1 ሄኮ፥ እዮርባም ያርሾ ሺሻናዉ ያርሾ በሳ ማታን ኤቅዳሽን፥ ጎዳይ ኪትዳ፥ ፆሳ አስ ግድዳ እስ ናበይ ይሁዳፐ ይስ። 2 ጎዳይ ኪትን ሄ ያርሾ በሳ ቦላ ሀይሳዳ ያግድ ዋስስ፤ “ያርሾ በሳዉ፥ ያርሾ በሳዉ፥ ጎዳይ ኔኮ ያጌስ። ሄኮ፥ ዳዊታ ኬꬃስ እዮስያሳ ጌተትያ እስ ናእ የለታና። ሄ ናአይ ሀእ ሀይሳን ꬎቃ ያርሾ በሳን ያርሽሸ ደእያ ካህነታ ነ ቦላ ያርሻና፤ አሳ መቀꬃ ነ ቦላ ፁጋና” ያግስ። 3 ሄ ጋላስ ፆሳ አደይ ሀይሳዳ ያግድ ማላታ እሚስ፤ “ጎዳይ ኦድዳ ማላታይ ሀይሳ፤ ሄኮ፥ ሀ ያርሾ በሳይ ጳልቀታና፤ እያ ቦላ ደእያ ብዶይ ላለታና” ያግስ።

4 ካዎይ እዮርባም ፆሳ አደይ ቤተለን ደእያ ያርሾ በሳ ቦላ ዋስዳ ዋሱዋ ስእዳ ዎደ ያርሾ በሳፈ ባ ኩሽያ ማልድ፥ “ሄ አድያ ኦይክተ!” ያግስ። ሽን እ፥ አድያ ማልዳ ኩሸይ በሳን መልድ አትን፥ ባ ኩሽያ ጉየ ዛሪድ ኤካናዉ ዳንዳእቤና። 5 ፆሳ አደይ ጎዳ ቃላን እምዳ ማላታን ያርሾ በሳይ ጳልቀትድ ዎꬍን፥ እያ ቦላ ደእያ ብዶይካ ላለትስ። 6 ካዎይ እዮርባም ፆሳ አድያ፥ “ታ ኩሸይ ካሰይሳዳ ሀናና መላ ታዉ ጋናታ፤ ጎዳ ነ ፆሳ ዎሳ” ያግስ። ፆሳ አደይ ካዋስ ጋናትድ ጎዳ ዎስን፥ ካዋ ኩሸይ ስሚድ ካሰይሳዳ ሀንስ።

7 ካዎይ ናብያኮ፥ “ታራ ታ ሶ የꬋ፤ ካꬅ ማ፤ ታ ነዉ እሞታ እማና” ያግስ።

8 ሽን ፆሳ አደይ፥ “ሀር አቶሽን ኔኒ ነ አቁዋፐ ባጋ ታዉ እምያኮካ፥ ታኒ ኔራ ቢከ፤ ሀይሳን ካꬅ ሚከ፥ ሃ ኡይከ። 9 ጎዳ ቃላይ፥ ‘ኔኒ ካꬅ ሞፓ፥ ሃ ኡዮፓ፥ ነ ይዳ ኦግያራ ስማዳ ቦፓ’ ያግስ ግድ ካዋስ ዛርስ።” 10 ሄሳ ግሾ፥ እ ሀራ ኦገራ ብስ፤ እ ቤተለ ይዳ ኦግያራ ስሚድ ብቤና።

11 ሄ ዎደ ቤተለን እስ ጭማ ናበይ ደኤስ። ሄ ጋላስ ፆሳ አደይ ቤተለን ኦꬅዳባ ኡባ ሄ ጭማ አድያ ናይት ይድ እያዉ ኦድዶሶና። ቃስ ሄ አደይ ካዋስ ኦድዳ ቃላ ኤንቲ ባንታ አዋስ ኦድዶሶና። 12 አዋይ፥ “እ አዉ ባጋራ ብዴ?” ያግን፥ ይሁዳፐ ይዳ ፆሳ አደይ ብዳ ኦግያ ማልዶሶና። 13 እ ባ ናይታኮ “ታዉ ኤለ ሀረ ኮርተ” ያግን፥ ኤንቲ እያዉ ሀረ ኮርን ቶግስ። 14 ፆሳ አድያ ጌዶ ካልድ ብስ። እስ ዎላ ኩያን ኡትዳይሳ ደምድ፥ “ይሁዳፐ ይዳ ፆሳ አደይ ነኔ?” ያግድ ኦይችስ።

አደይ፥ “ኤ ታና” ያግስ።

15 ጭማ ናበይ፥ “ካꬅ ማናዉ ታራ ታ ሶ የꬋ” ያግስ።

16 ፆሳ አደይ ዛሪድ፥ “ታኒ ጉየ ስማዳ ኔራ ባናዉ ዎይኮ ሀ በሳን ኔራ ካꬅ ማናዉ ዎይኮ ሃ ኡያናዉ ዳንዳእከ። 17 ጎዳ ቃላይ ታኮ ‘ኔኒ ሄ በሳን ካꬅ ሞፓ፥ ሃ ኡዮፓ፥ ነ ይዳ ኦግያራ ስማዳ ቦፓ’ ያግስ” ያግስ።

18 ጭማ ናበይ፥ “ታካ ኔዳ ናበ። ጎዳይ ኪትዳ ኪታንቾይ ታኮ፥ ‘ካꬅ ማና መላነ ሃ ኡያና መላ እያ ዛራዳ ኔራ ነ ሶ ኤካዳ ያ’ ” ያግስ። ሽን ጭማ አደይ እያዉ ዎርዶ ኦድስ። 19 ሄሳ ግሾ፥ ፆሳ አደይ ስሚድ እያራ እያ ሶ ብድ ምስነ ኡይስ።

20 ኤንቲ ጋይታ ቦላ ኡትዳሽን፥ ጎዳ ቃላይ እያ ጉየ ዛርዳ ኤህዳ ጭማ ናብያኮ ይስ። 21 ይሁዳፐ ይዳ ፆሳ አድያስ ባ ቃላ ꬎቁ ኦꬅድ፥ “ጎዳይ ሀይሳዳ ያጌስ፤ ‘ኔኒ ጎዳ ቃላ ኪተታባካ፤ ጎዳይ ነ ፆሳይ ነና ኪትዳ ኪታ ናጋባካ። 22 ሄ በሳን ሞፓ ዎይኮ ኡዮፓ’ ግዳ በሳ ጉየ ስማዳ ያን ካꬅ ማዳሳ፤ ሃ ኡያዳሳ። ህዛ ነ አሀይ ነ አዋታ ዱፎን ሞገተና” ያግስ።

23 ፆሳ አደይ ምድ ኡይድ ስምን እያ ጉየ ዛሪድ ኤህዳ ጭማ ናበይ ባ ሀርያ እያዉ ኮርስ። 24 እ ኦግያ ብሽን ጋሞይ ከይድ እያ ዎꬍን፥ አሀይ ኦግያን ኩንድስ፤ ሀረይነ ጋሞይ ናምአይ አሀ ማታን ኤቅዶሶና። 25 ሄኮ፥ ሄ ኦግያራ አꬍያ አሳይ አህ ኦገን ኩንድዳይሳነ ጋሞይ አሀ ማታን ኤቅድይሳ በእድ፥ ብድ ጭማ ናበይ ደእያ ካታማን ኦድዶሶና።

26 እያ ጉየ ዛርዳ ጭማ ናበይ ሄሳ ስእዳ ዎደ ሀይሳዳ ያግስ፤ “ሄስ ጎዳ ቃላስ ኪተቶና እፅዳ ፆሳ አድያ። ጎዳ ቃላይ እያዉ ኮይሮትድ ኦድዳይሳዳ ጎዳይ ጋሞን እያ ጋꬅስ፤ ያትን፥ ጋሞይ እያ መንረꬅድ ዎꬍስ” ያግስ።

27 ሄሳፈ ጉየ፥ ጭማ ናበይ ባ ናይታ፥ “ታዉ ሀረ ኮርተ” ያግን ኤንቲ እያዉ ሀረ ኮርዶሶና። 28 እ ከይድ ብያ ዎደ ኦግያን ኩንድዳ አሀ፥ አሀ ማታን ኤቅዳ ሀርያነ ጋሙዋ ደምስ። ጋሞይ አሀ ምቤና ዎይኮ ሀርያ መንꬅቤና። 29 ጭማ ናበይ ፆሳ አድያ አሀ ደንꬅድ፥ ሀርያ ዞኮን ዎꬅድ፥ ዬካናዉነ ሞጋናዉ ጉየ ባ ካታማ ኤክድ ብስ። 30 ባዉ ጊግስድ ዎꬅዳ ዱፎን አሀ ሞግስ። እያዉ፥ “ታ እሻዉ ታሳ! ታ እሻዉ ታሳ!” ያግድ ዬክስ።

31 እያ ሞግ ስሚድ ባ ናይታኮ ሀይሳዳ ያግስ፤ “ታ ሀይቅያ ዎደ ፆሳ አደይ ሞገትዳ ዱፎን ታና ሞግተ። ታ መቀꬃ እያ መቀꬃ ማታን ዎꬅተ። 32 ቤተለ ካታማን ደእያ ያርሾ በሳ ቦላነ ሳማረ ካታማን ደእያ ꬎቃ ጎይኖ በሳታ ቦላ ጎዳይ ኪትን፥ ሄ አደይ ዋስድ ኦድዳ ትንብተይ ቱማ ፖለታና” ያግስ።

33 ሄስ ሀንንካ እዮርባም ባ ኢታ ኦግያፐ ስምቤና። ꬎቃ ጎይኖ በሳታስ ሌወ ኮቸ ግዶና ኦናካ ካህነ ኦꬅድ ሹምስ። ካህነ ግዳናዉ ኮይያ ኦናካ ꬎቃ ጎይኖ በሳን ሹሜስ። 34 እዮርባማ ኬꬃ አሳ ꬋይሳናዉነ ቢታ ቦላፈ ቁቻናዉ ጋꬅዳ ናጋራይ ሄሳ።