1 ሶሎሞነይ ፆሳ ኬꬃነ ካዎ ጋꬎ ኬፅድ ዉርስዳ ዎደ ባ ዎዛናን ኦꬃናዉ አሞትዳ ኡባ ፖልዳፐ ጉየ፥ 2 ጋባኦናን ካሰ ቆንጭዳይሳዳ ጎዳይ ዛሪድ እያዉ ቆንጭስ።

3 ጎዳይ፥ “ኔኒ ታ ስንꬃን ዎስዳ ዎሳነ ዋሱዋ ታኒ ስአስ። ኔኒ ኬፅዳ ኬꬃይ መርናዉ ታ ሱንꬃይ እያን ፄገታና መላ ኦꬃዳ ጌሻስ። ታ አይፈይነ ታ ዎዛናይ ኡባ ዎደ ያን ዳና። 4 ሽን ኔኒ ነ አዋይ ዳዊቲ ሄመትዳይሳዳ ቦረይ ባይና ሱረተꬃን ታ ስንꬃን ሄመትኮ፥ ታ ኪታ ኡባ ኦꬅኮነ ታ ዎጋነ ታ ህግያ ናግኮ፥ 5 ታኒ ነ አዋ ዳዊታስ፥ ‘እስራኤለ ካዎተꬃ አራታን ኡትያ አስ ኔኒ ኩመꬅ ꬋያካ’ ” ግዳይሳዳ ነ አራታ እስራኤለ ቦላ መርናዉ ምንꬃዳ ኤሳና።

6 “ሽን ነ ዎይኮ ነ ናይት ታና ካሎ አግድ ጉየ ስምኮ፥ ታኒ ህንተና ኪትዳ ታ ኪታነ ታ ዎጋ ናጎና እፅድ አላጋ ፆሳታ ጎይንኮ፥ 7 እስራኤለ አሳ ታኒ ካሰ ኤንታዉ እምዳ ቢታፈ ሾዳና፤ ታኒ ታ ሱንꬃስ ጌሽዳ ሀ ኬꬃ አጋና። እስራኤለት አሳ ኡባ ግዶን ካስነ ሚቻስ አታና። 8 ሀ ማላልስያ ፆሳ ኬꬃይ ላለትድ ላለꬃ ዶረ ግዳና። ማታራ አꬍያ አሳ ኡባይ ዳጋምድ፥ ‘ጎዳይ ሀ ቢታነ ሀ ፆሳ ኬꬃ አይስ ሀይሳዳ ኦꬅዴ?’ ያጋና። 9 አሳይ ዛሪድ፥ ‘ኤንታ ማይዛታ ግብፀፈ ከስዳ፥ ጎዳ ባንታ ፆሳ ኤንቲ አግድ፥ አላጋ ፆሳታ ካልዳ ግሾነ ኤንታ ጎይንዳ ግሾ ጎዳይ ኤንታ ቦላ ሀ ኢታባ ኡባ ኤህስ’ ” ያግድ ዛራና።

10 ሶሎሞነይ ሀ ናምኡ ኬꬃታ፥ ፆሳ ኬꬃነ ባ ካዎ ጋꬎ ኬፅዳ ላታማንꬆ ላይꬃ ዉርሰꬃን፥ 11 ፅሮሳ ካዎይ ክራም ፂዳ፥ ዝጋነ ዎርቃ ኡባ እምዳ ግሾ፥ ጋልላን ደእያ ላታሙ ካታማታ ሶሎሞነይ እያዉ እሚስ። 12 ሽን ክራም ፅሮሳፐ ከይድ፥ ሶሎሞነይ እያዉ እምዳ ካታማታ በአናዉ ብዳ ዎደ ካታማት እያ ኡፋይስቦኮና። 13 ክራም ሶሎሞነኮ፥ “ታ እሻዉ፥ ሀይሳቲ ነ ታዉ እምዳ ካታማት አይባ ካታሜ?” ያግስ። ሄሳ ግሾ፥ እ ሄ ካታማታ፥ “ፓꬆና ቢታ” ያግድ ሱንꬅስ። ሄ ሄራይ ሀች ጋካናዉ ሄ ሱንꬃን ፄገቴስ። 14 ክራም 4,000 ክሎ ግራመ ዎርቃ ካዋ ሶሎሞነስ ካሰ የድስ።

15 ፆሳ ኬꬃ፥ ካዎ ጋꬎ፥ ሚሎ፥ የሩሳላመ ካታማ ግምብያ፥ ሀፆራ፥ ማግዶነ ገዘራ ግምባናዉ ካዋ ሶሎሞነስ ኦሳንቾት ደኦሶና። 16 ግብፀ ካዎይ ካሰ ገዘራ ኦይክድ ታማን ፁግስ። ካታማን ደእያ ካናነ አሳታ ዎꬍስ፤ ሶሎሞነይ ኤክዳ ባ ናእዉ ዎይቶ ኦꬅድ እሚስ። 17 ሶሎሞነይ ገዘራነ ጋርሳ ቤት-ሀሮና ዛሪድ ኬፅስ። 18 ባእላታ፥ ይሁዳ መላ ደእያ ታማራ፥ 19 ቡቁራ ምንጅያ ካታማታ ኡባ፥ ባ ፓራታነ ፓራ ጋረታ ናግያ ካታማታ፥ የሩሳላመን፥ ልባኖሰንነ እ ሃርያ ቢታ ኡባን ኬፃናዉ ኮይዳ ኡባ ኬፅስ።

20 አሞረታፐ፥ ህተታፐ፥ ፓርዘታፐ፥ ህወታፐነ ያቡሰታፐ አትዳ አሳት ኡባይ እስራኤለ አሰ ግዶኮና። 21 ኤንቲ እስራኤለ አሳይ ቢታፈ ዉርስድ ꬋይሳናዉ ዳንዳኦና እፅን ሄ ቢታን አትዳ አሳ ኮቻታ። ሶሎሞነይ ኤንታ አይለ ኦꬅን፥ ኤንቲ ሀች ጋካናዉ አይለተꬃን ኦꬆሶና። 22 ሽን ሶሎሞነይ እስራኤለ አሳፐ ኦናካ አይለ ኦꬅቤና። ኤንቲ እያዉ ሞርናታ፥ ኦላንቾታ፥ ቶራ ሞጮና፥ ፓራ ጋረ ላግያ አሳስ ሀላቃነ ፓራ አስ ግድድ ኦꬅዶሶና። 23 ኤንቲ ሶሎሞነይ ኦስስያ ኬꬃ ኬፀይሳታ ሀላቃታ፤ ኤንቲ እቻሹ ፄታነ እሻታማ።

24 ግብፀ ካዋ ናእያ ዳዊታ ካታማፐ ሶሎሞነይ እዉ ኬፅስዳ ኬꬃ ይዳፐ ጉየ፥ እ ሚሎ ካታማ ግምብስ።

25 ሶሎሞነይ ጎዳስ ግምብዳ ያርሾ በሳን ፁሳነ እስፈተꬃ ያርሾ ላይꬃን ሄꬑ ቶሆ ያርሼስ። ጎዳ ስንꬃን እፃነ ጩይሴስ፤ ሄሳን ፆሳ ኬꬃይ ፖለትስ።

26 ሄሳፈ ጉየ፥ ካዎይ ሶሎሞነይ ኤዶመ ቢታን ዞኦ አባ ጋፃን፥ ኤሎታ ማታን ደእያ ኤፅዮን-ጋብራን ማርካበታ ኦꬅስ። 27 ካዎይ ክራም ሶሎሞነ አሳራ ኦꬃና መላ ማርካበ ላጎን ሎህዳ ባ አሳታ ኪትስ። 28 ኤንቲ ኦፍራ ቢታ ብድ 14,000 ክሎ ግራመ ዎርቃ ካዋ ሶሎሞነስ ኤክድ ይዶሶና።