11
ሶሎሞነ ማቸታ
1 ካዎይ ሶሎሞነ ዳሮ አላጋ ቢታ ማጫሳታ ዶስስ። ሄሳት ግብፀ ካዋ ናኤፐ ሀራ ሞአበታ፥ አሞነታ፥ ኤዶመታ፥ ስዶናታነ ህተታ ማጫሳታ። 2 ጎዳይ እስራኤለ አሳስ፥ “ኤንቲ ህንተ ዎዛና ባለꬅድ ባንታ ኤቃታኮ ዛርያ ግሾ ሀ አሳታራ ኤኮንነ ገሎን ዋላከቶፍተ” ያግድ ካሰ ኦድስ። ሽን ሶሎሞነ ኤንታ ሲቁዋን ቃሸትስ። 3 ሶሎሞነስ ካዎ ናአ ግድዳ ላፑን ፄቱ ማቸትነ ሄꬑ ፄቱ ላገꬆት (ቁባተት) ደኦሶና። ሄ ማቸት እያ ፆሳፈ ሃስዶሶና። 4 ሶሎሞነይ ጭምሸ ብያ ዎደ እያ ማቸት እያ ዎዛና ሀራ ፆሳታኮ ዛርዶሶና። እያ አዋ ዳዊቲ ኩመꬃ ዎዛናን ጎዳስ ሃረትዳይሳዳ እ ባ ጎዳ ፆሳስ ሃረትቤና። 5 ሶሎሞነይ አስታሮቶ ጌተትያ ስዶናታ ፆሴስነ ሞሎካ ጌተትያ እፀትዳ አሞነታ ኤቃ ጎይንስ። 6 ሶሎሞነይ ጎዳ ስንꬃን ኢታባ ኦꬅስ፤ እያ አዋ ዳዊቲ ካልዳይሳዳ ጎዳ ፖሎ ካልቤና።
7 ሶሎሞነይ ካሞሻ እፀትዳ ኤቃስነ ሞሎካ ጌተትያ አሞነታ ኤቃስ የሩሳላመፐ ዉሎሀ ባጋን ደእያ ደረ ሁጰን ꬎቃ ጎይኖ በሳታ ኬፅስ። 8 አላጋ ቢታፈ ኤክዳ ባ ማቸታስ ሄሳዳ ጊግስን፥ ኤንቲ ባንታ ኤቃታስ ያን እፃነ ጩይዶሶናነ ያርሾ ያርሽዶሶና።
9 እያዉ ናምኡ ቶሆ ቆንጭዳ ጎዳ እስራኤለ ፆሳፈ ሶሎሞነ ዎዛናይ ሃክዳ ግሾ፥ ጎዳይ እያ ሀንቀትስ። 10 ሀራ ፆሳታ ካሎናዳ ጎዳይ ሶሎሞነ ኪትስ፥ ሽን ሶሎሞነይ ጎዳ ኪታ ናግቤና። 11 ሄሳ ግሾ፥ ጎዳይ ሶሎሞነኮ፥ “ኔኒ ሀይሳዳ ሀንዳ ግሾነ ታ ጫቁዋነ ታ ዎጋ ነ ናጎና ግሾ ታኒ ነ ካዎተꬃ ኔፐ ኤካዳ ነ አይለታፐ እሱዋስ እማና። 12 ግዶሽን፥ ነ አዋ ዳዊታ ግሾ ታኒ ሀይሳ ነ ደኦ ላይꬃን ኦꬅከ፥ ነ ናኣ ኩሸፐ ኤካና። 13 ሄስ ሀንኮካ፥ ካዎተꬃ ነ ናኣ ኩሸፐ ኡባ ኤክከ፤ ታ አይልያ ዳዊታ ግሾነ ታኒ ዶርዳ የሩሳላመ ግሾ እስ ኮቸ እያዉ እማና” ያግስ።
ሶሎሞነ ሞርከታ
14 ሄሳፈ ጉየ፥ ጎዳይ ኤዶመ ቢታ ካዎታ ኮቸ ግድዳ፥ ኤዶመ አድያ ሀዳዳ ሶሎሞነ ቦላ ሞርከ ኦꬅድ ደንꬅስ። 15 ካሰ ዳዊቲ ኤዶመ አሳታራ ኦለትዳ ዎደ ሀይቅዳይሳታ ሞጋናዉ ብዳ ቶራ ሞጮናይ እዮኣብ ኤዶመን ደእያ አደታ ኡባ ዎꬍድ ዉርስስ። 16 ኤዶመን ደእያ አደታ ኡባ ꬋይሳና ጋካናዉ እዮኣብነ እስራኤለ አሳ ኡባይ ያን ኡሱፑን አጌና ኡትዶሶና። 17 ሽን ሄ ዎደ ጉꬃ ናአ ግድዳ ሀዳድ፥ ባ አዋስ ኦꬅዳ ኤዶመ ሞርናታፐ ጉꬃታራ ግብፀ ባቃትስ። 18 ኤንቲ ምድያመፐ ደንድድ ፓራና ብዶሶና፤ ፓራነፐ ባንታራ አሰ ኤክድ ግብፀ ካዋኮ ብዶሶና። ካዎይ ሀዳዳስ እስ ኬꬅነ ጋደ እምድ ካꬅ እያዉ የድስ። 19 ሀዳድ ካዋ ዳሮ ኡፋይስን፥ ካዎይ ባ ማቸ፥ ፃፍናስ ምችዉ እያዉ ማቾ ኦꬅድ እሚስ። 20 እያ ጋኑባታ ጌተትያ ናአ እያዉ የላሱ። ፃፍናሳ እያ ካዎ ጋꬎን ድቻሱ፤ ጋኑባት ያን ካዋ ናይታራ እስፈ ደእስ።
21 ሀዳድ ግብፀን ደእሸ ዳዊቲነ ኢያ ቶራ ሞጮናይ እዮኣብ ሀይቅዳይሳ ስእድ፥ ካዋኮ፥ “ታኒ ታ ቢታ ስማና መላ ታና የዳ” ያግስ።
22 ካዎይ እያ፥ “ነዉ ሀይሳን አይብ ፓጭን፥ ነ ቢታ ባናዉ ኮያይ?” ያግድ ኦይችስ።
ሀዳድ፥ “ታዉ አይብካ ፓጭቤና፥ ሽን ታኒ ባና” ያግስ።
23 ቃስካ ፆሳይ ኤልያዳ ናኣ ራዞና ሶሎሞነ ቦላ ሞርከ ኦꬅድ ደንꬅስ። ራዞን ሱባ ካዋ አድራዛራፐ ባቃትስ። 24 ዳዊቲ ሱባ ኦላንቾታ ꬋይስዳ ዎደ ራዞን ባዉ አሰ ሺሽድ ፓኖታ ሀላቃ ግድስ። ፓኖት ዳማስቆ ብድ፥ ኦይክድ ያን ኡትድ ራዞና ካዎꬅዶሶና። 25 ሀዳድ መꬍዳ መቱዋ ቦላ ጉጅድ፥ ሶሎሞነይ ደእዳ ላይꬃ ኡባን ራዞን እስራኤለታስ ሞርከ ግድስ። ራዞን ሶረን ካዎትድ እስራኤለ አሳስ ሞርከ ግድስ።
እዮርባም ሶሎሞነ ቦላ ደንድስ
26 ሄሳዳካ ናባፃ ናአይ እዮርባም ሶሎሞነ ቦላ ማካልድ ደንድስ። እ ሶሎሞነ አይለታፐ እሱዋ። እ ኤፍሬማ ቢታን ደእያ ፃሬዳፐ ይዳ አስ፤ እያ አየ ሱንꬃይ ፅሩአ፤ እያ አምኦ። 27 ካዋ ቦላ እ ማካልድ ደንድዳ ታርከይ ሀይሳፈ ካልድ ፃፈትዳይሳ። ሄ ዎደ ሶሎሞነይ ሚሎ ግምቤስነ ባ አዋ ዳዊታ ካታማ ግምበ ድርሳ ዩሹዋን ደእያ ኦላ ኩንꬄስ። 28 እዮርባም ምኖ አስ፤ ሶሎሞነይ ሀ ናአተꬃይ ባ ኦሱዋ ዋትድ ሎይꬅ ኦꬅያኮ በእድ፥ ዮሰፋ *ዮኤፋ ናይት ምናሰነ ኤፍሬማ። እስ እስ ካሰ ማፃፋት ምናሰነ ኤፍሬማ ቢታን ጎሶና። ቢታን ኦꬅያ ማዳ ኦꬅያ አሳ ቦላ ሀላቃ ኦꬅድ ሹምስ።
29 እስ ጋላስ እዮርባም የሩሳላመፐ ከይድ ብሽን፥ ሴሎፐ ይዳ ናበይ አክይ ኦራꬃ ማኦ ማእድ እያራ ኦገን ጋሄትስ። ደንባን ኤንታ ናምኣ ፃላል ደኦሶና። 30 አክይ ባ ማእዳ ኦራꬃ ማኡዋ ኦይክድ፥ ታማነ ናምአ ከስድ ዳክስ። 31 እዮርባማኮ፥ “ታሙ ዳከꬃ ነዉ ኤካ። ጎዳይ እስራኤለ ፆሳይ ሀይሳዳ ያጌስ፤ ‘ሄኮ፥ ታኒ ካዎተꬃ ሶሎሞነ ኩሸፐ ኤካዳ ታሙ ኮቻታ ነዉ እማና። 32 ሽን ታ አይልያ ዳዊታ ግሾነ እስራኤለ ዛረ ኡባ ግዶፈ ታኒ ዶርዳ የሩሳላመ ግሾ እስ ኮቸ እያዉ አጋና። 33 ታኒ ሄሳ ኦꬅያ ጋሶይ፥ ሶሎሞነይ ታና አግድ ስዶና ፆስዉ አስታሮቶ፥ ሞአበ ፆሳ ካሞሻነ አሞነ ፆሳ ሞሎካ ጎይንዳ ግሾሳ። ቃስ ታ ኦግያን ሄመቶና እፅዳ ግሾነ እያ አዋይ ዳዊቲ ኪተትዳይሳዳ ታ ዎጋነ ታ ህግያ ናጎና እፅዳ ግሾሳ።
34 “ ‘ግዶሽን፥ ታኒ ካዎተꬃ ሶሎሞነ ኩሸፐ ዉርሳ ኤክከ። ታኒ ዶርዳይሳ ግሾነ ታ ኪታነ ታ ዎጋ ናግዳ ታ አይልያ ዳዊታ ግሾ ሶሎሞነይ ደኦን ደእሽን ሄሳ ኦꬅከ። 35 ታኒ ካዎተꬃ እያ ናኣ ኩሸፐ ኤካዳ ታሙ ኮቻታ ነዉ እማና። 36 ታ ሱንꬃይ ያን ፄገታና መላ ታኒ ዶርዳ የሩሳላመን፥ ኡባ ዎደ ታ አይልያ ዳዊታ ኮቻይ ካዎታና መላ ታኒ እስ ኮቸ እያ ናኣስ እማና። 37 ታኒ ነና ኤካና፤ ነ ዎዛናይ ዶስዳ ኡባ ኔኒ ሃራና፤ ኔኒ እስራኤለ ቦላ ካዎታና። 38 ታኒ ነና ኪትያባ ኔኒ ኦꬅኮ፥ ታ ኦግያን ሄመትኮነ ታ አይለይ ዳዊቲ ናግዳይሳዳ ታ ዎጋነ ታ ኪታ ናጋዳ፥ ታ ስንꬃን ሱረባ ኦꬅኮ፥ ታ ኔራ ግዳና። ዳዊታስ ኦꬅዳይሳዳ ነ ኮቻት ካዎተꬃን ምናናዳ ኦꬃና፤ እስራኤለ ነዉ እማና። 39 ሶሎሞነ ናጋራ ግሾ ታኒ ዳዊታ ኮቻ ሴራና፤ ሽን መርናዉ ሴርከ’ ” ያግስ። 40 ሶሎሞነይ ኢዮርባማ ዎꬋናዉ ኮይስ፤ ሽን እዮርባም ግብፀ ካዋ ሽሻቃኮ ባቃትድ፥ ሶሎሞነይ ሀይቃና ጋካናዉ ግብፀን ጋምእስ።
ሶሎሞነ ሀይቁዋ
(2 ታር 9:29-31)
41 ሶሎሞነ ሀንዳ ሀራባይ፥ እ ኦꬅዳባይ፥ እያ ጭንጫተꬃይ ሶሎሞነ ታርከ ማፃፋን ፃፈትስ። 42 ሶሎሞነይ እስራኤለ ቦላ የሩሳላመን ኦይታሙ ላይꬅ ካዎትስ። 43 ሄሳፈ ጉየ፥ ሶሎሞነይ ሀይቅድ፥ ባ ማይዛን ጋሄትስ፤ ባ አዋ ዳዊታ ካታማን ሞገትስ። እያ ናአይ ሮብኣም እያ በሳን ካዎትስ።