ታቦትያ፥ ዱንካንያነ እያ ግዶን ደእያ ጌሻ ሚሸታ ኡባ ቶክድ ኤህዶሶና። 5 ካዎይ ሶሎሞነይነ እያራ ደእያ እስራኤለ አሳይ ታቦትያ ስንꬃን ሺቅድ፥ ታይባናዉ ዳንዳኤቶና ዳሮ ዶርሰነ መሄ ያርሽዶሶና።

6 ሄሳፈ ጉየ፥ ካህነት ጎዳ ጫቆ ታቦትያ ፆሳ ኬꬃን ኡባፈ ጌሻ በሳ ኤህድ፥ ክሩበታ ቀፈታፐ ጋርሳ ባጋራ ዎꬅዶሶና። 7 ምጨትድ ኡትዳ ክሩበታ ቀፈት ታቦትያነ ታቦትያ ቶክያ ካሶታ ካምዶሶና። 8 ካሶት ዳሮ አዱሰ ግድያ ግሾ ኤንታ ፄራይ ኡባፈ ጌሻ በሳ ስንꬃን ቆንጨን በንቶሶና። ሽን ጌሻ በሳፈ ካረራ በንታናዉ ዳንዳኤና። ኤንቲ ሀች ጋካናዉ ሄ በሳን ደኦሶና። 9 እስራኤለ አሳይ ግብፀ ቢታፈ ከይዳ ዎደ ጎዳይ ኤንታራ ጫቅዳ ኮሬባ ዙማን ሙሰይ ዎꬅዳ ናምኡ ሎቸ ሹቻታ ፃላላፐ አትሽን፥ ታቦትያ ግዶን ሀራባይ አይብካ ባዋ።

10 ካህነት ፆሳ ኬꬃፈ ከይዳ ዎደ ፆሳ ኬꬃይ ሻራን ኩምስ። 11 ሄ ሻራ ጋሶን ካህነት ባንታ ኦሱዋ ኦꬃናዉ ዳንዳእቦኮና፤ ጎዳ ቦንቾይ ፆሳ ኬꬃ ኩምስ።

12 ሄሳፈ ጉየ፥ ሶሎሞነይ፥ “አቤት ጎዳዉ፥ ኔኒ፥ ‘ታኒ ꬉማ ሻራን ዳና’ ያጋዳሳ። 13 ታኒ ነዉ ቦንቾ ኬꬅ፥ መርናዉ ኔኒ ያን ዳና በሲ ኬፃስ” ያግስ።

14 እስራኤለ ማባራይ ኩመꬅ ያን ኤቅዳሽን፥ ካዎይ ኤንታኮ ስሚድ፥ ሀይሳዳ ያግድ ኤንታዉ ዎስስ።

15 “ጎዳይ እስራኤለ ፆሳይ ጋላተቶ! ታ አዋ ዳዊታስ ባ ዶናን ኦድዳ ኡፋይሳ ቃላ ባ ኩሸን ፖልስ። እ ኦድዳ ኡፋይሳ ቃላይ፥ 16 ‘ታኒ ታ አሳ፥ እስራኤለ ግብፀፈ ከስዳ ጋላሳፐ ዶምን፥ ታ ሱንꬃይ እያን ዳና መላ ኬ ኬፃናዉ እስራኤለ ኮቻታ ግዶን እስ ካታማካ ዶራብከ። ሽን ታ አሳ እስራኤለ ካለꬃና መላ ታኒ ዳዊታ ዶራስ’ ያግስ።

17 “ታ አዋይ ዳዊቲ፥ ጎዳ እስራኤለ ፆሳ ሱንꬃስ ኬ ኬፃናዉ ባ ዎዛናን ቆፕስ። 18 ሽን ጎዳይ፥ ታ አዋ ዳዊታኮ፥ ‘ኔኒ ታ ሱንꬃስ ኬ ኬፃናዉ ነ ዎዛናን ቆፕዳ ግሾ ሎኦባ ኦꬃዳሳ። 19 ግዶሽን፥ ኬ ኬፃናይ ነና ግዳካ፤ ታ ሱንꬃስ ኬ ኬፃናይ ነ ጉልባታፐ የለታና ነ ናኣ’ ያግስ።

20 “ጎዳይ ገልዳ ባ ኡፋይሳ ቃላ ፖልስ። ጎዳይ ካሰ ገልዳ ኡፋይሳ ቃላዳ ታኒ ታ አዋ ዳዊታ በሳን ካዎታስ፤ እስራኤለ ካዎተꬃ አራታን ኡታስ። ጎዳ እስራኤለ ፆሳ ሱንꬃስ ኬ ኬፃስ። 21 ጎዳይ ኑ አዋታ ግብፀፈ ከስዳ ዎደ ኤንታራ ጫቅዳ ጫቆ ታቦትያ ዎꬃና በሲ ጊግሳስ” ያግስ።

22 ሄሳፈ ጉየ፥ ሶሎሞነይ ጎዳ ያርሾ በሳ ስንꬃን፥ ኩመꬃ እስራኤለ ማባራ ግዶን ኤቅድ፥ ባ ኩሽያ ምጭድ፥ 23 ሀይሳዳ ያግድ ዎስስ፤ “አቤት ጎዳዉ፥ እስራኤለ ፆሳዉ፥ ቦላ ሳሉዋን ጋርሳ ሳአን ነ መላ ፆሲ ባዋ። ኔኒ ነ ጫቁዋ ናጋሳ። ባ ኩመꬃ ዎዛናን ነ ስንꬃን ሄመትያ ነ አይለታ ነ መርና ሲቁዋን ዶሳዳሳ። 24 ነ አይልያስ፥ ታ አዋ ዳዊታስ፥ ኔኒ ኦꬃና ጋዳ ገልዳ ቃላ ናጋዳሳ። ኔኒ ካሰ ነ ዶናን ኦድዳይሳ ሀች ነ ኩሸን ፖላዳሳ።

25 “ሀእካ ጎዳዉ፥ እስራኤለ ፆሳዉ፥ ኔኒ ነ አይልያስ፥ ታ አዋ ዳዊታስ፥ ‘ኔኒ ታ ስንꬃን ሄመትዳይሳዳ ነ ናይትካ ታ ስንꬃን ሄመትድ ባንታ ኦግያ ናግኮ፥ ታ ስንꬃን እስራኤለ ካዎተꬃ አራታን ኡትያ አስ ኔኒ ꬋያካ’ ያግዳ ቃላ ፖላ። 26 አቤት እስራኤለ ፆሳዉ፥ ኔኒ ነ አይልያስ፥ ታ አዋ ዳዊታስ ገልዳ ነ ቃላ ሀእካ ፖላ።

27 “ሽን ፆሳይ ቱማ ሳአን ዳነዬ? ሄኮ፥ ሳሎት፥ ኡባፈ ꬎቃ ሳሎይካ ነና ኦይካናዉ ዳንዳኤና። ያትን፥ ታኒ ኬፅዳ ኬꬃይ ነዉ አይ መላ ጉፃንደሻ! 28 ግዶሽን፥ አቤት ጎዳዉ፥ ታ ፆሳዉ፥ ታኒ ነ አይለይ ሀች ዎስያ ዎሳነ ዋሱዋ ስአ። 29 ‘ታ ሱንꬃይ ሄ በሳን ዳና’ ግዳ ሀ ኬꬃ ነ አይፈይ ቃማነ ጋላስ ፄሎ። ታኒ ነ አይለይ ሀ በሳኮ ስማዳ ዎስያ ዎሳ ስአ። 30 ታኒ ነ አይለይነ ነ አሳይ እስራኤለይ፥ ሀ ፆሳ ኬꬃኮ ስሚድ፥ ዎስያ ዎሳ ስአ። ነ ደእያ በሳን ሳሎን ስአዳ ኑስ አቶ ያጋ።

31 “እስ አስ ባ ላግያ ቆህድ፥ ቆሀብከ ግድ ካድን፥ እያ ጫቅሳናዉ ፆሳ ኬꬅ ኤህን፥ እያ ግዶን ደእያ ያርሾ በሳ ስንꬃን እ ጫቅኮ፥ 32 ኔኒ ሳሎን ስአዳ ኦꬃ። ነ አይለታ ግዶን ፕርዳ። ናቅዳ ኡራ ቦላ ፕርዳዳ፥ እ ኦꬅዳባ እያ ቦላ ዛራ፤ ፅሉዋስ ፕርዳዳ እያ ፅሎተꬃ ቆንጭሳ።

33 “ነ አሳይ እስራኤለይ ነ ቦላ ናጋራ ኦꬅዳ ግሾ ባንታ ሞርከታን ፆነትድ፥ ኔኮ ስሚድ ነ ሱንꬃ ፄግኮ፥ ሀ ኬꬃን ነና ዎስኮነ ኔኮ ዋስኮ፥ 34 ኔኒ ሳሎን ስአ። ነ አሳ እስራኤለ ናጋራ አቶ ጋ፤ ያታዳ ኔኒ ካሰ ኤንታ ማይዛታስ እምዳ ቢታ ኤንታ ጉየ ዛራ።

35 “ነ አሳይ ነ ቦላ ናጋራ ኦꬅዳ ግሾ ሳሎይ ጎርደትን፥ እር ቡኮና እፅን፥ ኤንቲ ሀ በሳ ስሚድ፥ ዎስኮነ ኔኒ ኤንታ ኡንኤꬅዳ ግሾ ነ ሱንꬃ ፄግድ፥ ባንታ ናጋራፐ ስምኮ ኔኒ ሳሎን ስአ። 36 ነ አይለታ፥ እስራኤለ ናጋራ አቶ ጋ። ኤንቲ ሄመታናዉ በሲያ ሎኦ ኦግያ ኤንታ ታማርሳ፤ ነ አሳ ላትስዳ ቢታን እራ ቡክሳ።

37 “ቢታ ቦላ ኮሽ ዎይኮ ጋዶይ ያ ዎደ፥ ጫርኮይ ካꬃ ሾጭድ ዎይኮ ሀርመይ ꬋይስያ ዎደ፥ ቦለይ ዎይኮ ጉምቡሮይ ቢታ ቦላ ያ ዎደ፥ ሞርከይ ኤንታ ካታማታ ተቅያ ዎደ፥ ጋዶይነ ሀርገይ ያ ዎደ፥ 38 ነ አሳ እስራኤለፐ ኦንካ ነና ዎስኮነ ኔኮ ዋስኮ ቃስ አይ አስካ ባ ዎዛናን ኡንኤትድ ሀ ፆሳ ኬꬃኮ ስሚድ ባ ኩሽያ ምጭኮ፥ 39 ነ ደእያ በሳን ሳሎን ስአ። ኤንታ ናጋራ አቶ ጋ፤ ኤንታ ማዳ። ኔኒ አሳ ዎዛና ኤረይሳዳ አሳ ኡባስ እያ ኦሱዋዳ ኦሱዋዳ እማ። አሳ ኡባ ዎዛና ኤረይ ነ ፃላላ። 40 ያንኮ፥ ኔኒ ኑ ማይዛታስ እምዳ ቢታን ደእያ ዎደ ኡባን ኤንቲ ነዉ ያያና።

41 “ነ አሳ እስራኤለፐ ግዶናሽን፥ አላጋ ቢታ አሳይ፥ ነ ግታ ሱንꬃ ግሾ ሃሆ ቢታፈ ይዳ አስ ደእኮ፥ 42 ነ ግታ ሱንꬃ ስእድ፥ ሃሆ ቢታፈ ይድ፥ ሀ ፆሳ ኬꬃኮ ስሚድ ነና ዎስኮ፥ 43 ኔኒ ደእያ በሳን ሳሎን ስአ። ነ አሳት፥ እስራኤለት ኤረይሳዳ ሳአን ደእያ አሳ ኡባይ ነ ሱንꬃ ኤራና መላነ ነዉ ያያና መላ፥ ታኒ ኬፅዳ ሀ ፆሳ ኬꬃይ ነና ጎይንያ በሲ ግደይሳ ኤንቲ ኤራና መላ አላጋ ቢታ አሳይ ዎስያባ ኤንታዉ ፖላ።

44 “ነ አሳት ባንታ ሞርከታ ኦላና መላ ነ ኪትዳ በሳ ብድ፥ ኤንቲ ኔኒ ዶርዳ ሀ ካታማኮነ ታኒ ነ ሱንꬃስ ኬፅዳ ኬꬃኮ ስሚድ ጎዳ ነና ዎስኮ፥ 45 ኤንታ ዎሳነ ዋሱዋ ሳሎን ስአዳ ኤንታዉ ፆኖ እማ።

46 “ናጋራ ኦꬆና አስ ባይና ግሾ ኤንቲ ነ ቦላ ናጋራ ኦꬅን፥ ኔኒ ኤንታ ሀንቀታዳ ሞርከታስ አꬃዳ እምን፥ ሞርከት ኤንታ ድእድ፥ ሃሆ ግድን ማታ በሲ ኤፍኮካ፥ 47 ኤንቲ ሄ ድኤትዳ ቢታን ደእሸ፥ ባንታ ዎዛናን ናጋራፐ ስምኮ፥ ሄ ድኤትዳ ቢታን ደእሸ፥ ‘ኑኒ ናጋራ ኦꬅዳ፤ ኑኒ ባልዳ፤ ኑኒ ኢታ ሀንዳ’ ያግድ ኔኮ ዋስኮ፥ 48 ኤንታና ድእድ ኤፍዳ ሞርከታ ቢታን ደእሸ፥ ባንታ ኩመꬃ ዎዛናንነ ባንታ ኩመꬃ ቆፋን ኔኮ ስምኮ፥ ኔኒ ኤንታ ማይዛታስ እምዳ ኤንታ ቢታኮ፥ ነ ዶርዳ ካታማኮነ ታኒ ነ ሱንꬃስ ኬፅዳ ኬꬃኮ ስሚድ፥ ነና ዎስኮ፥ 49 ኤንታ ዎሳነ ኤንታ ዋሱዋ ነ ደእያ በሳን ሳሎን ስአዳ ኤንታዉ ፕርዳ። 50 ነ አሳይ ነ ቦላ ኦꬅዳ ናጋራነ ቆህዳ ቆሁዋ አቶ ጋ፤ ኤንታ ድእድ ኤፍዳ አሳት ኤንታዉ ቃታና መላ ኦꬃ። 51 ኤንቲ፥ ብራታ ሴርስያ ጮጨ ታማዳ ፁግያ ግብፀ ቢታፈ ኔኒ ከስዳ ነ አሳታነ ነ ቡዞ ላታታ።

52 “ታኒ ነ አይለይነ ነ አሳይ እስራኤለይ ዎስያ ዎሳ ነ አይፈይ ፄሎ። ኤንቲ ዋስያ ዎደ አዉደካ ኔኒ ኤንታ አላ። 53 አቤት ጎዳዉ፥ ፆሳዉ፥ ኔኒ ካሰ ኑ አዋታ ግብፀፈ ከስያ ዎደ ነ አይልያ ሙሰ ባጋራ ኦድዳይሳዳ ኤንታ ሳአን ደእያ ካዎተꬃታ ኡባ ግዶፈ ነዉ ቡዞ ኦꬃናዉ ዱማይዳ ደረ” ያግድ ዎስስ።

54 ሶሎሞነይ ዎሳ ፖልዳፐ ጉየ፥ ባ ኩሽያ ምጭድ ያርሾ በሳ ስንꬃን ጉልባትዳ በሳፈ ደንድ ኤቅስ። 55 እስራኤለ ማባራ ኡባ ባ ቃላ ꬎቁ ኦꬅድ ሀይሳዳ ያግድ አንጅስ፤ 56 “ባ ገልዳ ቃላዳ ባ አሳ እስራኤለ ሸምፕስዳ ጎዳይ ጋላተቶ፤ እ ባ አይልያ ሙሰ ባጋራ እምዳ ሎኦ ኡፋይሳ ቃላ ኡባይ ፖለትስ። 57 ጎዳይ ኑ ፆሳይ ካሰ ኑ አዋታራ ደእዳይሳዳ ኑራካ ደኦ፤ እ ኑና ኩመꬅ አገና፤ የገና። 58 ኑኒ እያ ኦገታን ሄመታና መላነ እ ኑ አዋታስ እምዳ ኪታነ ዎጋ ናጋና መላ ኑ ዎዛና ባኮ ዛሮ። 59 ጋላስ ጋላስ ኑስ ኮሽያባ እማናዉ ጎዳይ ታና ባ አይልያነ ባ አሳ እስራኤለ ማዳና መላ፥ ታኒ ጎዳ ስንꬃን ዎስዳ ዎሳት ቃማነ ጋላስ ጎዳኮ፥ ኑ ፆሳኮ፥ ሺቆ። 60 ሄሳን፥ ሳአን ደእያ አሳ ኡባይ ጎዳይ ፆሰ ግደይሳነ እያፐ አትሽን፥ ሀራ ፆሲ ባይናይሳ ኤራና። 61 ሀች ህንተ ኦꬅዳይሳዳ ህንተ እያ ዎጋዳ እያዉ ኪተታናዉ ህንተ ዎዛናይ ጎዳስ፥ ኑ ፆሳስ አማነተይሳ ግዶ” ያግድ አንጅስ።

62 ሄሳፈ ጉየ ካዎይነ እስራኤለ አሳ ኡባይ እስፈ ጎዳ ስንꬃን ያርሾ ያርሽዶሶና። 63 ሶሎሞነይ ጎዳስ እስፈተꬃ ያርሾ ያርሻናዉ 22,000 ቦራታነ 120,000 ዶርሳታ ሺሽስ። ሄሳዳ ኦꬅድ ካዎይነ እስራኤለ አሳ ኡባይ ጎዳ ኬꬃ አንጅስዶሶና። 64 ካዎይ ሶሎሞነይ ፆሳ ኬꬃ ስንꬃን ደእያ ዳባባ ግዶ ክፍልያ ሄ ጋላስ ዱማይስ። ሄ በሳን ፁሳ ያርሾ፥ ካꬃ ያርሾነ እስፈተꬃ ያርሹዋፈ ሞꬉዋ ያርሽስ። እ ሄሳ ኦꬅዳይ ጎዳ ስንꬃን ደእያ ናሰ ብራታፐ ኦሰትዳ ያርሾ በሳይ ፁሳ ያርሾ፥ ካꬃ ያርሾነ እስፈተꬃ ያርሹዋፈ ሞꬉዋ ያርሻናዉ ጉፅዳ ግሾሳ።

65 ሄ ዎደ ሶሎሞነይነ እስራኤለ አሳ ኡባይ ላፑን ጋላስ ሻቃራ ባኣለ ቦንችዶሶና፤ እስራኤለ ዛዋን ሀማታ ፕኑዋፐ ብድ ግብፀ ሻፋ ጋካናዉ ደእያ ዳሮ አሳይ ጎዳ ስንꬃን ባኣለ ቦንቻናዉ ሺቅስ። 66 ዎንተꬃ ጋላስ ካዎይ አሳ ሞይዝስ፤ አሳይ ካዋ አንጅድ፥ ጎዳይ ባ አይልያ ዳዊታስነ ባ አሳ እስራኤለስ ኦꬅዳ ኬሀተꬃን ዎዛናፐ ኡፋይትሸ ባ ሶ ባ ሶ ብስ።