1 ሳባ ካውያ ጎዳይ ሶሎሞነስ ቆንጭስዳ ማላልስያ ጭንጫተꬃ ዎርያ ስአዳ፥ ዴፆ ኦይሻታ ኤካዳ እያ ፓጫናዉ ባሱ። 2 ሳዉዋ፥ ዳሮ ዎርቃነ አልኦ ሹቹ ጫንዳ ዳሮ ግማለ ጩጋራ ዳሮ አጃባን የሩሳላመ ጋካዳ ሶሎሞነ ስን ሺቃሱ። ባ ዎዛናን ደእያ ኡባ ሶሎሞነ ኦይቻሱ። 3 ሶሎሞነይ እያ ኦይችዳባ ኡባ ዛርስ፤ እዉ ብርሾናሽን፥ እያፐ ጌምድ አትዳባይ አይብካ ባዋ። 4 ሳባ ካውያ ሶሎሞነ ጭንጫተꬃ፥ እ ኬፅዳ ካዎ ጋꬉዋ፥ 5 እያ ጋይታን ሺቅያ ካꬃ፥ እያ ሞርናት ኡትያ ኡተꬃ፥ እያ አይለት ኦꬅያ ኦሱዋ፥ ኤንቲ ማእያ ማኡዋ፥ ኤስ ዱቀይሳታነ ፆሳ ኬꬃን ሺሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።

6 እያ፥ ካዋ ሶሎሞነኮ፥ “ነባነ ነ ጭንጫꬃባ ታኒ ታ ቢታን ደአሸ ስእዳይስ ቱማ። 7 ሽን ታኒ ያዳ፥ ታ አይፈን በአና ጋካናዉ ኤንቲ ታዉ ኦድዳባ አማናብከ። ሄኮ፥ አሳይ ታዉ ኦድዳይስ ባጋ ጋከና፤ ነ ጭንጫተꬃይነ ነ ዱረተꬃይ ታኒ ስእዳይሳፈ ዳሮ አꬌስ። 8 ኡባ ዎደ ነ ስንꬃን ኤቅድ፥ ነ ጭንጫተꬃ ስእያ ነ አሳትነ ነ ሞርናት አይ መላ ቃዳራ ደእያ አሰ! 9 ነናን ኡፋይትድ፥ ነና እስራኤለ ካዎተꬃ አራታን ኡትስዳ ጎዳይ ነ ፆሳይ ጋላተቶ! ጎዳይ እስራኤለ አሳ መርናዉ ሲቅዳ ግሾ ኔኒ ሱረ ፕርዳነ ፅሎተꬅ ኦꬃና መላ እ ነና ካዎꬅስ” ያጋሱ።

10 ሳባ ካውያ 4,000 ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ። ሳባ ካውያ ካዋ ሶሎሞነስ እምዳይሳ መላ ዳሮ ሳዎ ሄሳፈ ስምን ኦንካ ኤህቤና።

11 (ካዋ ክራማ ማርካበት፥ ኦፍራፐ ዎርቃ ኤህዳይሳት ያፐ ዳሮ ሳንዳለ ምꬅነ አልኦ ሹቹ ኤህዶሶና። 12 ካዎይ ሶሎሞነይ ሄ ሳንዳለፐ ፆሳ ኬꬃነ ካዎ ጋꬎ ቱቀታ፥ ዛማረታስ ዲꬅነ ማስንቆ ኦስስስ። ሄሳ መላ ሳንዳለይ ሄ ዎደፐ ስምን ይድ ኤረና፤ በንት ኤረና።)

13 ካዎይ ሶሎሞነይ እማናዉ በሲያ እሞታታፐ ሀራ፥ ሳባ ካውያ አሞታዳ እያ ኦይችዳባ ኡባ እዉ እሚስ። ሄሳፈ ጉየ፥ ሳባ ካውያ ባ አጃባራ ደንዳዳ ባ ቢታ ስማሱ።

14 ሶሎሞነይ ላይꬃን ላይꬃን ኤክያ ዎርቃይ 23,000 ክሎ ግራመ። 15 ሄስ ዛልአንቾታፐ ኤክያ ቃራፃ፥ አራበ ካዎታፐነ እስራኤለ ቢታን ሃረይሳታፐ ኤክያ ጊራ ጉጀና። 16 ሶሎሞነይ ናምኡ ፄቱ ግታ ጎንዳለታ ዎርቃፈ ቆፅድ ኦስስስ። እስ እስ ጎንዳልያን ኡሱፑን ክሎ ግራመ ግድያ ዎርቀይ ገልስ። 17 ቃስ ሄꬑ ፄቱ ጉꬃ ጎንዳለታ ዎርቃፈ ቆፅድ ኦስስስ። እስ እስ ጉꬃ ጎንዳልያን ናምኡ ክሎ ግራመ ግድያ ዎርቀይ ገልስ። ካዎይ ሄ ጎንዳለታ “ልባኖሰ ዎራ” ጌተትያ ባ ካዎ ጋꬎን ዎꬅስ።

18 ቃስ ካዎይ እስ ግታ አራታ ዳንጋርሳ ዛለፐ ኦስስድ ጌሻ ዎርቃን ላንፅስስ። 19 አራታይ ደእያ በሳ ፑደ ከያናዉ የꬍያ ኡሱፑን ደꬃት ደኦሶና። ሄ አራታስ ጉየ ባጋራ ሁጵያ ቦላ ገርቶይ ደኤስ። አራታስ ናምኡ ባጋራ ቀሰ ዘምፕስያ በሳት ደኦሶና፤ ሄ ናምኡ በሳታ ምየን ኤቅዳ እስ እስ ጋሞ ምስለይ ደኤስ። 20 ሄ አራታ ቦላ ከይያ ኡሱፑን ደꬃታስ ያ ባጋራነ ሀ ባጋራ እስ እስ ጋሞ ምስለይ፥ ኩመꬅ ታማነ ናምኡ ምስለት ደኦሶና። ሄሳ መላ አራት ሀራ ካዎተꬃን አዉንካ ኦሰትቤና።

21 ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ “ልባኖሰ ዎራ” ጌተትያ ካዎ ጋꬎን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብራስ ጎእ ባይና ግሾ ብራፐ ኦሰትዳባይ ባዋ። 22 ካዋ ክራማ ማርካበታራ ዛልእያ ግታ ማርካበት አባን ደኦሶና። ሄ ማርካበት ዎርቃ፥ ብራ፥ ዳንጋርሳ ዛለ፥ ገለሾ፥ ቃረነ አያና ካፎ ጫንድ ሄꬑ ላይꬃፈ እስ ቶሆ ስሞሶና።

23 ካዎይ ሶሎሞነይ ዱረተꬃንነ ጭንጫተꬃን ሳአን ደእያ ካዎታ ኡባፈ አꬌስ። 24 ሳአን ደእያ አስ ኡባይ እያኮ ያናዉነ ፆሳይ እያ ዎዛናን ዎꬅዳ ጭንጫተꬃ ስአናዉ ኮዬስ። 25 ላይꬃን ላይꬃን ያ ኡባይ እያዉ ዎርቃ፥ ብራ፥ ማኦ፥ ኦላ ሚሸ፥ ሳዎ፥ ፓራነ ባቁሎ እሞታ ኤክድ ዮሶና።

26 ሶሎሞነይ ፓራ ጋረታነ ፓራታ ሺሽስ፤ እያዉ 1,400 ፓራ ጋረትነ 12,000 ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎꬅስ። 27 ካዎይ የሩሳላመን ብር ሹቻዳ፥ ዝግ ዙማ ፃጶን ድጭያ ቦባዳ ዳራናዳ ኦꬅስ። 28 ሶሎሞነ ፓራት ግብፀፈነ ቃወ ቢታፈ ዮሶና። ካዋ ዛልአንቾት ኤንታ ቃወፐ ሻምድ ኤሆሶና። 29 ኤንቲ እስ እስ ፓራ ጋረ ኡሱፑን ፄቱ ብራ ሳንትመን፥ እስ እስ ፓራ ፄታነ እሻታሙ ብራ ሳንትመን ግብፀፈ ሻምድ ኤሆሶና። ኤንቲ ህተታ ካዎታስነ ሶረ ካዎታስ ባይዞሶና።